Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 47: O se Gaoi i Isaraelu

Tala 47: O se Gaoi i Isaraelu
O loo nanā e Akana mea na ia gaoia

VAAI i le mea lenā ua tanu e lenā tamāloa i lona fale‘ie! O se ofu manaia, ma se u‘amea auro ma fasi ario. Na ia aumaia mai le aai o Ieriko. Ae o le ā le mea sa tatau ona fai i mea o i Ieriko? Pe e te manatua?

Sa tatau ona faaumatia, ma o le auro ma ario sa tatau ona ave i le mea o iai le ‘oa i le fale fetafa‘i o Ieova. O lea la o nei tagata sa lē usiusita‘i i latou i le Atua. Ua latou gaoia ni mea a Ieova. O le igoa o le tamāloa o Akana. Ma o ē o faatasi ma ia o lona ‘auaiga. Se‘i tatou vaai le mea ua tupu.

Ina ua uma ona gaoia e Akana ia mea, sa aauina atu e Iosua ni tagata e tau ma tagata o le nuu o Ai. Ae sa fasia i latou i le taua. Sa fasiotia ni isi a o isi ua sosola. Ua faanoanoa ai tele Iosua. Sa ia faō i le eleele ma tatalo iā Ieova: ‘Aiseā ua e faataga ai lenei mea e oo iā i matou?’

Ona tali mai lea o Ieova: ‘Tū i luga! Ua agasala Isaraelu. Ua latou aveina mea sa tatau ona faaleaga po o ave fo‘i i le fale fetafa‘i. Ua latou gaoia se ofu manaia ma nanā. O le a ou lē faamanuia iā te oe se‘i vaganā ua e faaleagaina na mea ma lē na ia aveina.’ Na tulei atu Ieova o le a ia faaali atu iā Iosua lenei tagata leaga.

O lea sa faapotopoto loa e Iosua tagata uma, ma sa aumaia loa e Ieova le tagata leaga o Akana. Sa faapea mai Akana: ‘Ua ou agasala. Sa ou vaai i se ofu manaia, ma le u‘amea auro ma fasi ario. Sa ou mana‘o tele iai sa i‘u ina ou aveina ai. O le a tou mauaina o loo tanumia i totonu o lo‘u fale‘ie.’

Ina ua aumaia nei mea iā Iosua, sa ia fai atu loa iā Akana: ‘Aiseā ua e aumaia ai faalavelave iā i matou? O le a aumaia nei e Ieova se faalavelave i luga iā te oe!’ Ma sa fetogia loa i maa e tagata uma lava Akana ma lona aiga ia oti. Pe e lē faaalia ai ea i lenei mea e lē tatau ona tatou tago vale?

Mulimuli ane ona tau ai lea o Isaraelu ma Ai. Ma sa fesoasoani ai loa Ieova i ona tagata, ma manumalo ai i latou i le taua.

Iosua 7:1-26; 8:1-29.



Fesili

  • O ai le tamāloa o i le ata o loo tanuina ‘oa mai Ieriko, ma o ai o loo fesoasoani iā te ia?
  • Aiseā e matuiā ai le mea ua faia e Akana ma lona ‘auaiga?
  • O le ā le tali a Ieova ina ua fesili i ai Iosua pe aiseā ua faia‘ina ai Isaraelu i le taua i Ai?
  • Ina ua aumai Akana ma lona ‘auaiga iā Iosua, o le ā na fai iā i latou?
  • O le ā le lesona tāua tatou te a‘oa‘oina mai le faasalaga o Akana?

Fesili faaopoopo

  • Faitau le Iosua 7:1-26.

    O le ā ua faailoa mai e tatalo a Iosua e faatatau i le la faiā ma Lē na Foafoaina o ia? (Iosua 7:7-9; Sala. 119:145; 1 Ioa. 5:14)

    O le ā ua faaalia i le mea na tupu iā Akana, ma o le ā le lapata‘iga mo i tatou? (Iosua 7:11, 14, 15; Faata. 15:3; 1 Timo. 5:24; Epe. 4:13)

  • Faitau le Iosua 8:1-29.

    O le ā la tatou tiute tauave i le faapotopotoga Kerisiano i aso nei? (Iosua 7:13; Levi. 5:1; Faata. 28:13)