Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 43: Avea Iosua ma Ta‘ita‘i

Tala 43: Avea Iosua ma Ta‘ita‘i

NA MANA‘O Mose e ō atu i Kanana ma Isaraelu. Ona ia fesili atu lea: ‘Ia e tuu mai iā te au ia ou sopo‘ia le Vaitafe o le Ioritana, Ieova e, ma ou matamata i mea lelei i le laueleele.’ Ae na fetalai mai Ieova: ‘E leai! Aua e te toe fai mai i lenā mea!’ Pe e te iloa aiseā?

Talu ai ona o mea sa tupu ina ua tāina e Mose le papa. Manatua sa lē taulau ona la faapaiaina ma Arona ia Ieova. Sa la‘ua lē ta‘uina atu i tagata, o Ieova sa aumaia le vai mai le papa. O le māfuaaga lenā na fai atu ai Ieova la te lē oo i totonu o Kanana.

O lea, i ni nai masina talu ona mavae le oti o Arona, sa tulei ai Ieova iā Mose: ‘Ia ave Iosua, ma faatū i luma o Eleasaro le faitaulaga ma tagata. Ma i luma o tagata uma lava, ia ta‘u atu iai o Iosua le ta‘ita‘i fou.’ Sa faia e Mose mea uma, e pei ona e vaai atu iai i le ata.

O loo ta‘u atu e Mose ua avea Iosua ma ta‘ita‘i

Ona fai atu lea o Ieova iā Iosua: ‘Ia e loto toa, ma aua le fefe. O le a e ta‘ita‘iina Isaraelu i le atunuu o Kanana sa ou tautō ai mo i latou, ma o le a ou iai pea ma oe.’

Mulimuli ane sa tulei Ieova iā Mose e alu a‘e i le tumutumu o le Mauga o Nepo i Moapi. Ua mafai ai e Mose ona vaavaai atu i le Vaitafe o Ioritana ma iloa atu ai le atunuu matagofie o Kanana. Ona tulei atu lea o Ieova: ‘O le atunuu lenei na ou tautō ai e avatu mo le fanau a Aperaamo, Isaako ma Iakopo. Ua tuuina atu e te vaai i ai, ae e te lē alu atu i ai.’

O i inā i le tumutumu o le Mauga o Nepo na oti ai Mose. Sa 120 tausaga lona matua. Na malosi pea o ia, ma sa lelei fo‘i lana vaai. Ua faanoanoa tele ma fetagisi tagata talu ai ua oti Mose. Ae ua fiafia fo‘i e fai Iosua ma o latou ta‘ita‘i fou.

Numera 27:12-23; Teuteronome 3:23-29; 31:1-8,14-23; 32:45-52; 34:1-12.



Fesili

  • O ai tamāloloa e to‘alua o loo tutū faatasi ma Mose i le ata?
  • O le ā na fai atu ai Ieova iā Iosua?
  • Aiseā na alu a‘e ai Mose i le tumutumu o le Mauga o Nepo, ma o le ā na tulei atu ai Ieova iā te ia?
  • E fia tausaga o Mose ina ua oti o ia?
  • Aiseā ua faanoanoa ai tagata, ae o le ā le māfuaaga ua fiafia ai?

Fesili faaopoopo

  • Faitau le Numera 27:12-23.

    O le ā le tofiga tāua na tuu atu e Ieova iā Iosua, ma ua faapefea ona faaalia i aso nei le tausiga a Ieova i Ona tagata? (Nu. 27:15-19; Galu. 20:28; Epe. 13:7)

  • Faitau le Teuteronome 3:23-29.

    Aiseā e le‘i faataga ai e Ieova ia Mose ma Arona e sopo atu i le nuu folafolaina, ma o le ā le lesona tatou te a‘oa‘oina mai ai? (Teu. 3:25-27; Nu. 20:12, 13)

  • Faitau le Teuteronome 31:1-8, 14-23.

    Na faapefea ona faaalia i upu faamavae a Mose iā Isaraelu na ia taliaina ma le lotomaulalo le a‘oa‘iga a Ieova? (Teu. 31:6-8, 23)

  • Faitau le Teuteronome 32:45-52.

    E ao faapefea ona aafia o tatou olaga i le Afioga a le Atua? (Teu. 32:47; Levi. 18:5; Epe. 4:12)

  • Faitau le Teuteronome 34:1-12.

    E ui lava e le‘i vaaitino Mose iā Ieova, ae o le ā ua faaalia mai e le Teuteronome 34:10 e faatatau i le la faiā ma Ieova? (Eso. 33:11, 20; Nu. 12:8)