Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 51: Ruta ma Naomi

Tala 51: Ruta ma Naomi

I TOTONU o le Tusi Paia o le a e mauaina ai se tusi e igoa o Ruta. O le tala i se aiga na ola i le vaitaimi o faamasino. O Ruta o se fafine talavou mai Moapi; e lē o ia o se tagata o le nuu o le Atua o Isaraelu. Ae ina ua faalogo Ruta e uiga i le Atua moni o Ieova, sa oo ina alofa tele iai o ia. O Naomi o se fafine matua lea sa fesoasoani iā Ruta e a‘oa‘o e uiga iā Ieova.

O Naomi o se fafine Isaraelu. Sa ō atu o ia ma lona to‘alua ma la fanau tama e to‘alua i Moapi i le vaitaimi sa oge ai Isaraelu. Ona oti ai lea o le to‘alua o Naomi i le tasi aso. Ona faaipoipo lea o lana fanau tama iā Ruta ma Orepa. Ae ina ua mavae le 10 tausaga, ona feoti lea o le fanau tama e to‘alua a Naomi. Sa faanoanoa tele nei teine e to‘alua ma Naomi. O le ā nei le mea o le a fai e Naomi?

I le tasi aso na mana‘o ai Naomi e fai se malaga umi i ona lava tagata. Na manana‘o Ruta ma Orepa e nonofo ma ia, o lea sa latou ō ai. Ae ina ua mavae sina savaliga i le ala, ona faliu atu lea o Naomi i teine ma faapea atu: ‘Ia oulua toe fo‘i atu ia ma nonofo ma o oulua tinā.’

Ona sogi faatofā atu lea o Naomi iā i la‘ua. Ona la fetagisi lea, auā e alolofa tele i la‘ua iā Naomi. Sa la faapea mai: ‘E leai! Tatou te ō faatasi ma oe i ou tagata.’ Ae sa tali atu Naomi: ‘Toe fo‘i atu ia si a‘u fanau e. O le a sili ona lelei ia o i o oulua aiga.’ Ona toe fo‘i ai lea o Orepa. Ae sa le‘i alu Ruta.

Sa faapea atu Naomi: ‘Ua alu Orepa. Alu atu ia e ō ma ia. Ae sa tali atu Ruta: ‘Aua e te taumafai e faaoso a‘u ia ou tuua oe! Tuu mai ia a‘u ta te ō. O le mea e te alu iai ou te alu fo‘i iai, o le mea e te nofo ai ou te nofo ai fo‘i. O ou tagata o o‘u tagata ia, ma o lou Atua o lo‘u Atua fo‘i lea. O le mea e te oti ai ou te oti ai, ma o i ina o le a tanumia ai a‘u.’ Ona lē toe taumafai lea o Naomi e toe faafo‘i iā te ia.

Mulimuli ane ona oo lea o i la‘ua i Isaraelu. O i ina sa nonofo ai loa ma ola ai. Na amata ai loa e Ruta ona galue i le fanua, auā o le taimi lea mo le aoaoina o karite. O le tamāloa e igoa iā Poasa sa faatagaina o ia na te aoaoina karite mai i lona fanua. Pe e te iloaina le tinā o Poasa? O Raava, mai le aai o Ieriko.

I le tasi aso, sa faapea atu ai Poasa iā Ruta: ‘Ua ou faalogo i le tala atoa iā te oe ma lou agalelei iā Naomi. Ua ou iloaina ua e tuua lou tamā ma lou tinā ma lou nuu moni ma ua e ola faatasi ma tagata e te le‘i iloaina lava i latou. Talosia ia agalelei atu Ieova iā te oe!’

Sa tali atu Ruta: ‘Ua e alofa tele mai iā te au, le alii e. Ua e faafiafia mai fo‘i iā te au e ala i mea lelei uma ua e tautala mai ai.’ Ua mana‘o tele Poasa iā Ruta, ma ua faaipoipo nei i la‘ua. Sa fiafia tele Naomi! Peita‘i sa sili atu lona fiafia ina ua fanau mai le tama muamua a Ruta ma Poasa, o Opeta. Mulimuli ane ona avea ai lea o Opeta ma tamā o le tamā o Tavita, o lē o le a tatou talatalanoa mulimuli ane iai.

Ruta ma Naomi

Tusi o le Tusi Paia o Ruta.



Fesili

  • Aiseā na nofo ai Naomi i le nuu o Moapi?
  • O ai Ruta ma Orepa?
  • Na faapefea ona tali atu Ruta ma Orepa ina ua fai atu Naomi e toe fo‘i i o la nuu?
  • O ai Poasa, ma na faapefea ona ia fesoasoani iā Ruta ma Naomi?
  • O ai le igoa o le tama a Ruta ma Poasa, ma aiseā e ao ai ona tatou manatuaina o ia?

Fesili faaopoopo

  • Faitau le Ruta 1:1-17.

    O ā faaupuga matagofie o le alofa faamaoni na ta‘ua e Ruta? (Ruta 1:16, 17)

    E faapefea ona faaatagia lelei e manatu o Ruta ia manatu o “isi mamoe” aga‘i i le vaega faauuina i le lalolagi i aso nei? (Ioa. 10:16; Saka. 8:23)

  • Faitau le Ruta 2:1-23.

    Ua faapefea ona saunia e Ruta se faaa‘oa‘oga lelei mo fafine talavou i aso nei? (Ruta 2:17, 18; Faata. 23:22; 31:15)

  • Faitau le Ruta 3:5-13.

    O le ā le manatu o Poasa i le lotomalie o Ruta e faaipoipo iā te ia na i lo se alii talavou?

    O le ā ua tatou a‘oa‘oina mai uiga o Ruta e faatatau i le alofa faamaoni? (Ruta 3:10; 1 Kori. 13:4, 5)

  • Faitau le Ruta 4:7-17.

    E faapefea i tane Kerisiano i aso nei ona pei o Poasa? (Ruta 4:9, 10; 1 Timo. 3:1, 12, 13; 5:8)