Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 69: Ua Fesoasoani se Teine i se Tamāloa Malosi

Tala 69: Ua Fesoasoani se Teine i se Tamāloa Malosi

PE E te iloaina o le ā le tala a lenei teineitiiti o loo fai? O loo fai sana tala e uiga i le perofeta a Ieova o Elisaia, ma mea mananaia na fesoasoani ai Ieova iā te ia e fai. E lē iloa e lenei tama‘ita‘i Ieova auā e lē o se Isaraelu. Aiseā ua iai i ina lenei teineitiiti i le aiga o lenā tama‘ita‘i?

O lenā tama‘ita‘i o se tagata Suria. O lana tane o Naamanu, o le ta‘ita‘i‘au a Suria. Na pu‘eina e Suria lenei teineitiiti Isaraelu, ma auina atu i le avā a Naamanu e fai ma ana auauna.

Le avā a Naamanu ma lana teine auauna

Sa iā Naamanu se ma‘i o le lepela. O lenei ma‘i e mafai ona pa‘u‘ū ese ni aano mai le tino o le tagata. O le tala lenei a le teine o loo fai atu i le avā a Naamanu: ‘Ma‘imau pe ana alu lo‘u alii i le perofeta a Ieova i Isaraelu. E mafai e ia ona faamālōlō lona lepela.’ Sa ta‘uina le faamatalaga a le teineitiiti i le tane a lea tama‘ita‘i mulimuli ane ai.

Na mana‘o tele Naamanu e faamālōlō lona ma‘i; ona ia alu lea i Isaraelu. Sa alu o ia i le fale o Elisaia. Sa fai atu Elisaia i lana auauna e alu e fai iā Naamanu e alu e ta‘ele faafitu i le Vaitafe o Ioritana. Na ita tele Naamanu i lenei mea, ma faapea mai: ‘E sili atu ona lelei vai i tuā i lo ‘u aiga i lo vai o Isaraelu!’ Ina ua uma lana tala, ona alu loa lea o Naamanu.

Ae sa fai atu le tasi o ana auauna iai: ‘Alii e, ana fai atu Elisaia iā te oe e fai se mea faigatā, e te faia lava. Ae aiseā e te lē alu ai e ta‘ele, e pei ona ia fai mai ai?’ Na faalogo Naamanu i lana auauna ma alu atu loa ma tofu faafitu i le Vaitafe o Ioritana. Ona toe lelei ai lea ma malosi lona tino!

Ua fiafia tele Naamanu. Ua toe fo‘i atu iā Elisaia ma fai i ai: ‘Ua ou iloa nei o le Atua o Isaraelu ua na o ia lava o le Atua moni o le lalolagi uma. O lea, faamolemole ia talia lenei meaalofa mai iā te au.’ Ae na tali atu Elisaia: ‘E leai, ou te lē talia.’ Na iloa e Elisaia e sesē pe a ave e ia le meaalofa, auā o Ieova na faamālōlōina Naamanu. Ae na mana‘o tele le auauna a Elisaia o Kiasi i le meaalofa mo ia.

O le mea lenei na fai e Kiasi. Ina ua alu Naamanu, na momo‘e atu Kiasi e tuliloa iā te ia. ‘Na auina mai a‘u e Elisaia e ta‘u atu iā te oe ua mana‘o nei o ia i ni isi o au meaalofa mo ana uō faato‘ā o mai nei lava,’ o le tala lea a Kiasi. O lenei mea o se pepelo. Ae e le‘i iloa e Naamanu; o lea na ia tuuina atu ai iā Kiasi ni isi o mea.

Ina ua fo‘i mai Kiasi, ua iloa e Elisaia le mea ua ia faia. Na ta‘uina atu i ai e Ieova. Ona ia fai atu lea: ‘Talu ai ua e faia lenei mea leaga, o le a oo atu le lepela o Naamanu iā te oe.’ Ma na oo lava i ai i lenā taimi!

O le ā ua tatou a‘oa‘oina mai lenei mea atoa? Muamua, ia pei i tatou o le teineitiiti ma tautala e uiga iā Ieova. E iai sona aogā tele. Lua, ‘aua le faamaualuluga e pei o Naamanu, ae ia usiusita‘i i auauna a le Atua. Ma lona tolu, ‘aua tatou te pepelo e pei o Kiasi. Pe e lē tele ea ni mea ua tatou a‘oa‘oina mai le faitauina o le Tusi Paia?

2 Tupu 5:1-27.



Fesili

  • Ia vaai i le ata, o le ā le tala a le teineitiiti o loo fai atu i le tama‘ita‘i?
  • O ai le tama‘ita‘i o i le ata, ma aiseā ua i ai lenei teineitiiti i le fale o le tama‘ita‘i?
  • O le ā na fai atu ai Elisaia i lana auauna e alu e fai i a Naamanu, ma aiseā na ita tele ai Naamanu?
  • O le ā na tupu ina ua faalogo Naamanu i ana auauna?
  • Aiseā na lē talia ai e Elisaia le meaalofa a Naamanu, ae o le ā na faia e Kiasi?
  • O le ā na tupu i a Kiasi, ma o le ā ua tatou a‘oa‘oina mai lenei mea?

Fesili faaopoopo

  • Faitau le 2 Tupu 5:1-27.

    E faapefea ona faalaeiauina le fanau iti i aso nei i le faaa‘oa‘oga a le teineitiiti Isaraelu? (2 Tu. 5:3; Sala. 8:2; 148:12, 13)

    Aiseā e lelei ai le manatuaina o le faaa‘oa‘oga a Naamanu pe a tatou mauaina ni fautuaga faale-Tusi Paia? (2 Tu. 5:15; Epe. 12:5, 6; Iako. 4:6)

    O ā ni lesona ua tatou a‘oa‘oina mai i faaa‘oa‘oga eseese a Elisaia ma Kiasi? (2 Tu. 5:9, 10, 14-16, 20; Mata. 10:8; Galu. 5:1-5; 2 Kori. 2:17)

Faitau Atili

E Fesoasoani Ieova Ina ia E Lototele

O le ā e mafai ona fesoasoani iā te oe ina ia lototele e talanoa atu i isi e faatatau iā Ieova?