Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 55: O se Tamaitiiti na Auauna i le Atua

Tala 55: O se Tamaitiiti na Auauna i le Atua

Pe E le o se tamaitiiti aulelei ea lenei? O lona igoa o Samuelu. Ma o le tamāloa lenā e tuu atu lona lima i luga o le ulu o Samuelu o le faitaulaga Sili a Isaraelu o Eli. O le tamā lenā o Samuelu o Elekana ma lona tinā o Hana o loo la aumaia Samuelu iā Eli.

O loo feiloa‘i Samuelu ma Eli le faitaulaga sili

E tusa na o le fā pe lima tausaga o Samuelu. Ae o le a nofo nei o ia i le fale fetafa‘i o Ieova faatasi ma Eli ma isi faitaulaga. Aiseā na tuuina atu ai e Elekana ma Hana Samuelu e auauna i le fale fetafa‘i o Ieova? Se‘i o tatou vaai i ai.

I ni nai tausaga muamua atu a o le‘i oo lenei mea, sa faanoanoa tele Hana. O le māfuaaga ona e leai sana pepe, ae sa ia mana‘o tele iai. I le isi aso a o asiasi atu Hana i le fale fetafa‘i o Ieova, sa ia tatalo ai: ‘Ieova e, aua e te faagaloina a‘u! Afai e te foa‘iina iā te au se tama, ou te tautō atu o le a ou avatua o ia e auauna iā te oe i lona olaga atoa.’

Sa tali mai Ieova i le tatalo a Hana, ma i ni masina mulimuli ane ai sa ia fanaua ai Samuelu. Na alofa tele Hana i lana tamaitiiti, ma na a‘oa‘oina o ia e uiga iā Ieova a o itiiti lava. Sa ia faapea atu i lana tane: ‘Afai e matua Samuelu ma ua le toe mana‘omia le susu, o le a ou avea loa o ia i le fale fetafa‘i e auauna ai iā Ieova i inā.’

O le mea lenā o loo faia e Hana ma Elekana i le ata. Ma talu ai sa lelei tele le a‘oa‘oina o Samuelu e ona matua, ua fiafia tele ai o ia e auauna iā Ieova i inei i le fale‘ie o Ieova. I tausaga ta‘itasi uma lava e ō mai ai Hana ma Elekana e tapua‘i i lenei fale‘ie faapitoa, ma asiasi i la lā tamaitiiti. Ma i tausaga ta‘itasi e aumaia ai e Hana se ofu fou sa ia faia mo Samuelu.

A o faagasolo pea tausaga sa auauna pea Samuelu i le fale fetafa‘i, ma sa alofagia o ia e Ieova ma tagata. Ae o atalii o Eli o Hofeni ma Fineaso, sa la faia ni mea leaga se tele ma taumafai ia aua le usiusita‘i isi tagata iā Ieova. Sa tatau ona aveesea i la‘ua e Eli mai le tofi o le faitaulaga, ae na te le‘i faia.

Sa le‘i faatagaina e Samuelu la‘itiiti mea leaga na tutupu i le fale fetafa‘i e taofia ai lana auaunaga iā Ieova. Peita‘i talu ai e to‘aitiiti tagata na alolofa moni iā Ieova sa umi ai le taimi e le‘i fetalai mai Ieova i se tagata ola. Ina ua fai sina matua o Samuelu o le mea lenei sa tupu:

Sa moe Samuelu i le fale fetafa‘i ae na fafagu o ia e se leo. Sa ia tali atu: ‘O au lenei.’ Sa tū o ia i luga ma tamo‘e iā Eli ma fai atu: ‘Sa e valaau mai iā te au, ma o au lenei.’

Peita‘i sa tali atu Eli: ‘Ou te le‘i valaau iā te oe; fo‘i ia i lou moega.’ Ona toe fo‘i lea o Samuelu i lona moega.

Ona sau fo‘i lea o le valaau lona lua: ‘Samuelu!’ Ona toe tamo‘e fo‘i lea o Samuelu iā Eli. ‘Sa e valaau ia te au, ma o au lenei,’ o lana tala lenā. Ae na tali atu Eli: ‘Ou te le‘i valaau iā te oe, lou atalii e. Toe taoto ia i lalo.’ Ona toe fo‘i atu lea o Samuelu i lona moega.

‘Samuelu!’ O le faatolu ai lea o valaau. Sa toe tamo‘e atu fo‘i Samuelu iā Eli. ‘O au lenei, auā sa e valaau moni mai iā te au,’ o ana upu ia. Ua iloa nei e Eli o Ieova lea sa valaau. Ona ia faapea atu lea: ‘Ia e toe fo‘i e taoto, ma afai e toe valaau atu o ia, ona e fai atu lea: “Fetalai mai ia, Ieova e, auā o loo faalogo atu lau auauna.”’

O le tala lenā sa faia e Samuelu ina ua toe valaau mai Ieova. Sa ta‘uina atu e Ieova iā Samuelu o le a ia faasalaina Eli ma ona atalii. Mulimuli ane, sa fasiotia Hofeni ma Fineaso i le taua ma Filisitia, ma ina ua faalogo iai Eli ona pa‘ū lea o ia ma gau lona ua ma oti ai. O lea na taunuu moni lava afioga a Ieova.

Na avea Samuelu ma faamasino mulimuli o Isaraelu. Ina ua toeaina o ia, sa fai atu tagata: ‘Ia e filifili se tupu e pule iā i matou.’ Sa le‘i mana‘o i ai Samuelu, auā o Ieova o lo latou tupu. Ae peita‘i sa tulei atu Ieova e faalogo i le mana‘oga o tagata.

1 Samuelu 1:1-28; 2:11-36; 4:16-18; 8:4-9.



Fesili

  • O ai le igoa o le tamaitiiti o loo i le ata, ma o ai isi tagata?
  • O le ā le tatalo a Hana i le isi aso a o asiasi atu i le fale fetafa‘i o Ieova, ma o le ā le auala na tali atu ai Ieova iā te ia?
  • E fia tausaga o Samuelu ina ua ave o ia i le fale fetafa‘i e auauna ai iā Ieova, ma o le ā e faia e lona tinā mo ia i tausaga ta‘itasi uma lava?
  • O ai igoa o atalii o Eli, ma na faape‘ī le la amio?
  • Na faapefea ona valaau atu Ieova iā Samuelu, ma o le ā le fe‘au na ia avatu iā Samuelu?
  • Ina ua matua Samuelu na avea o ia ma ā, ma o le ā na tupu ina ua toeaina o ia?

Fesili faaopoopo

  • Faitau le 1 Samuelu 1:1-28.

    O le ā le faaa‘oa‘oga lelei ua faia e Elekana mo ulu o aiga i le taulamua i le tapua‘iga moni? (1 Samu. 1:3, 21; Mata. 6:33; Fili. 1:10)

    O le ā se lesona tatou te a‘oa‘oina mai le faaa‘oa‘oga a Hana i le auala e feagai ai ma se faafitauli tugā? (1 Samu. 1:10, 11; Sala. 55:22; Roma 12:12)

  • Faitau le 1 Samuelu 2:11-36.

    Na faapefea ona faatāua e Eli ona atalii e sili atu na i lo Ieova, ma e faapefea ona avea lenā mea ma lapata‘iga mo i tatou? (1 Samu. 2:22-24, 27, 29; Teu. 21:18-21; Mata. 10:36, 37)

  • Faitau le 1 Samuelu 4:16-18.

    O ā ni tala leaga e fā na maua mai i le taua, ma o le ā lona aafiaga iā Eli?

  • Faitau le 1 Samuelu 8:4-9.

    Na faapefea ona matuā faatigā e Isaraelu iā Ieova, ma e faapefea ona tatou lagolagoina faamaoni Lona Malo i aso nei? (1 Samu. 8:5, 7; Ioa. 17:16; Iako. 4:4)

Faitau Atili

Sa Faia Pea e Samuelu le Mea Saʻo

E faapefea ona tatou faaaʻoaʻo iā Samuelu ma faia le mea saʻo e tusa pe e faia e isi tagata mea leaga?

‘Ua Faaauau Ona Tuputupu A‘e Samuelu i Luma o Ieova’

O le ā sa mata‘ina ai le tuputupu a‘e o Samuelu? O le ā sa fesoasoani ina ia tuputupu a‘e ai lona faatuatua a o iai i le fale‘ie paia?