Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 44: Faalafi e Raava Tagata Matamata

Tala 44: Faalafi e Raava Tagata Matamata

O NEI tamāloloa ua iai nei i se faalavelave. E tatau ona la‘ua ō ese, afai e leai o le a fasiotia i la‘ua. O ni tagata matamata la‘ua mai Isaraelu, ma o Raava lenā e fesoasoani atu iai. E nofo Raava i le fale lenā e i le pa o le aai o Ieriko.

Ua sauni nei Isaraelu e sopo‘ia le Vaitafe o le Ioritana ma oo atu ai i Kanana. Peita‘i sa auina muamua atu e Iosua ni tagata matamata se to‘alua. Sa ia faapea atu: ‘Ia ō e vaavaai le laueleele ma le aai o Ieriko.’

Raava ma tagata matamata e to‘alua mai Isaraelu

Ina ua oo atu nei tagata matamata i totonu o Ieriko, ona la ō atu lea i le fale o Raava. Ina ua faalogo iai le tupu o Ieriko, ona ia aauina atu lea o ni tagata iā Raava, ma poloa‘i atu iā te ia: ‘Aumai i fafo tagata na e i lou fale!’ Ae ua faalafi e Raava tagata matamata i luga o le fale. Ona ia faapea mai lea: ‘Sa ō mai ni tamāloloa i lo‘u fale, ae ou te lē iloa po o fea e ō mai ai. Sa la tuua i inei ina ua amata ona pogisa, a o le‘i tapunia le faitoto‘a o le aai. Afai tou te faanatinati nei, o le a outou maua i la‘ua!’ Ona ō atu ai loa lea o tagata ma tuliloa i la‘ua.

Ina ua latou ō ese, ona faavave atu lea o Raava i luga o le fale. ‘Ua ou iloa e tuuina atu e Ieova iā te outou lenei laueleele. Sa matou faalogo i le faamātūtūina o le Sami Ulaula ma le fasiotia o le tupu o Sekono ma Oko. Ua ou agalelei iā oulua, ia oulua tautō mai, faamolemole, o le a oulua agalelei mai fo‘i iā te au. Ia faaola lo‘u tamā ma lo‘u tinā, ma o‘u tuagane ma o‘u uso.’

Sa ta‘utino atu e nei tagata matamata o le a la faia, ae e tatau ona faia e Raava se mea. ‘Ia ave lenei maea mūmū ma nonoa i lou faamalama, ma ia faapotopoto uma mai ou aiga i totonu o lou fale faatasi ma oe. Ma pe a matou toe fo‘i uma mai e ave Ieriko, o le a matou iloa ai lenei maea i lou faamalama ma o le a lē fasiotia ai se tasi o i lou fale.’ Sa ta‘uina atu i a Iosua e nei tagata matamata mea uma na tutupu.

Iosua 2:1-24; Eperu 11:31.



Fesili

  • O fea e nofo ai Raava?
  • O ai tamāloloa e to‘alua o i le ata, ma o ā la mea o fai i Ieriko?
  • O le ā na poloa‘i atu ai le tupu o Ieriko e fai e Raava, ma o le ā le tali a Raava?
  • Na faapefea ona fesoasoani Raava i tamāloloa e to‘alua, ma o le ā na ia talosaga atu ai iā i la‘ua?
  • O le ā na ta‘utino atu e tagata matamata iā Raava?

Fesili faaopoopo

  • Faitau le Iosua 2:1-24.

    Na faapefea ona faataunuu le folafolaga a Ieova i le Esoto 23:27 ina ua faato‘ilaloina e Isaraelu ia Ieriko? (Iosua 2:9-11)

  • Faitau le Eperu 11:31.

    E faapefea ona faamatilatila e le faaa‘oa‘oga a Raava le tāua o le faatuatua? (Roma 1:17; Epe. 10:39; Iako. 2:25)

Faitau Atili

Na Talitonu Raava iā Ieova

Ia aʻoaʻoina le auala na faasaoina ai Raava ma lona aiga ina ua faaumatia Ieriko.