Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 75: Tama e To‘afā i Papelonia

Tala 75: Tama e To‘afā i Papelonia

NA AVEINA e le Tupu o Nepukanesa tagata ua a‘oa‘oina lelei o Isaraelu i Papelonia. Ona ia filifilia mai ai lea o ni taulele‘a e sili le aulelei toe atamamai. O ni isi tama na e to‘afā o loo e vaai atu ai i inā. O le tasi o Tanielu ae o le isi to‘atolu ua faaigoaina e Papelonia o Sataraka, Mesako ma Apeteniko.

Na fuafuaina e Nepukanesa e a‘oa‘oina ia taulele‘a e auauna i lona maota. A uma tausaga e tolu ona ia filifilia lea na o ē aupito popoto e fesoasoani iā te ia e fo‘ia ona faalavelave. Na mana‘o le tupu e malolosi ma ola mālōlōina nei tama a o a‘oa‘oina i latou. O lea na ia fai atu ai ni faatonuga malolosi e tuuina atu i a i latou uma lava mea‘ai lelei ma uaina e pei o mea o loo maua e lona aiga.

O loo faamatalaina e Tanielu, Sataraka, Mesako ma Apeteniko latou talitonuga

Vaai atu i le talavou lenā o Tanielu. Pe e te iloa lana tala lenā e fai atu i le auauna sili a Nepukanesa o Asepenasa? O loo fai atu Tanielu na te lē mana‘o e ‘ai ni mea‘ai lelei mai le laulau a le tupu. Ae ua popole Asepenasa: ‘Ua filifilia e le tupu mea tou te aai ai ma inu ai,’ o lana tala lea. ‘Afai tou te lē ola mālōlōina lelei e pei o isi taulele‘a, atonu o le a ia fasiotia a‘u.’

Sa alu atu loa Tanielu i le leoleo na tofiaina e Asepenasa e vaaia i latou. ‘Faamolemole tuu mai ni aso se 10 e iloiloina ai i matou,’ o lana tala lea. ‘Ia tuuina mai iā i matou ni fualaau matou te aai ai ma ni vai matou te inuina. Ona e faatusatusa lea o i matou ma isi taulele‘a o loo aai i mea‘ai a le tupu, ma iloa ai po o ai e sili ona ola lelei.’

Na malie i ai le leoleo. Ina ua uma aso e 10, na sili atu le ola lelei o Tanielu ma ana uō e to‘atolu i lo isi taulele‘a uma. O lea na faatagaina ai e le leoleo i latou ia faaauau pea ona latou aiina fualaau na i lo mea na saunia e le tupu.

Mavae tausaga e tolu ona aauina uma atu lea o taulele‘a iā Nepukanesa. Ina ua māe‘a le su‘esu‘ega a le tupu, ona ia iloa ai lea ua sili atu le atamai o Tanielu ma ana uō e to‘atolu. Ona ia taofia ai lea o i latou e fesoasoani iā te ia i lona maota. Ae po o le ā lava le mea e fai atu ai le tupu iā Tanielu, Sataraka, Mesako ma Apeteniko, o se fesili, po o le tuuina atu i a i latou o faalavelave faigatā, e faasefulu ona sili atu lo latou iloa i lo so o se tasi o ana faitaulaga po o ana tagata popoto.

Tanielu 1:1-21.



Fesili

  • O ai tama e to‘afā o loo i le ata, ma aiseā ua latou nonofo ai i Papelonia?
  • O le ā ua fuafuaina e Nepukanesa mo tama e to‘afā, ma o ā faatonuga na ia tuuina atu i ana auauna?
  • O le ā na talosaga i ai Tanielu e faatatau i mea‘ai ma meainu mo ia ma ana uō e to‘atolu?
  • Ina ua uma aso e sefulu o aai i fualaau, e faapefea ona faatusatusaina Tanielu ma ana uō e to‘atolu i isi taulele‘a?
  • Aiseā ua auina atu ai Tanielu ma ana uō e to‘atolu i le maota o le tupu, ma e faapefea ona sili atu i latou na i lo faitaulaga ma tagata popoto?

Fesili faaopoopo

  • Faitau le Tanielu 1:1-21.

    O ā ituaiga o taumafaiga e mana‘omia ona tatou faia ina ia teena ai tofotofoga ma manumalo ai i vaivaiga? (Tani. 1:8; Kene. 39:7, 10; Kala. 6:9)

    O ā ni auala e ono faaosoosoina pe omia ai talavou ina ia tagofia mea e manatu tagata o ni mea lelei? (Tani. 1:8; Faata. 20:1; 2 Kori. 6:17-7:1)

    O le ā e ao ona tatou amana‘ia e faatatau i le a‘oa‘oina o le poto faalelalolagi, ona o le tala a le Tusi Paia i talavou Eperu e to‘afā? (Tani. 1:20; Isa. 54:13; 1 Kori. 3:18-20)