Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 61: Fai Tavita ma Tupu

Tala 61: Fai Tavita ma Tupu

SA TOE taumafai Saulo e pu‘e Tavita. Na ia ave ni fitafita lelei e 3,000 ma ō atu e su‘e iā te ia. Ina ua iloa e Tavita, na ia aauina ni tagata faalilolilo e vaai po o fea o mālōlō ai Saulo ma ana ‘au i le pō. Ona fesili lea o Tavita i ona tagata e to‘alua: ‘O ai o oulua ma te ō i le mea o loo mālōlō ai Saulo?’

O loo valaau Tavita i le tupu o Saulo

‘O a‘u,’ o le tali lea a Apisai. O Apisai o le tama a le tuafafine o Tavita o Seruia. A o momoe Saulo ma ona tagata, sa tolotolo lemū atu i ai Tavita ma Apisai. Na la aumaia le tao a Saulo ma lana fagu vai sa i tafatafa o le ulu o Saulo. E leai lava se tasi na vaaia pe na lagonaina fo‘i i la‘ua auā ua momoe gase uma i latou.

Vaai atu nei iā Tavita ma Apisai. Ua toe ō ese mai i la‘ua ma ua saogalemu i le tumutumu o le mauga. Ua valaau mai Tavita i le ta‘ita‘i‘au: ‘Apineru, aiseā ua e lē leoleo ai i lou alii, le tupu? Vaai! O fea lana tao ma lana fagu vai?’

Ua ala nei Saulo i luga. Ua ia iloa le leo, ma fesili atu: ‘Pe o oe ea lenā, Tavita?’ Pe e te iloa atu Saulo ma Apineru i lalo i ina?

‘Ioe, lo‘u alii e le tupu,’ o le tali lea a Tavita. Ma na fesili atu Tavita: ‘Aiseā ua e taumafai ai e pu‘e iā te au? O le ā se mea leaga ua ou faia? O lau tao lenei, Le tupu e. Sau se tasi e avatu.’

 Le tupu o Saulo ma Apineru

‘Ua ou sesē,’ o le tali lea a Saulo. ‘Ua valea la‘u mea ua fai.’ Na alu loa Tavita i lona ala, ma toe fo‘i atu Saulo i lona aiga. Ae na faapea ane Tavita i lona loto: ‘E iai se aso e fasioti ai a‘u e Saulo. E tatau ona ou sola i le laueleele o Filisitia.’ Na mafai e Tavita ona faavalea Filisitia ma faatalitonu i latou nei o ia ua iai i lo latou itu.

Na iai se taimi na ō atu ai Filisitia e tau ma Isaraelu. Na fasiotia ai Saulo ma Ionatana i le taua. Na faanoanoa tele Tavita i lenei mea, na ia tusia ai se pese manaia, na ia usuina faapea: ‘Ua ou faanoanoa iā te oe, lo‘u uso e Ionatana. E pele oe iā te a‘u!’

Na toe fo‘i Tavita i Isaraelu i le aai o Heperona. Sa iai le taua i le va o tagata na filifilia le atalii o Saulo o Isoposeta e fai ma tupu ma tagata na manana‘o e fai Tavita ma tupu. Ae mulimuli ane, na manumalo tagata a Tavita. E 30 tausaga o Tavita ina ua fai o ia ma tupu. E fitu ma le afa tausaga na pule ai o ia i Heperona. O ni isi o ona atalii o Amanono, Apisaloma ma Atonia.

Na oo mai le taimi e ō atu ai Tavita ma ona tagata e faoa le aai matagofie o Ierusalema. O Ioapo, o le isi o tama a le tuafafine o Tavita o Seruia na ta‘ita‘i o ia i le taua. O lea na tauia ai e Tavita ia Ioapo e fai ma ta‘ita‘i o lana vaegaau. Ona pule ai lea o Tavita i le aai o Ierusalema.

1 Samuelu 26:1-25; 27:1-7; 31:1-6; 2 Samuelu 1:26; 3:1-21; 5:1-10; 1 Nofoaiga a Tupu 11:1-9.



Fesili

  • O le ā na faia e Tavita ma Apisai a o moe Saulo?
  • O ā fesili na fai atu ai Tavita iā Saulo?
  • Ina ua tuua Saulo, o fea na alu i ai Tavita?
  • Aiseā na faanoanoa tele ai Tavita lea na ala ai ona ia tusia se pese matagofie?
  • E fia tausaga o Tavita ina ua fai o ia ma tupu i Heperona, ma o ai igoa o nisi o ona atalii?
  • O fea le aai na pule ai Tavita mulimuli ane?

Fesili faaopoopo

  • Faitau le 1 Samuelu 26:1-25.

    E pei ona faaalia i upu a Tavita i le 1 Samuelu 26:11, na faape‘ī lona manatu i le faatulagaga a le Atua? (Sala. 37:7; Roma 13:2)

    Pe a tatou sogasogā e faaalia le alofa ae e lē talisapaia e tagata a tatou gaoioiga, e faapefea i upu a Tavita i le 1 Samuelu 26:23 ona fesoasoani iā i tatou ia sa‘o pea la tatou vaai? (1 Tu. 8:32; Sala. 18:20)

  • Faitau le 2 Samuelu 1:26.

    E faapefea i Kerisiano i aso nei ona atiina a‘e lea lava “alofa naunau o le tasi i le tasi” e pei ona faaalia e Tavita ma Ionatana? (1 Pete. 4:8; Kolo. 3:14; 1 Ioa. 4:12)

  • Faitau le 2 Samuelu 5:1-10.

    E fia tausaga na nofotupu ai Tavita, ma e faapefea ona vaevaeina na tausaga? (2 Samu. 5:4, 5)

    O le ā le māfuaaga na ala ai ona mamalu Tavita, ma e faapefea ona fai lenā mea ma faamanatuga mo i tatou i aso nei? (2 Samu. 5:10; 1 Samu. 16:13; 1 Kori. 1:31; Fili. 4:13)

Faitau Atili

E Leʻi Fefe Tavita

Ia faitau lenei tala mataʻina o le Tusi Paia ma iloa le pogai na matuā lototele ai Tavita.