Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 60: Apikaila ma Tavita

Tala 60: Apikaila ma Tavita

PE E te iloa le fafine lalelei lenā e sau e feiloa‘i ma Tavita? O ia o Apikaila. E iā te ia ni manatu lelei, ma na ia taofia Tavita mai i lona faia o se mea leaga. Peita‘i, se‘i o tatou vaai po o le a na tupu iā Tavita.

Na sola ese Tavita mai iā Saulo, ma lafi i se ana. Sa faatasi atu iā te ia ona uso ma lona aiga. E tusa e 400 tagata na ō atu ma avea Tavita ma o latou ta‘ita‘i. Sa alu Tavita i le tupu o Moapi ma fai i ai: ‘Faamolemole se‘i nonofo atu lo‘u tinā ma lo‘u tamā ma outou se‘ia ou iloa po o le ā e tupu iā te au.’ Mulimuli ane sa lalafi Tavita ma ona tagata i mauga.

Na tupu lenā mea a o le‘i feiloa‘i Tavita ma Apikaila. O lana tane o Napalu o sē e tele ana fanua. E iai ana mamoe e 3,000 ma ‘oti e 1,000. E sauā tele Napalu. Ae o Apikaila e ese le lalelei. Na te iloa fo‘i fai le mea ua sa‘o. Sa ia faasaoina lona ‘auaiga. Se‘i o tatou vaai i ai pe na faapefea.

Na agalelei Tavita ma ona tagata iā Napalu. Sa latou fesoasoani i le leoleoina o ana mamoe. I le isi aso na aauina atu ai e Tavita ona tagata e fai iā Napalu na te faia se mea lelei mo i latou. Na ō atu tagata a Tavita iā Napalu a o sele fulufulu mamoe e Napalu ma ona tagata. O se aso o le faiga‘ai, ma na tele ni mea‘ai lelei a Napalu. Sa fai atu tagata a Tavita: ‘Sa matou agalelei iā te outou, matou te le‘i gaoia ni a outou mamoe, ae sa matou fesoasoani i le vaavaaiga. O lea, faamolemole, aumai ni mea‘ai ma i matou.’

‘Ou te lē avatua a‘u mea‘ai mo outou,’ o le tala lea a Napalu. Na ia tautala i se auala sauā ma fai upu leaga aga‘i iā Tavita. Ina ua fo‘i tagata ma ta‘u iā Tavita, sa ita tele Tavita. ‘Fusi ia tou pelu!’ o lana faatonuga lea i ona tagata. Ona ō lea o i latou i le ala e fasiotia ia Napalu ma ona tagata.

Sa alu se tasi tagata a Napalu ma ta‘u iā Apikaila le mea na tupu. Sa sauniunia loa e Apikaila ni mea‘ai ma tuu i luga o ni asini ma amata loa lana malaga. Ina ua fetaia‘i o ia ma Tavita, sa ia oso ese loa mai lana asini, ifo i lalo ma faapea atu: ‘Faamolemole, lau susuga, ‘aua e te faalogo i lo‘u to‘alua o Napalu. O ia o se tagata valea, ma e fai mea valea. O le meaalofa lenei. Faamolemole ia ave ma ia outou faamagalo mai i matou i le mea na tupu.’

Ua aumai e Apikaila mea‘ai mo Tavita

‘O oe o se fafine poto,’ o le tali lea a Tavita. ‘Ua e taofia a‘u mai le fasiotia o Napalu e toe totogi ai lona sauā. Ia e toe fo‘i i lou aiga ma le filemu.’ Ina ua oti Napalu sa avea Apikaila ma se tasi o avā a Tavita.

1 Samuelu 22:1-4; 25:1-43.



Fesili

  • O ai le igoa o le fafine o loo sau e faafeiloa‘i Tavita i le ata, ma e faape‘ī ona uiga?
  • O ai Napalu?
  • Aiseā na aauina atu ai e Tavita ona tagata e fai iā Napalu na te faia se mea lelei mo i latou?
  • O le ā na fai atu ai Napalu i tagata a Tavita, ma o le ā le mea na faia loa e Tavita?
  • E faapefea ona faaalia e Apikaila o ia o se fafine poto?

Fesili faaopoopo

  • Faitau le 1 Samuelu 22:1-4.

    E faapefea ona saunia e le aiga o Tavita se faaa‘oa‘oga lelei i le auala e ao ona felagolagoma‘i ai le ‘auuso Kerisiano? (Faata. 17:17; 1 Tesa. 5:14)

  • Faitau le 1 Samuelu 25:1-43.

    Aiseā ua faamatalaina ai Napalu o se tagata matuā lē migao? (1 Samu. 25:2-5, 10, 14, 21, 25)

    O le ā e mafai ona a‘oa‘oina e avā Kerisiano i aso nei mai le faaa‘oa‘oga a Apikaila? (1 Samu. 25:32, 33; Faata. 31:26; Efe. 5:24)

    Na taofia e Apikaila Tavita i le faia o ā mea leaga e lua? (1 Samu. 25:31, 33; Roma 12:19; Efe. 4:26)

    E faapefea i le tali atu a Tavita i upu a Apikaila ona fesoasoani i tane i aso nei, ina ia latou maua le silafaga a Ieova e faatatau i fafine? (Galu. 21:8, 9; Roma 2:11; 1 Pete. 3:7)

Faitau Atili

Sa Gaoioi Apikaila ma le Faautauta

O le ā e tatou te a‘oa‘oina mai i tulaga faigatā sa iai le faaipoipoga a Apikaila?