Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 37: Fale‘ie mo le Tapua‘iga

Tala 37: Fale‘ie mo le Tapua‘iga

PE E te iloa o le ā lenei fale? O se fale‘ie faapitoa e tapua‘i ai iā Ieova. E ta‘ua o le fale fetafa‘i. Sa māe‘a ona faia e tagata ina ua mavae le tausaga talu ona latou tuua Aikupito. Pe o le manatu o ai na ala ai ona fausiaina?

Le fale fetafa‘i

O le manatu o Ieova. A o iai Mose i le mauga o Sinai, sa ta‘u atu e Ieova iā te ia pe faapefea ona fai le fale‘ie. Sa faia ina ia faigofie ona toe tuueseeseina. I lenā auala o le a mafai ai ona feavea‘i ona vaega i se isi nofoaga, ona toe faapipii fo‘i lea. O lea a o femalagaa‘i Isaraelu i le vaomatua, sa latou tauaveina lava le fale‘ie.

Afai e te vaai i totonu o le tama‘i potu o i le pito o le fale‘ie, o le a e iloa ai se pusa. E ta‘ua o le atolaau o le feagaiga. O loo i ai ni agelu se to‘alua po o kerupi na faia i auro, e ta‘itasi i le itu. Sa toe tusia e Ieova Tulafono e Sefulu i papa maa e lua, ona ua ta‘ei e Mose maa muamua. Sa tuuina maa i totonu o le atolaau o le feagaiga. Faapena fo‘i ma se fagu manai. Pe e te manatua o le ā fo‘i le manai?

O le uso o Mose o Arona sa tofia e Ieova e fai ma ositaulaga sili. Na ia ta‘ita‘iina tagata e tapua‘i iā Ieova. O ona atalii fo‘i o ni ositaulaga.

Sei vaai atu nei i le potu lapo‘a o le fale‘ie. E faaluaina lona telē na i lo le tama‘i potu. Pe o e iloa atu le pusa o loo alu a‘e ai le asu? O le fata faitaulaga lenā e faamū ai e ositaulaga mea manogi. E iai ma le tuugalamepa o iai lamepa e fitu. Ma o le laulau le mea lona tolu o i le potu. O loo tuu ai ni papa falaoa e 12.

I le lotoā o le fale fetafa‘i o loo iai se tanoa telē, e tumu i vai. E faaaogā e fulufulu ai ositaulaga. O loo iai fo‘i le fata faitaulaga lapo‘a e susunu ai manu mamate mo taulaga iā Ieova. O le fale‘ie e tutonu lava i le ogatotonu o le togālauapi, ma e si‘osi‘omia i fale‘ie o tagata Isaraelu.

Esoto 25:8-40; 26:1-37; 27:1-8; 28:1; 30:1-10, 17-21; 34:1, 2; Eperu 9:1-5.



Fesili

  • O le ā le ta‘u o le fale o loo i le ata, ma o le ā na faaaogā i ai?
  • Aiseā na fai atu ai Ieova iā Mose e faia le fale‘ie ina ia faigofie ona toe tuueseeseina?
  • O le ā le pusa o loo i le tama‘i potu o i le pito o le fale‘ie, ma o le ā o loo i totonu o le pusa?
  • O ai sa tofia e Ieova e fai ma ositaulaga sili, ma o le ā e faia e le ositaulaga sili?
  • Ia ta‘u mai mea e tolu o i totonu o le potu lapo‘a o le fale‘ie.
  • O ā mea e lua o i totonu o le lotoa o le fale fetafa‘i, ma sa faapefea ona faaaogāina ia mea?

Fesili faaopoopo

  • Faitau le Esoto 25:8-40; 26:1-37; 27:1-8; ma le 28:1.

    O le ā e faaatagia e kerupi “i luga o le atolaau o le tulafono”? (Eso. 25:20, 22; Nu. 7:89; 2 Tu. 19:15)

  • Faitau le Esoto 30:1-10, 17-21; 34:1, 2; ma le Eperu 9:1-5.

    Aiseā na faamamafa ai e Ieova le tāua o le tausisia o le mamā faaletino i ositaulaga na auauna i le fale fetafa‘i, ma e ao faapefea ona aafia ai i tatou i aso nei? (Eso. 30:18-21; 40:30, 31; Epe. 10:22)

    Na faapefea ona faaalia e le aposetolo o Paulo, ua lē toe mana‘omia le fale fetafa‘i ma le feagaiga o le Tulafono i le vaitaimi na tusi ai lana tusi i Kerisiano i Eperu? (Epe. 9:1, 9; 10:1)