Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 38: Tagata Matamata e 12

Tala 38: Tagata Matamata e 12
O loo amoina e tagata matamata Isaraelu ni fualaau ‘aina

VAAI atu i fualaau o loo amo e na tamāloloa. Sei vaai i le lapo‘a o lenā taufuifui vine. E mana‘omia ni tagata e to‘alua la te amoina i le amo. Ma vaai atu i mati ma rimoni. O fea sa aumai ai na fualaau aina mananaia? E mai le atunuu o Kanana. Manatua, o Kanana sa nonofo ai Aperaamo, Isaako ma Iakopo. Ae talu ai ona o le oge i ina, sa ō atu loa Iakopo ma lona aiga i Aikupito. E tusa ma le 216 tausaga mulimuli ane ai, ona ta‘ita‘iina lea e Mose Isaraelu e toe fo‘i i Kanana. Ua oo atu nei i latou i le nofoaga e igoa o Katesa.

Sa mau tagata leaga i le atunuu o Kanana. O lea na aauina atu e Mose ni tagata matamata e 12 ma fai atu i ai: ‘Ia su‘e mai pe to‘afia ē o nonofo i ina, ma pe malolosi fo‘i i latou. Sa‘ili pe lelei lona eleele mo mea totō. Ma ia mautinoa ia outou aumaia nisi o ona fua.’

Ina ua fo‘i mai tagata matamata i Katesa, sa latou fai atu iā Mose: ‘O se atunuu manaia tele.’ Sa faamaonia i fua na faaali iā Mose. Ae peita‘i o tagata matamata e toa 10 sa latou fai atu. ‘O tagata o loo mau ai e ese le malolosi ma toe lapopo‘a. O le a fasiotia i tatou pe a tatou taumafai e faoa le atunuu.’

Sa fefefe Isaraelu ina ua faalogo atu i ai. ‘E sili pe ana matou feoti i Aikupito pe o i inei fo‘i i le vaomatua,’ o a latou upu ia. ‘O le a fasiotia i matou i le taua, ma pu‘eina a matou avā ma fanau. Sei o tatou toe filifili so tatou ta‘ita‘i fou e sui iā Mose, ma tatou toe fo‘i i Aikupito!’

Ae sa faatuatua tagata matamata e to‘alua iā Ieova, ma taumafai e faafilemu tagata. O la igoa o Iosua ma Kalepo. Sa la‘ua faapea mai: ‘Aua tou te fefefe. O loo faatasi mai Ieova. O le a faigofie ona maua le atunuu.’ Ae sa le‘i faalogo tagata. Sa manana‘o fo‘i e fasioti iā Iosua ma Kalepo.

Sa ita tele Ieova i lenā mea, ma fai atu iā Mose: ‘E leai se isi mai le 20 tausaga aga‘i i luga o le a oo atu i le atunuu o Kanana. Sa latou vaai i vavega na ou faia i Aikupito ma i le vaomatua, ae latou te lē talitonu mai lava iā te au. O le a latou taamilomilo i le vaomatua mo le 40 tausaga se‘ia oo ina oti le toe tagata. Na o Iosua lava ma Kalepo e oo atu i le laueleele o Kanana.’

Numera 13:1-33; 14:1-38.



Fesili

  • O le ā e te mātauina i taufuifui vine o loo i le ata, ma o fea na aumai ai?
  • Aiseā na aauina atu ai e Mose ni tagata matamata e 12 i le nuu o Kanana?
  • O le ā le tala a tagata matamata e to‘asefulu na fai iā Mose ina ua toe fo‘i ane?
  • E faapefea ona faaalia e tagata matamata e to‘alua lo la faatuatua iā Ieova, ma o ai o la igoa?
  • Aiseā sa ita tele ai Ieova, ma o le ā na ia fai atu ai iā Mose?

Fesili faaopoopo

  • Faitau le Numera 13:1-33.

    O ai na filifilia e asiasi i le nuu, ma o le ā le avanoa matagofie na latou mauaina? (Nu. 13:2, 3, 18-20)

    Aiseā na eseese ai manatu o Iosua ma Kalepo mai isi tagata asiasi, ma o le ā tatou te a‘oa‘oina mai ai? (Nu. 13:28-30; Mata. 17:20; 2 Kori. 5:7)

  • Faitau le Numera 14:1-38.

    O le ā le lapata‘iga e ao ona tatou utagiaina i le muimui faasaga i ē o fai ma sui o Ieova i le lalolagi? (Nu. 14:2, 3, 27; Mata. 25:40, 45; 1 Kori. 10:10)

    E faapefea ona faaalia e le Numera 14:24 le naunau alofa mai o Ieova i ana auauna ta‘ito‘atasi? (1 Tu. 19:18; Faata. 15:3)