Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 63: Tupu Poto o Solomona

Tala 63: Tupu Poto o Solomona

NA TALAVOU lava Solomona a o fai o ia ma tupu. E alofa o ia iā Ieova, ma mulimuli i fautuaga lelei a lona tamā o Tavita. Na fiafia Ieova iā Solomona, ma o le isi pō na ia faapea atu ai e ala i se miti: ‘Solomona, o le ā le mea e te mana‘o ou te avatua mo oe?’

Ona tali atu lea o Solomona: ‘Ieova e, lou Atua, e la‘itiiti tele a‘u ma ou te le iloa ona pule. O lea ia e aumai iā te a‘u le poto e pulea ai ou tagata i se auala sa‘o.’

Na fiafia Ieova i le mea na fai atu ai Solomona. Ona ia tulei atu lea: ‘Talu ai na e mana‘o mai i le poto ae lē o le ola umi po o le tamaoaiga, o le a ou avatua ai iā te oe le poto e sili atu i lo so o se isi lava tagata. Ae ou te avatua fo‘i iā te oe le tamaoaiga ma le mamalu.’

Ua mavae sina taimi puupuu, ona ō atu lea o ni fafine se to‘alua iā Solomona ma se faalavelave faigatā. ‘O le fafine lea ma te nonofo faatasi,’ o le tala lea a le isi fafine. ‘Na ou fanaua se pepe tama. I le isi pō, na oti ai lana pepe. Sa ou moe, ae na ia aumai lana tama ma tuu i ou tafatafa ae ave lau pepe. Ina ua ou ala ua ou iloa ai e lē o sa‘u tama le pepe ua oti.’

Ona fai mai lea o le isi fafine: ‘E leai! O le pepe ola o lau tama lea, ae o le ua oti o lana tama lea!’ Ona tali atu lea o le fafine muamua: ‘E leai! O la‘u tama le pepe lenā e ola!’ Ona finau ai pea lea o nei fafine. O le ā nei o le a fai e Solomona?

Na ia poloa‘i mo se pelu, ma ina ua maua mai, na ia faapea atu loa: ‘Ia tipi lua le pepe ola ma avatu e tofu le fafine ma le afa.’

‘Aua’ o le tagi lea a le tinā moni. ‘Faamolemole aua le fasiotia le pepe. Ia avatu ma ia!’ Ae na faapea mai le isi fafine: ‘Aua ne‘i aumaia ma se isi o i ma‘ua; tipi lua pea le pepe.’

O loo fo‘ia e le tupu o Solomona se faalavelave faigatā

Sa faapea atu loa Solomona: ‘Aua le fasiotia le pepe! Avatu o ia i le fafine muamua. O ia o lona tinā moni.’ Na iloa e Solomona auā o le tinā moni sa alofa tele i le pepe ua naunau ai e tuuina atu i le isi fafine ae aua ne‘i fasiotia. Ina ua faalogo tagata i le auala na fo‘ia ai e Solomona le faalavelave, na fiafia i latou ina ua fai o ia ma o latou tupu.

I le taimi o le pulega a Solomona, na faamanuia ai le Atua i tagata, sa ia faatuputeleina saito ma karite, vine, mati ma isi mea‘ai. Na oofu lelei tagata ma nonofo i fale lelei. Ua sili atu ona tele mea e maua i lo mea e mana‘omia e tagata.

1 Tupu 3:3-28; 4:29-34.



Fesili

  • O le ā na fai atu ai Ieova i a Solomona, ma o le ā le tali a Solomona?
  • Ona na fiafia Ieova i le mea na fai atu ai Solomona, o le ā na folafola e Ieova e avatu iā te ia?
  • O le ā le faalavelave faigatā na faamatala atu e ni fafine se to‘alua iā Solomona?
  • E pei ona e vaaia i le ata, na faapefea ona fo‘ia e Solomona le faalavelave?
  • Na faape‘ī le pulega a Solomona, ma aiseā?

Fesili faaopoopo

  • Faitau le 1 Tupu 3:3-28.

    O le ā e mafai ona a‘oa‘oina e tane o loo gafa ma tiute tauave i le faalapotopotoga a Ieova i aso nei, mai upu a Solomona i le 1 Tupu 3:7? (Sala. 119:105; Faata. 3:5, 6)

    E faapefea ona avea le talosaga a Solomona ma faaa‘oa‘oga lelei mo mea talafeagai e ao ona tatalo iai? (1 Tu. 3:9, 11; Faata. 30:8, 9; 1 Ioa. 5:14)

    E faapefea ona tatou faatuatuaina le pulega a le Solomona Sili o Iesu Keriso i le lumana‘i, ona o le auala na tauaao ai e Solomona le finauga i le va o fafine e to‘alua? (1 Tu. 3:28; Isa. 9:6, 7; 11:2-4)

  • Faitau le 1 Tupu 4:29-34.

    Na faapefea ona taliina e Ieova le talosaga a Solomona mo le lotomatala? (1 Tu. 4:29)

    Pe a fua i taumafaiga a tagata e ō atu e faalogologo i le poto o Solomona, o le ā so tatou manatu e ao ona iai e faatatau i le su‘esu‘eina o le Afioga a le Atua? (1 Tu. 4:29, 34; Ioa. 17:3; 2 Timo. 3:16)