Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 53: Tautoga a Iefata

Tala 53: Tautoga a Iefata
Le afafine o Iefata

PE SA e faia se tautoga a e te‘i ua faigatā ona faataunuu? Sa faia faapea e le tamāloa lenā, ma o le māfuaaga lenā ua ia faanoanoa ai. O ia o se faamasino loto toa o Isaraelu e igoa iā Iefata.

Sa ola Iefata i le taimi na le toe tapua‘i ai Isaraelu iā Ieova. Ua latou toe faia fo‘i mea e leaga. O lea na faataga ai e Ieova tagata Amoni ia faatigāina i latou. Ona alalaga atu ai lea o Isaraelu iā Ieova: ‘Ua matou agasala iā te oe. Faamolemole, faaola mai iā i matou!’

Iefata ma ana tamāloloa

Ua salamo tagata i mea sesē sa latou faia. Ua faaalia lo latou salamō i le toe tapua‘i atu iā Ieova. Ma o lea sa toe fesoasoani atu fo‘i iai Ieova.

Ua filifilia e tagata Iefata ia tau faasaga i tagata leaga o Amoni. Sa mana‘omia tele e Iefata le fesoasoani a Ieova. O lea sa ia tautō ai: ‘Afai e te tuuina mai iā te au le manumalo i luga o tagata Amoni, o le tagata muamua e sau mai i lo‘u fale e faafeiloa‘i mai iā te a‘u pe a ou fo‘i mai ma le manumalo, ou te avatua lea mo oe.’

Sa talia e Ieova le tautoga a Iefata, ma sa ia fesoasoani ai iā te ia ia malo i le taua. Ina ua toe fo‘i mai Iefata i lona fale, ona faafeiloa‘i atu ai lea o ia e lona afafine. E na o le pau lava lenā o lana tamaitiiti. ‘Aue, o lou afafine! O le faanoanoaga tele ua e aumaia iā te au. Ae ua uma ona ou faia se tautoga iā Ieova, ma ou te lē mafai ona toe faafo‘isia mai.’

Ina ua iloa e le afafine o Iefata lana tautoga, sa faanoanoa o ia muamua. Auā o lona uiga o le a ia tuua lona tamā ma ana uō. Ae o le a faaalu e ia lona olaga atoa e auauna atu ai iā Ieova i lona fale fetafa‘i i Sailo. O lea sa ia fai atu ai i lona tamā: ‘Afai ua e faia se tautoga iā Ieova, e tatau ona e tausia.’

Ona alu ai lea o le afafine o Iefata i Sailo, ma sa faaaluina ai e ia lona olaga atoa e auauna atu ai iā Ieova i lona fale fetafa‘i. E fā aso mai tausaga ta‘itasi e ō atu ai fafine o Isaraelu e asiasi iā te ia ma latou fiafia faatasi ai. Sa alolofa tagata i le afafine o Iefata auā o ia o se auauna lelei tele a Ieova.

Faamasino 10:6-18; 11:1-40.



Fesili

  • O ai Iefata, ma o le ā le taimi na ola ai?
  • O le ā na tautō ai Iefata iā Ieova?
  • Aiseā na faanoanoa ai Iefata ina ua toe fo‘i i lona fale ina ua manumalo i tagata Amoni?
  • O le ā le tala a le afafine o Iefata ina ua ia iloaina le tautoga a lona tamā?
  • Aiseā e alolofa ai tagata i le afafine o Iefata?

Fesili faaopoopo

  • Faitau le Faamasino 10:6-18.

    O le ā le lapata‘iga e ao ona tatou utagiaina mai le talaaga o le lē faamaoni o Isaraelu iā Ieova? (Faama. 10:6, 15, 16; Roma 15:4; Faaa. 2:10)

  • Faitau le Faamasino 11:1-11, 29-40.

    E faapefea ona tatou iloa o le ofoina atu e Iefata o lona afafine e fai ma “taulaga mū,” e le‘i uiga faapea na faaaogā moni lava lona afafine e fai ai le taulaga mū? (Faama. 11:31; Levi. 16:24; Teu. 18:10, 12)

    O le ā le auala na ofo atu ai e Iefata lona afafine e fai ma taulaga?

    O le ā tatou te a‘oa‘oina mai le manatu o Iefata e faatatau i lana tautoga iā Ieova? (Faama. 11:35, 39; Fai. 5:4, 5; Mata. 16:24)

    E faapefea ona avea le afafine o Iefata o se faaa‘oa‘oga lelei mo Kerisiano talavou i le auai i le auaunaga faataimi atoa? (Faama. 11:36; Mata. 6:33; Fili. 3:8)