Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 48: O Kipeona Popoto

Tala 48: O Kipeona Popoto

O LE tele o aai i Kanana ua nonofo sauni nei e tau ma Isaraelu. Ua manatu e manumalo i latou. Ae peita‘i o tagata o le aai e latalata ane o Kipeona sa lē faapena lo latou manatu. Latou te lē manana‘o e tau ma le Atua auā o loo fesoasoani o ia iā Isaraelu. O lea, o le ā le mea sa faia e tagata Kipeona?

Sa latou faafoliga mai e mamao se mea o latou nonofo ai. O ni isi o tamāloloa ua fai ni ofu masaesae ma seevae malepelepe. Sa teu asini i ni taga masaesae, ma ave ni falaoa ua leva. Ona latou ō atu lea iā Iosua ma faapea atu: ‘Ua matou o mai i se nuu mamao lava, talu ai ua matou faalogo i lo outou Atua silisili o Ieova. Sa matou faalogo i mea uma lava na ia faia iā te outou i Aikupito. O lea, sa poloa‘i mai ai lo matou ta‘ita‘i e sauni ni mea‘ai mo le malaga, ma ia fai atu iā te oe: “O matou o a outou auauna. Ia e tautō mai nei o le a outou lē sii taua mai iā i matou.” Ua masaesae o matou ofu i le mamao o le malaga ma ua magumagu a matou falaoa.’

Sa talitonu Iosua ma isi ta‘ita‘i i tagata Kipeona. O lea sa latou faia se tautoga latou te lē tau ma i latou. Peita‘i na mavae aso e tolu ona latou iloa lea o loo nonofo latalata atu tagata Kipeona.

‘O le ā le mea na outou fai mai ai e mamao le mea na outou o mai ai?’ o le fesili lea a Iosua iā i latou.

Ona tali atu ai lea o tagata Kipeona: ‘Ua ala ona matou faia talu ai sa ta‘uina mai iā te i matou ua tautō lo outou Atua o Ieova o le a ia avatua le laueleele o Kanana mo outou. O lea la ua matou fefefe ai ne‘i te‘i ua outou fasiotia i matou.’ Peita‘i sa tausia pea e Isaraelu la latou folafolaga, ma sa latou lē fasiotia tagata Kipeona. Ae sa fai i latou ma a latou auauna.

Ua ita tele le tupu o Ierusalema ona ua osi filemu Kipeona ma Isaraelu. Sa ia faapea atu i tupu e to‘afā: ‘Ia outou fesoasoani mai iā te a‘u e tau ma Kipeona.’ O le mea lenā sa fai e tupu e to‘alima. Pe sa popoto Kipeona e osia le filemu ma Isaraelu, ua māfua ai nei ona ō mai tupu e tau faasaga iā i latou? O le a tatou vaai i ai.

Iosua 9:1-27; 10:1-5.

Iosua ma tagata Kipeona


Fesili

  • Na faapefea ona eseese tagata Kipeona mai i tagata Kanana i aai lata ane?
  • E pei ona faaalia i le ata, o le ā ua faia e tagata Kipeona, ma aiseā?
  • O le ā le tautoga na faia e Iosua ma ta‘ita‘i Isaraelu i tagata Kipeona, ae o le ā na latou iloa ina ua mavae aso e tolu?
  • O le ā ua tupu ina ua faalogo tupu o isi aai ua osi filemu tagata Kipeona ma Isaraelu?

Fesili faaopoopo

  • Faitau le Iosua 9:1-27.

    Talu ai na faatonuina e Ieova le nuu o Isaraelu e “faaumatia i latou o ē nonofo uma i le nuu,” o ā uiga o Ieova ua faamatilatila i lona faasaoina o tagata Kipeona? (Iosua 9:22, 24; Mata. 9:13; Galu. 10:34, 35; 2 Pete. 3:9)

    E ala i le tausisia o le feagaiga na ia osia ma tagata Kipeona, ua faapefea ona faia e Iosua se faaa‘oa‘oga lelei mo Kerisiano i aso nei? (Iosua 9:18, 19; Mata. 5:37; Efe. 4:25)

  • Faitau le Iosua 10:1-5.

    Ua faapefea ona faaa‘oa‘o le motu o tagata e to‘atele i aso nei i tagata Kipeona, ma ua avea ai i latou ma taula‘iga mo le ā? (Iosua 10:4; Saka. 8:23; Mata. 25:35-40; Faaa. 12:17)