Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 41: O le Gata Apamemea

Tala 41: O le Gata Apamemea
Mose ma le gata apamemea

PE E foliga mai ea lenā mea o se gata moni o tavi‘ovi‘o i se pou? E leai. O le gata lenā sa fausiaina i apamemea. Na fai atu Ieova iā Mose ia tuu i luga o le pou ia tilotilo iai tagata ma feola ai. Ae o isi gata o loo i le eleele o gata moni. Sa latou ūina tagata ma ua mama‘i ai. Pe e te iloa ea aiseā?

Talu ai sa tautala faasagatau tagata i le Atua ma Mose. Sa latou faitio faapea: ‘Aiseā ua e aumaia ai i matou ia oti i le vaomatua? E leai ni vai ma ni mea‘ai i inei. Ma matou te lē toe mafai ona aaiina nei manai.’

Ae peita‘i o le manai o se mea‘ai lelei. Na tuuina faavavega iai e Ieova mo i latou faapena fo‘i ma ni vai. Peita‘i sa lē faafetai tagata i le auala na tausia ai e le Atua i latou. O lea na aauina mai ai e Ieova gata oona ia faasala iā Isaraelu. Na ūina latou e gata, ma o le to‘atele o i latou na feoti ai.

Ua ūina e gata tagata Isaraelu

Mulimuli ane, ona ō mai lea o tagata i a Mose ma faapea mai: ‘Ua matou agasala, auā ua matou tautatala faasaga iā Ieova ma oe. Ia tatalo nei iā Ieova ina ia aveese nei gata mai i inei.’

O lea na tatalo ai loa Mose mo tagata. Ma sa ta‘u atu e Ieova iā Mose ia fai se gata apamemea. Sa ia fai atu e tuu i luga o se pou, ma so o se tasi ua ū e se gata ia tilotilo i le gata apamemea ma toe malosi ai.

E iai se lesona tatou te a‘oa‘oina mai i lenei mea. O i tatou uma lava, ua ūina e gata e pei o Isaraelu. Ua iai uma i tatou i se tulaga oti. Se‘i e vaavaai solo o le a e iloa ai tagata ua matutua, mama‘i ma oti. Ua māfua lenei mea ona o Atamu ma Eva ma ua la liliu ese mai iā Ieova, ma o i tatou uma lava o a la‘ua fanau. Ae peita‘i ua faia e Ieova se ala tatou te ola ai e faavavau.

Ua auina mai e Ieova lona atalii, o Iesu Keriso, i le lalolagi. Na tautau Iesu i se laau, talu ai sa to‘atele tagata na manatu e leaga o ia. Peita‘i na auina mai e Ieova Iesu e faasaoina i tatou. Afai tatou te vaavaai iā te ia, afai tatou te mulimuli iā te ia, ona maua ai lea e i tatou le ola e faavavau.

Numera 21:4-9; Ioane 3:14, 15



Fesili

  • Vaai i le ata, o le ā o tavi‘ovi‘o i le pou, ma aiseā na fai ai Ieova i a Mose e tuu i luga o le pou?
  • Na faapefea ona faaalia e tagata lo latou lē faafetai i mea uma ua faia e le Atua mo i latou?
  • O le ā na fai atu ai tagata iā Mose e fai ina ua aauina mai e Ieova gata oona e faasala ai i latou?
  • Aiseā na tulei ai Ieova iā Mose e fai se gata apamemea?
  • O le ā le lesona tatou te a‘oa‘oina mai lenei tala?

Fesili faaopoopo

  • Faitau le Numera 21:4-9.

    O le ā le lapata‘iga tatou te maua mai i faitioga a tagata Isaraelu i sauniuniga a Ieova? (Nu. 21:5, 6; Roma 2:4)

    I senituri mulimuli ane, na faapefea ona faaaogā e tagata Isaraelu le gata apamemea, ma o le ā le gaoioiga na faia e le tupu o Esekia? (Nu. 21:9; 2 Tu. 18:1-4)

  • Faitau le Ioane 3:14, 15.

    E faapefea ona faaatagia e le gata apamemea i luga o le pou le faasatauroina o Iesu Keriso? (Kala. 3:13; 1 Pete. 2:24)