Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 35: Tuuina Atu e Ieova Ana Tulafono

Tala 35: Tuuina Atu e Ieova Ana Tulafono

E TUSA ma le lua masina ua mavae talu ona latou ō ese mai Aikupito, ona taunuu atu ai lea o Isaraelu i le Mauga o Sinai, po o Horepa. O i ina fo‘i sa fetalai mai ai Ieova iā Mose mai le laau mumū. Sa nonofo ai loa tagata i ina mo sina vaitaimi.

A o faatalitali tagata i lalo, sa alu atu Mose i luga o le mauga. O i ina na fetalai ai Ieova iā Mose e mana‘o ia usiusita‘i atu Isaraelu iā te ia ma fai i latou ma ona tagata faapitoa. Ina ua sau Mose i lalo, sa ia ta‘u atu iā Isaraelu mea na tulei mai ai Ieova. Sa fia usiusita‘i tagata, auā sa fia avea i latou ma tagata o Ieova.

Sa faia e Ieova se asu i le tumutumu o le mauga, ma faapā se faititili leo tele. Sa ia fetalai atu fo‘i i tagata: ‘O a‘u o Ieova lou Atua o le na aumaia outou mai Aikupito.’ Ona ia poloa‘i mai lea: ‘Aua tou te tapua‘i atu i se isi lava atua tau lava o a‘u.’

Papa maa e lua

Ona toe avatu lea e le Atua isi tulafono e iva, iā Isaraelu. Sa fefefe tele tagata, ma fai atu i a Mose: ‘Ia e tautala mai, auā matou te fefefe pe a fetalai mai le Atua ne‘i matou oti.’

Mulimuli ane sa toe tulei Ieova iā Mose: ‘Ia e sau iā te a‘u i luga o lenei mauga. Ou te avatu iā te oe ni papa maa se lua ua ou tusia ai ni tulafono ou te mana‘o e tausia e tagata.’ E 40 ao ma pō sa iai Mose i le mauga.

E tele ni tulafono a le Atua mo ona tagata. Sa avatu e le Atua papa maa e lua iā Mose. Sa tusia lava e le Atua ia tulafono e 10 sa ia tulei atu ai i tagata. Ua faaigoaina o Tulafono e Sefulu.

Mose i le Mauga o Sinai

O Tulafono e Sefulu o ni tulafono tāua. Faapena fo‘i ma isi tulafono e tele. O le tasi o ia tulafono e faapea: ‘Ia e alofa atu iā Ieova lou Atua ma lou loto atoa, lou manatu atoa, lou agaga atoa ma lou malosi atoa.’ Ma o le isi: ‘Ia e alofa atu i lou tuaoi e pei lava o oe iā te oe.’ O Iesu Keriso, sa ia faapea mai o tulafono sili na e lua sa tuuina atu e Ieova i ona tagata o Isaraelu. O le a tatou a‘oa‘oina ni mea se tele e uiga i le Alo o le Atua ma ana a‘oa‘oga mulimuli ane ai.

Esoto 19:1-25; 20:1-21; 24:12-18; 31:18; Teuteronome 6:4-6; Levitiko 19:18; Mataio 22:36-40.



Fesili

  • O fea na nonofo ai tagata Isaraelu pe tusa ma le lua masina talu ona ō ese mai Aikupito?
  • O le ā na fetalai i ai Ieova e mana‘o e faia e tagata, ma o le ā la latou tali?
  • Aiseā na avatu ai e Ieova iā Mose ni papa maa se lua?
  • E ese mai i Tulafono e Sefulu, o ā isi tulafono na avatu e Ieova iā Isaraelu?
  • O ā tulafono sili e lua na fetalai iai Iesu Keriso?

Fesili faaopoopo

  • Faitau le Esoto 19:1-25; 20:1-21; 24:12-18; ma le 31:18.

    E faapefea i upu o i le Esoto 19:8 ona fesoasoani iā i tatou ia malamalama i mea e aofia ai i le tuuina atu faa-Kerisiano? (Mata. 16:24; 1 Pete. 4:1-3)

  • Faitau le Teuteronome 6:4-6; Levitiko 19:18; ma le Mataio 22:36-40.

    E faapefea ona faaalia e Kerisiano lo latou alofa mo le Atua ma tuaoi? (Mare. 6:34; Galu. 4:20; Roma 15:2)