Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 67: Faalagolago Iosefatu iā Ieova

Tala 67: Faalagolago Iosefatu iā Ieova

PE E te iloa o ai na tamāloloa ma o ā a latou mea na e fai? O loo ō i le taua, ma o loo pepese i latou o i luma. Ae atonu e te fesili faapea: ‘Aiseā e lē avea ai ni a latou pelu, ma ni tao e tau ai?’ Se‘i o tatou vaai.

Ua savavali atu le ‘autau a Isaraelu i le taua

O Iosefatu o le tupu o le ituaiga e lua o le malo o Isaraelu. Na ola o ia i le vaitaimi na iai le tupu o Aapo ma Iesepela i le ituaiga e 10 o le malo i mātū. Ae o se tupu lelei Iosefatu, ma lona tamā o Asa. O lea mo ni tausaga se tele, na fiafia ai tagata o le ituaiga e lua o le malo i saute i se olaga lelei.

Ua tupu nei se mea. Ua fefefe fo‘i tagata. Na lipotia e avefe‘au iā Iosefatu: ‘O se vaegaau tele mai Moapi, Amoni ma le Mauga o Seira o loo ō mai e osofa‘i iā te oe.’ Ua faapotopoto nei Isaraelu e sa‘ili atu mo se fesoasoani a Ieova. Na ō atu i le malumalu, ma o i ina na tatalo ai Iosefatu: ‘Ieova e lo matou Atua, ua matou lē iloa se mea e fai. E lē mafai ona matou tau ma lenei ‘autau e to‘atele. Matou te vaavaai atu iā te oe mo le fesoasoani.’

Na faafofoga mai Ieova, ma na ta‘uina atu e sana auauna faapea: ‘O le taua, e lē a outou ae o le Atua. Tou te lē tau. Na ona outou vaavaai lava, pe faapefea ona faaolaina outou e Ieova.’

O lea, i le isi taeao na ta‘u atu ai e Iosefatu e faapea: ‘Ia outou faalagolago iā Ieova!’ Ona ia tuuina atu lea o ē pepese i luma o ana fitafita, a o savavali i latou na usuina viiga iā Ieova. Pe e te iloa le mea na tupu ina ua latalata i latou i le taua? Na faatupuina e Ieova ia fetaua‘i vaega a le fili lava ia. Ma na taunuu atu Isaraelu, ua feoti uma fitafita a le fili!

Pe e lē poto ea Iosefatu i lona faalagolago iā Ieova? E popoto fo‘i i tatou pe a tatou faalagolago iā te Ia.

1 Tupu 22:41-53; 2 Nofoaiga a Tupu 20:1-30.


Fesili

  • O ai Iosefatu, ma o le ā le vaitaimi na ola ai o ia?
  • Aiseā na fefefe ai tagata Isaraelu, ma o le ā na faia e le to‘atele o i latou?
  • O le ā le tali a Ieova i le tatalo a Iosefatu?
  • O le ā na faatupuina e Ieova a o le‘i faia le taua?
  • O le ā le lesona ua tatou a‘oa‘oina mai iā Iosefatu?

Fesili faaopoopo

  • Faitau le 2 Nofoaiga a Tupu 20:1-30.

    Na faapefea ona faaalia e Iosefatu le mea e tatau ona faia e auauna faamaoni a Ieova pe a latou feagai ma ni tulaga taufaamata‘u? (2 No. 20:12; Sala. 25:15; 62:1)

    Talu ai e iai le auala e faaaogā e Ieova e fesoota‘i mai ai i ona tagata i taimi uma lava, o le ā le auala ua ia faaaogāina i aso nei? (2 No. 20:14, 15; Mata. 24:45-47; Ioa. 15:15)

    Pe a faaoo mai e le Atua “le taua i le aso tele o le Atua e ona le malosi uma lava,” e faapefea ona tutusa o tatou tulaga ma Iosefatu? (2 No. 20:15, 17; 32:8; Faaa. 16:14, 16)

    I le faaa‘oa‘o atu i le ‘au sa Levī, o le ā le sao ua faia e paeonia ma misionare i aso nei i le galuega tala‘i i le lalolagi aoao? (2 No. 20:19; Roma 10:13-15; 2 Timo. 4:2)