Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 56: Saulo—Tupu Muamua o Isaraelu

Tala 56: Saulo—Tupu Muamua o Isaraelu
O loo faauuina e Samuelu Saulo e fai ma tupu

Vaai iā Samuelu lea e liligi le suāuu i le ulu o le tamāloa. E faaalia ai ua filifilia o ia e fai ma tupu. Sa fetalai Ieova iā Samuelu ia liligi le suāuu i le ulu o Saulo. O se suāuu faapitoa lava e manogi manaia tele.

Sa manatu Saulo e lē lava lona lelei e fai ma tupu. ‘O a‘u e tupuga mai iā Peniamina, o le aupito itiiti i Isaraelu,’ o ana upu ia iā Samuelu. ‘Aiseā ua e fai mai ai o le a fai a‘u ma tupu?’ E fiafia Ieova iā Saulo ona e lē manatu o ia ia maualuga ma tāua. O le māfuaaga lenā sa Ia filifilia ai o ia.

Ae o Saulo e lē o se tagata mativa pe puupuu. E sau o ia mai se aiga mau‘oa, ma o se tagata aulelei tele toe umī. E tusa o le futu e umi atu ai o ia i soo se tagata lava o Isaraelu! O Saulo fo‘i o se tagata e saosaoa tele ma le malosi. Ua fiafia nei tagata ina ua filifilia e Ieova Saulo e fai ma tupu. Ona amata lea ona latou alalaga: ‘Ia soifua le tupu!’

Ua sili nei ona malolosi fili o Isaraelu. Ua faaauau pea ona latou faatupuina faalavelave e tele iā Isaraelu. Ina ua faato‘a avea Saulo ma tupu, sa tau faasaga Amoni iā i latou. Ae sa faapotopotoina e Saulo se vaega tau tele lava, ma sa ia manumalo ai iā sa Amoni. Sa fiafia tagata ona ua fai Saulo ma tupu.

A o faagasolo pea tausaga, sa ta‘ita‘iina e Saulo Isaraelu i ni manumalo se tele i luga o o latou fili. Sa i a Saulo fo‘i se atalii lototele o Ionatana. Ma sa fesoasoani Ionatana iā Isaraelu ia manumalo i le tele taua. Sa avea pea Filisitia ma fili sili o Isaraelu. O le tasi aso na o mai ai le afe ma afe o Filisitia e tau faasaga iā Isaraelu.

Sa fai atu Samuelu iā Saulo e faatali se‘ia sau o ia ona fai lea o se taulaga iā Ieova. Ae na tuai mai Samuelu. Sa fefe Saulo ina ne‘i amata ona sii tau mai Filisitia, o lea sa ia alu atu loa ma fai e ia le taulaga. Ina ua oo mai Samuelu, sa ia fai atu iā Saulo ua lē usiusita‘i o ia. ‘O le a filifilia e Ieova se tasi tagata e fai ma tupu i luga o Isaraelu,’ o upu ia a Samuelu.

Mulimuli ane sa lē toe usita‘i fo‘i Saulo. O lea sa fai atu Samuelu iā te ia: ‘E sili le usita‘i iā Ieova na i lo le faia o taulaga i mamoe lelei. Talu ai ua e lē usiusita‘i iā Ieova, o le a lē faatumauina oe e Ieova e fai ma tupu o Isaraelu.’

E mafai ona tatou a‘oa‘oina se lesona lelei i inei. Ua faaalia ai le tāua o le usiusita‘i pea iā Ieova. Ua faaalia ai fo‘i o se tagata lelei, e pei ona sa iai Saulo, e mafai ona suia ma avea ma tagata leaga. Tatou te lē fia faapena a ea?

1 Samuelu mataupu e 9 oo i le 11; 13:5-14; 14:47-52; 15:1-35; 2 Samuelu 1:23.



Fesili

  • O le ā o loo faia e Samuelu e pei ona vaaia i le ata, ma aiseā?
  • Aiseā e fiafia ai Ieova iā Saulo, ma o le ā le ituaiga o tagata na iai o ia?
  • O ai le igoa o le atalii o Saulo, ma o le ā na faia e lona atalii?
  • Aiseā ua fai ai e Saulo le taulaga na i lo le faatali iā Samuelu?
  • O le ā le lesona tatou te a‘oa‘oina mai le tala iā Saulo?

Fesili faaopoopo

  • Faitau le 1 Samuelu 9:15-21 ma le 10:17-27.

    E faapefea i le agamalu o Saulo ona fesoasoani iā te ia e ‘alofia ai le faia o se gaoioiga sesē ina ua faia e ni tamāloloa ni upu lē faaaloalo e uiga iā te ia? (1 Samu. 9:21; 10:21, 22, 27; Faata. 17:27)

  • Faitau le 1 Samuelu 13:5-14.

    O le ā le agasala na faia e Saulo i Kilikala? (1 Samu. 10:8; 13:8, 9, 13)

  • Faitau le 1 Samuelu 15:1-35.

    O le ā le agasala matuiā na faia e Saulo e fesoota‘i atu iā Akako le tupu o Amaleka? (1 Samu. 15:2, 3, 8, 9, 22)

    O le ā le faamolemolega na faia e Saulo e faatatau i lana gaoioiga ma na faapefea ona ia tuua‘ia isi tagata? (1 Samu. 15:24)

    O le ā le lapata‘iga e ao ona tatou utagiaina i aso nei pe a a‘oa‘ia i tatou? (1 Samu. 15:19-21; Sala. 141:5; Faata. 9:8, 9; 11:2)