Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 45: Sopo‘ia le Vaitafe o Ioritana

Tala 45: Sopo‘ia le Vaitafe o Ioritana

VAAI! ua sopo‘iaina e Isaraelu le Vaitafe o Ioritana! Ae o fea o iai le suāvai? Auā o le tele o timuga e maligi i lenā vaitaimi o le tausaga, sa tumu le vaitafe i ni nai minute lava ua mavae atu. Ae ua mātūtū nei! Ma ua ui atu Isaraelu i le eleele mātūtū e pei ona iai i le Sami Ulaula! O fea ua alu uma i ai le vai? Se‘i o tatou vaai.

O loo sopo‘ia e Isaraelu le Vaitafe o Ioritana

Ina ua oo mai le taimi e sopo‘ia ai e Isaraelu le Vaitafe o Ioritana, ona tulei atu lea o Ieova iā Iosua e fai atu i tagata: ‘E tatau ona aveina e le au ositaulaga le atolaau o le feagaiga ma muamua atu iā i tatou. A papa‘i atu loa o latou vae i vai o le vaitafe, o le a lē toe tafe loa le vai.’

Ona amoina loa lea e le au ositaulaga le atolaau o le feagaiga, ma muamua atu i luma. Ina ua oo atu i le Ioritana, sa ō atu loa le au ositaulaga ma laasia le vai. O loo tafe malosi nei toe loloto. Ae ina ua papa‘i atu o latou vae i le vai, sa amata loa ona le toe tafe! O se vavega! Ua faato‘a e Ieova suāvai i le mea na tafe mai ai. Ma e le‘i umi lava ae lē toe iai loa ni vai i le vaitafe!

Ua ō atu i le ogatotonu o le vaitafe mātūtū le au ositaulaga o loo tauaveina le atolaau o le feagaiga. A o tutū i latou i ina, sa savavali atu uma lava Isaraelu i le isi itu o le Vaitafe o Ioritana i le eleele mātūtū.

Ina ua ō uma atu tagata i le isi itu, ona tulei atu lea o Ieova iā Iosua e fai atu i tamāloloa e toa 12 malolosi: ‘Ia ō atu i le vaitafe i le mea o tutū ai le au ositaulaga ma le atolaau o le feagaiga. Ia aumai ni maa e 12, ma fatufatu i le mea o le a outou api ai nanei. Ma, i le lumana‘i, pe a fesili atu a outou fanau po o le a le uiga o na maa, ona outou tali atu lea i ai sa pē le vai ina ua sopo‘ia e le atolaau a Ieova le Ioritana. E faamanatu ai lenei vavega!’ Sa faaputu fo‘i e Iosua maa e 12 i le mea lea sa tutū ai ositaulaga i le alitivai.

Iosua

Mulimuli ane, ona faapea atu lea o Iosua i le au ositaulaga o loo tauaveina le atolaau o le feagaiga: ‘Ō mai loa i luga.’ Ina ua latou faia, sa toe tafe loa le vai.

Iosua 3:1-17; 4:1-18.



Fesili

  • O le ā le vavega na faia e Ieova ina ia mafai ona sopo‘ia e tagata Isaraelu le vaitafe o Ioritana?
  • O le ā le gaoioiga o le faatuatua na tatau ona faia e tagata Isaraelu ina ia sopo‘ia ai le vaitafe o Ioritana?
  • Aiseā na tulei atu ai Ieova iā Iosua e aumai ni maa tetele e 12 mai le alitivai?
  • O le ā na tupu ina ua savavali ese atu ositaulaga nai le vaitafe o Ioritana?

Fesili faaopoopo

  • Faitau le Iosua 3:1-17.

    E pei ona faaalia i lenei tala, o le ā e mana‘omia ona tatou faia ina ia maua ai le fesoasoani ma le faamanuiaga a Ieova? (Iosua 3:13, 15; Faata. 3:5; Iako. 2:22, 26)

    O le ā le tulaga o le vaitafe o Ioritana i le taimi na sopo‘ia ai e tagata Isaraelu e ō atu i le Nuu Folafolaina, ma na faapefea ona viia ai le suafa o Ieova? (Iosua 3:15; 4:18; Sala. 66:5-7)

  • Faitau le Iosua 4:1-18.

    O le ā le fuafuaga na ala ai ona aumai maa e 12 mai le vaitafe o Ioritana ma faaputu i Kilikala? (Iosua 4:4-7)