Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 62: Faalavelave i le Aiga o Tavita

Tala 62: Faalavelave i le Aiga o Tavita

INA ua pule Tavita i Ierusalema, ona tuuina atu lea e Ieova le manumalo tele iā te ia i ona fili. Na tautō Ieova na te tuuina atu le nuu o Kanana i a Isaraelu. Ma ua fesoasoani nei Ieova i le tuuina atu o laueleele uma lava na tautō atu ai e avea mo i latou.

O Tavita o se e pule lelei. E alofa o ia iā Ieova. O lana mea muamua lava na fai ina ua uma lona pu‘eina o Ierusalema, o le avatua lea o le atolaau o le feagaiga a Ieova i ina. Ma na mana‘o o ia e fausia se malumalu e teu ai.

Ina ua matua Tavita, na ia faia se mea sesē toe leaga. Ua iloa lelei e Tavita e leaga ma sesē le aveina o se mea a se isi tagata. Ae i le isi afiafi pō a o iai i le pito i luga o lona maota, na ia tepa mai ai i lalo ma iloa mai se fafine aulelei lava. O lona igoa o Patesepa, a o lona to‘alua o se fitafita e igoa iā Uria.

O le mana‘o tele o Tavita iā Patesepa na i‘u ai ina aumai o ia i lona maota. O lana tane o loo alu i le taua. Sa alofagia o ia e Tavita ma mulimuli ane na ia iloaina o le a iai sana pepe. Ua popole tele Tavita ona ia ta‘u atu lea iā Ioapo e faapito i luma Uria i le taua ia fasiotia ai o ia. Ina ua oti Uria ona faaipoipo atu lea o Tavita iā Patesepa.

Ua to‘asā lava Ieova iā Tavita. Ona ia auina atu lea o Natano e ta‘u atu lana agasala. E mafai ona e vaai atu iā Natano o loo talanoa iā Tavita. Ua faanoanoa tele Tavita i lana mea na fai, o lea na le fasiotia ai o ia e Ieova. Ae na tulei mai Ieova: ‘Talu ai ua e faia lenei mea leaga, o le a tele ni faalavelave i lou aiga.’ Paga ni faalavelave na oo iā Tavita!

O loo a‘oa‘i e Natano Tavita

Muamua na oti le tama a Patesepa. Ona toso lea e le ulumatua a Tavita o Amanono lona tuafafine o Tamara. Na ita tele le atalii o Tavita o Apisaloma ma ia fasioti iā Amanono. Mulimuli ane, ua to‘atele tagata ua manana‘o iā Apisaloma, ma ua fai o ia ma tupu. Ma mulimuli ane ai, na manumalo Tavita i le la taua, ma ua fasiotia Apisaloma. Ioe, o le tele ia o faalavelave na oo iā Tavita.

Sa fanaua fo‘i e Patesepa se tama e igoa iā Solomona. Ina ua matua Tavita ma ma‘i, ona taumafai lea o Atonia lona atalii e fai o ia ma tupu. Ona fai atu lea o Tavita i le faitaulaga o Satoka e liligi le suāuu i le ulu o Solomona e faaalia ai o le a fai o ia ma tupu. Mulimuli ane ona oti ai lea o Tavita i le 70 o ona tausaga. Sa pule o ia mo le 40 tausaga, ma ua avea nei Solomona ma tupu o Isaraelu.

2 Samuelu 11:1-27; 12:1-18; 1 Tupu 1:1-48.



Fesili

  • O le ā na tupu i le nuu o Kanana ona o le fesoasoani a Ieova?
  • O le ā na tupu i se isi afiafi pō a o iai Tavita i le pito i luga o lona maota?
  • Aiseā na to‘asā lava Ieova iā Tavita?
  • I le ata, o ai na auina atu e Ieova e ta‘u i a Tavita lana agasala, ma o le ā le tala a le tamāloa e faatatau i le mea o le a tupu iā Tavita?
  • O ā faalavelave na oo i a Tavita?
  • Ina ua maliu Tavita, o ai na fai ma tupu o Isaraelu?

Fesili faaopoopo

  • Faitau le 2 Samuelu 11:1-27.

    E faapefea i le pisi i le auaunaga a Ieova ona fai ma puipuiga mo i tatou?

    Na faapefea ona tosina atu Tavita e faia le agasala, ma o le ā le lapata‘iga mo auauna a Ieova i aso nei? (2 Samu. 11:2; Mata. 5:27-29; 1 Kori. 10:12; Iako. 1:14, 15)

  • Faitau le 2 Samuelu 12:1-18.

    O le ā le lesona e a‘oa‘oina e mātua ma toeaina i le auala na avatu ai e Natano le a‘oa‘iga iā Tavita? (2 Samu. 12:1-4; Faata. 12:18; Mata. 13:34)

    Aiseā na alofa mutimutivale ai Ieova iā Tavita? (2 Samu. 12:13; Sala. 32:5; 2 Kori. 7:9, 10)