Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 57: Filifilia Tavita e le Atua

Tala 57: Filifilia Tavita e le Atua
Ua faasaoina e Tavita le tama‘i mamoe

PE E mafai ona e iloa le mea sa tupu? Ua toe faasaoina mai e le tama lana tama‘i mamoe mai i le urosa. Sa ave e le urosa le tama‘i mamoe e ai. Ae sa tuliloa e le tama, ma ia toe faasaoina mai ai le mamoe mai le gutu o le urosa. Ma ina ua faasaga mai le urosa, sa tago atu le tama ma fasi mate! I le isi taimi na ia faasaoina mai ai le mamoe mai i le leona. Pe e lē o se tama toa ea lenā? O ai lona igoa?

O le talavou lenei o Tavita. E nofo o ia i Peteleema. O le tamā o lona tamā o Opeta, o le tama a Ruta iā Poasa. Pe e te manatuaina i latou? Ma o le tamā o Tavita o Iese. E leoleo e Tavita mamoe a lona tamā. Na fanau Tavita i le 10 tausaga talu ona fai e Ieova Saulo ma tupu.

Ona oo mai lea o le taimi ua tulei atu ai Ieova iā Samuelu: ‘Ia e ave le suāuu ma alu i le fale o Iese i Peteleema. Ua ou filifilia se tasi o ona atalii e fai ma tupu.’ Ina ua vaai Samuelu i le ulumatua o Eliapo, sa ia faapea ane: ‘O ia moni lava lenei ua filifilia e Ieova.’ Ae na tulei atu Ieova: ‘Aua e te vaai i lona aulelei ma lona umi. Ou te le‘i filifilia o ia e fai ma tupu.’

Ona valaau lea e Iese o lona atalii o Apinatapa ma aumai iā Samuelu. Ae fai atu Samuelu: ‘Leai, e le‘i filifilia o ia e Ieova.’ Ona aumaia lea e Iese o lona atalii o Sama. ‘Leai, e le‘i filifilia fo‘i o ia e Ieova,’ o le tala lea a Samuelu. Na aumaia uma ona atalii e to‘afitu iā Samuelu, ae e le‘i filifilia se tasi. ‘Pe na o le pau ia o tama?’ o le fesili lea a Samuelu.

‘O loo iai le aupito itiiti,’ o le tala lea a Iese. ‘Ae peita‘i o loo leoleo o ia i mamoe.’ Ina ua aumai Tavita, na mafai e Samuelu ona iloa o ia o se tama lalelei. ‘O ia lenā,’ o afioga ia a Ieova. ‘Liligi le suāuu i ona luga.’ O le mea lenā na faia e Samuelu. O le a oo mai le taimi e fai ai Tavita ma tupu o Isaraelu.

1 Samuelu 17:34,35; 16:1-13.



Fesili

  • O ai le igoa o le tama o loo i le ata, ma e faapefea ona tatou iloa o ia o se tama toa?
  • O fea e nofo ai Tavita, ma o ai igoa o lona tamā ma le tamā o lona tamā?
  • Aiseā ua tulei atu ai Ieova iā Samuelu e alu i le fale o Iese i Peteleema?
  • O le ā na tupu ina ua aumaia e Iese ona atalii e to‘afitu iā Samuelu?
  • Ina ua aumaia Tavita, o le ā na fetalai atu iai Ieova iā Samuelu?

Fesili faaopoopo

  • Faitau le 1 Samuelu 17:34, 35.

    E faapefea ona faamatilatila e nei mea na tutupu le lototele ma le faalagolago o Tavita i a Ieova? (1 Samu. 17:37)

  • Faitau le 1 Samuelu 16:1-14.

    E faapefea i fetalaiga a Ieova i le 1 Samuelu 16:7 ona fesoasoani iā i tatou ina ia lē faaitu‘au ai ma ‘alofia le faailoga tagata ona o foliga vaaia? (Galu. 10:34, 35; 1 Timo. 2:4)

    E faapefea ona faaalia e le faaa‘oa‘oga a Saulo, afai e aveesea e Ieova lona agaga paia mai se tagata, e mafai ona maua e lenā tagata se agaga leaga po o se tu‘inanauga e faia le mea leaga? (1 Samu. 16:14; Mata. 12:43-45; Kala. 5:16)