Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 59: Aiseā e Tatau ona Sola Tavita

Tala 59: Aiseā e Tatau ona Sola Tavita

INA ua uma ona fasiotia e Tavita o Koliata ona avatua lea o ia e Apineru iā Saulo. Sa fiafia tele Saulo i a Tavita. Na ia tofia o ia e fai ma ta‘ita‘i i lana ‘autau ma faanofo i le fale o le tupu.

Mulimuli ane, ina ua fo‘i mai le taua ma Filisitia, na pepese loa fafine: ‘Na fasiotia e Saulo le to‘aafe, ae na fasiotia e Tavita le sefulu o afe.’ Sa tupu le lotoleaga o Saulo, auā ua tele le viiga mo Tavita na i lo ia. Ae o le atalii o Saulo o Ionatana e le‘i lotoleaga o ia. E alofa o ia iā Tavita, ma sa alofa fo‘i Tavita iā Ionatana. Ona fai ai lea o se la tautoga o le a uō pea i la‘ua.

O loo velo e le tupu o Saulo se tao

E lelei tele le tā kitara a Tavita, ma sa fiafia Saulo i pese na ia tāina. Ae i le isi aso o le lotoleaga o Saulo na māfua ai ona ia faia se mea mata‘utia. A o tāina e Tavita le kitara, sa velo e Saulo lana tao, ma faapea ane: ‘O le a ou faamauina Tavita faatasi ma le puipui.’ Ae na ‘alo Tavita ma sa ‘ela ai. Mulimuli ane na toe ‘ela fo‘i le velo a Saulo iā Tavita. Ua iloa nei e Tavita e tatau ona ia matuā faaeteete.

Pe e te manatua le tautoga a Saulo? Fai mai o ia na te tuuina atu lona afafine e fai ma avā a le tagata na te fasiotia Koliata. Mulimuli ane sa fai atu Saulo iā Tavita e mafai ona fai ma ana avā lona afafine o Mekala, ae tatau ona ia fasiotia se toa 100 o fili o Filisitia. Sa faamoemoe Saulo ia fasiotia e Filisitia Tavita. Peita‘i e leai, ma o lea na avatu ai e Saulo lona afafine e fai ma avā a Tavita.

O le tasi aso na fai atu ai Saulo iā Ionatana ma ana auauna uma e mana‘o o ia e fasioti Tavita. Ae sa faapea atu Ionatana i lona tamā: ‘Aua e te faia se mea leaga iā Tavita. Na te le‘i faia lava se mea sesē iā te oe. Ae sa ia fesoasoani tele iā te oe. Na le manumanu o ia i lona ola ina ua ia fasiotia Koliata, ma sa e fiafia i ai.’

Ua ‘alo Tavita mai le tao

Na faalogo Saulo i lona atalii ma na ia tautō na te lē toe faia le mea leaga iā Tavita. Ua toe aumai nei Tavita, ma toe auauna iā Saulo i lona fale. O le tasi fo‘i la aso, a o tā pese a Tavita, sa toe velo ai fo‘i e Saulo Tavita. Na ‘alo Tavita, ma tū ai le tao i le puipui. O le faatolu ai lenei! Ua iloa nei e Tavita e tatau ona sola ese o ia!

Ona alu atu lea o Tavita i lona fale i lenā pō. Ae na aauina atu i ai e Saulo ni tagata e fasioti iā te ia. Ua iloa e Mekala fuafuaga a lona tamā. Ona ia fai atu lea i lana tane: ‘Afai e te lē sola ese nanei, o le a e oti taeao.’ Ona fesoasoani ai lea o Mekala iā Tavita ia sola ese i le faamalama. E tusa e fitu tausaga na lafi solo ai Tavita ina ne‘i maua o ia e Saulo.

1 Samuelu 18:1-30; 19:1-18.



Fesili

  • Aiseā e lotoleaga ai Saulo iā Tavita, ae e faapefea ona ese le atalii o Saulo o Ionatana?
  • O le ā na tupu i se tasi aso a o tāina e Tavita le kitara mo Saulo?
  • O le ā na fai atu ai Saulo e tatau ona faia e Tavita a o le‘i fai Mekala le afafine o Saulo ma ana avā, ma aiseā na fai atu ai Saulo faapena?
  • A o tāina e Tavita le kitara mo Saulo, o le ā na tupu i le taimi lona tolu e pei ona faaalia i le ata?
  • E faapefea ona fesoasoani Mekala ina ia faasaoina Tavita, ma o le ā na faia e Tavita mo tausaga e fitu?

Fesili faaopoopo

  • Faitau le 1 Samuelu 18:1-30.

    E faapefea ona faaatagia e le alofa lē mavae o Ionatana mo Tavita, le alofa faamaoni i le va o “isi mamoe” ma le “lafu mamoe itiiti”? (1 Samu. 18:1; Ioa. 10:16; Luka 12:32; Saka. 8:23)

    Pe a fua i le tulaga masani o mea, sa tatau ona avea Ionatana ma suli o Saulo, ae na faapefea ona faaalia e le 1 Samuelu 18:4 uiga mata‘ina o Ionatana i le gaua‘i atu i lē na filifilia e fai ma tupu?

    E faapefea ona faaalia e le faaa‘oa‘oga a Saulo o le lotoleaga e mafai ona i‘u ai i le faia o se agasala matuiā, ma o le ā le lapata‘iga mo i tatou? (1 Samu. 18:7-9, 25; Iako. 3:14-16)

  • Faitau le 1 Samuelu 19:1-17.

    Na faapefea ona tuu e Ionatana lona lava ola i se tulaga lamatia ina ua ia tautala atu i upu o loo faamauina i le 1 Samuelu 19:4, 5? (1 Samu. 19:1, 6)