Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 34: Ituaiga Fou o Mea‘ai

Tala 34: Ituaiga Fou o Mea‘ai

PE E mafai ona e iloaina mea o loo tufiina e tagata mai le eleele? E pei lava o se sau ua to‘a. E pa‘epa‘e, ma e manifinifi toe māmā. Ae e le o se sau ua to‘a, o se mea e aina.

O loo aoina e tagata Isaraelu le manai

Na o le tasi le masina talu ona tuua e Isaraelu Aikupito. Ua iai nei i latou i le vaomatua. E itiiti mea‘ai e ola ai, ona amata lea ona muimui tagata, ma faapea mai: ‘E sili ai pe ana fasioti i matou e Ieova i Aikupito. Ae i lea o loo maua pea mea‘ai matou te manana‘o iai.’

Ona faapea mai lea o Ieova: ‘O le a ou faatotōina ifo mea‘ai mai le lagi.’ I le isi taeao sa vaai atu Isaraelu ua to‘ulu mai nei mea papa‘e, ona fesili lea o le tasi i le tasi: ‘O le ā ea lenei?’

Ona faapea atu lea o Mose: ‘O le mea‘ai lenei ua aumaia e Ieova tou te aai ai.’ Ua ta‘ua e tagata o le MANAI. E pei o ni keke māmā e faia i le meli.

‘Ia outou aoina mea e mafai e le tagata ona ai,’ o le faatonuga lenā a Mose i tagata. O le galuega lenā i taeao uma. Ae a vevela le lā, ona mou atu lea o le manai o i luga o le eleele.

Ona toe faapea atu lea o Mose: ‘Aua ne‘i iai se tasi na te faaputuina ni manai mo le isi aso.’ Peita‘i sa le‘i faalogo isi tagata. Pe tou te iloa le mea na tupu? O le isi taeao na sosoo ai sa tumu uma le manai na latou teuina i ilo, ma ua elo!

E tasi lava le aso o le vaiaso, na fetalai ai Ieova i tagata latou te aoina ia faaluaina le tele o manai. O le aso lona ono lea. Ma sa tulei atu Ieova ia teuina nisi manai mo le isi aso, auā na te lē faato‘uluina mai ni mea‘ai i le aso lona fitu. Ina ua latou teuina le manai mo le aso lona fitu, e le‘i iai ni ilo pe elo fo‘i! O se tasi lenā o vavega!

O tausaga uma lava sa iai Isaraelu i le vaomatua sa fafagaina latou e Ieova i le manai.

Esoto 16:1-36; Numera 11:7-9; Iosua 5:10-12.



Fesili

  • I le ata, o le ā o tufiina e tagata mai le eleele, ma o le ā le igoa o ia mea?
  • O le ā le faatonuga a Mose i tagata i le aoina mai o le manai?
  • O le ā na tulei atu ai Ieova i tagata e faia i le aso lona ono, ma aiseā?
  • O le ā le vavega na faia e Ieova ina ua teuina le manai mo le aso lona fitu?
  • E fia tausaga na fafagaina ai e Ieova tagata i le manai?

Fesili faaopoopo

  • Faitau le Esoto 16:1-36 ma le Numera 11:7-9.

    O le ā ua faaalia e le Esoto 16:8 e faatatau i le mana‘oga mo i tatou e faaaloalo i ē ua tofia e le Atua i le faapotopotoga Kerisiano? (Epe. 13:17)

    Na faapefea ona faamanatu atu i aso ta‘itasi i tagata Isaraelu lo latou faalagolago iā Ieova i le vaomatua? (Eso. 16:14-16, 35; Teu. 8:2, 3)

    O le ā le uiga faafaatusa na fetalai i ai Iesu e faatatau i le manai, ma e faapefea ona tatou mauaina aogā mai lenei “areto mai le lagi”? (Ioa. 6:31-35, 40)

  • Faitau le Iosua 5:10-12.

    E fia tausaga na aai ai tagata Isaraelu i le manai, ma na faapefea ona tofotofoina ai i latou, ma o le ā tatou te a‘oa‘oina mai lenei tala? (Eso. 16:35; Nu. 11:4-6; 1 Kori. 10:10, 11)