Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 58: Tavita ma Koliata

Tala 58: Tavita ma Koliata

UA TOE ō mai fo‘i Filisitia e tau ma Isaraelu. O isi uso matutua e to‘atolu o Tavita ua iai nei i le ‘autau a Saulo. I le tasi aso na fai atu ai Iese iā Tavita: ‘Ia e ave ni saito tunu ma ni papa falaoa mo ou uso, ma vaai pe o faapefea mai i latou.’

Koliata

Ina ua taunuu Tavita i le mea na mālōlō ai le ‘autau, sa ia tamo‘e loa i le laina o le taua e vaai ona uso. Sa sau le Filisitia tinoese o Koliata e tauemu iā Isaraelu. Sa ia faia lenei mea i taeao ma afiafi uma mo le 40 aso. Na ia fonō mai: ‘Ia filifili mai se tasi o outou e tau ma a‘u. Afai e malo o ia ma fasioti iā te au, o le a fai i matou ma a outou pologa. Ae afai ou te manumalo ma ou fasioti iā te ia, ona fai lea o outou ma a matou pologa. Ma o la‘u lu‘i lea iā te outou ia filifili mai se tasi ma te tau.’

Na fesili Tavita i isi fitafita: ‘O le ā e maua e se tagata na te fasiotia le Filisitia ma faasa‘oloto Isaraelu mai i lenei luma?’

‘O le a avatua i ai e Saulo le tamaoaiga e tele,’ o le tala lea a fitafita. ‘Ma avatu lona afafine e fai ma ana avā.’

Peita‘i ua fefefe uma Isaraelu talu ai e lapo‘a tele Koliata. E sili atu i le 9 futu lona umi (pe tusa e 3 mita), ma e iai fo‘i le isi ana fitafita na te aveina lana talita.

Sa ō isi fitafita ma ta‘u i a Saulo e mana‘o Tavita e tau ma Koliata. Ae na fai atu Saulo iā Tavita: ‘E te lē mafai ona tau ma lenei Filisitia. O oe o se tamaitiiti, ae sa fai o ia ma fitafita i lona olaga atoa.’ Na tali Tavita: ‘Na ou tapēina le urosa ma le leona. O le a pei fo‘i le Filisitia lenā o se tasi o i la‘ua. O le a fesoasoani Ieova iā te au.’ Ona faapea mai lea o Saulo: ‘Inā alu ia, ia fesoasoani Ieova iā te oe.’

Sa alu Tavita i le ālia ma aumai ni maa lamolemole se lima, ma tuu i totonu o lana ato. Sa ia ave fo‘i lana maatā ma alu loa e fetaia‘i ma le tagata lapo‘a. Ina ua vaai atu iai Koliata sa manatu o ia e faigofie tele ona fasiotia Tavita.

Ua sasau atu e Tavita se maa

‘Sau ia iā te au,’ o upu ia a Koliata, ‘ma o le a ou tuu atu lou tino e aai ai manu lele ma mea ola.’ Ae na fai atu Tavita: ‘E te sau iā te au i le pelu ma le tao ma le tao leoleo, ae ou te alu atu iā te oe i le suafa o Ieova. O le aso lenei e tuuina mai ai oe e Ieova i ou lima ma o le a ou fasia ai oe.’

Na momo‘e atu loa Tavita iā Koliata. Na ia aumai se maa ma tuu i lana maatā, ma sasau i lona malosi atoa. Na lele sa‘o lava le maa i le ulu o Koliata, ma oti ai! Ina ua vaai atu Filisitia ua pa‘ū lo latou toa, sa faliu uma loa i latou ma sosola. Sa tuliloa atu i latou e Isaraelu ma manumalo ai i latou i le taua.

1 Samuelu 17:1-54.



Fesili

  • O le ā le lu‘i na fai atu ai Koliata i ‘autau a Isaraelu?
  • O le ā le maualuga o Koliata, ma o le ā na folafola atu e le tupu o Saulo mo le tagata e fasiotia Koliata?
  • O le ā le tala a Tavita ina ua fai atu iai Saulo e lē mafai ona ia tau ma Koliata ona o ia o se tamaitiiti?
  • I lana tali atu iā Koliata, na faapefea ona faaalia e Tavita lona faatuatua iā Ieova?
  • E pei ona e vaai i le ata, o le ā na faaaogā e Tavita e fasioti ai Koliata, ma o le ā na tupu i tagata Filisitia mulimuli ane ai?

Fesili faaopoopo

  • Faitau le 1 Samuelu 17:1-54.

    O le ā le māfuaaga na lē fefe ai Tavita, ma e faapefea ona tatou faaa‘oa‘o i lona lototele? (1 Samu. 17:37, 45; Efe. 6:10, 11)

    Aiseā e ao ai i Kerisiano ona ‘alofia le agaga fia tauvā e pei o Koliata pe a auai i taaloga po o faafiafiaga? (1 Samu. 17:8; Kala. 5:26; 1 Timo. 4:8)

    E faapefea ona faaalia i upu a Tavita lona faatuatuaina o le lagolagosua a le Atua? (1 Samu. 17:45-47; 2 No. 20:15)

    Na i lo le tau lava ina faamatala o se taua i le va o ni ‘autau se lua, e faapefea ona faaalia e lenei tala o le taua na fai, na faia i le va o atua sesē ma le Atua moni, o Ieova? (1 Samu. 17:43, 46, 47)

    E faapefea ona faaa‘oa‘o le vaega totoe faauuina i le faata‘ita‘iga a Tavita i lona faatuatuaina o Ieova? (1 Samu. 17:37; Iere. 1:17-19; Faaa. 12:17)

Faitau Atili

E Leʻi Fefe Tavita

Ia faitau lenei tala mataʻina o le Tusi Paia ma iloa le pogai na matuā lototele ai Tavita.