Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 54: O le Tamāloa e Sili Ona Malosi

Tala 54: O le Tamāloa e Sili Ona Malosi

O AI le tagata na sili atu lona malosi? O le faamasino e igoa iā Samasoni. O Ieova na avatua le malosi iā te ia. E oo lava i le taimi a o le‘i fanau mai Samasoni, sa ta‘u atu e Ieova i lona tinā: ‘Ua toe itiiti ona maua lea o sau tama. O le a ta‘ita‘i o ia i le faasaoina mai o Isaraelu mai a Filisitia.’

O loo fasi e Samasoni le leona

O Filisitia o ni tagata leaga e nonofo i Kanana. E to‘atele ona tagata tau, ma sa latou faasauā iā Isaraelu. A o alu atu Samasoni i lona ala i le mea e nonofo ai Filisitia, sa sau ai se leona tagi tele lava e faafetaui iā te ia. Ae sa fasi mate e Samasoni le leona i ona lima. Sa ia fasiotia fo‘i le faitau selau o Filisitia leaga.

Mulimuli ane ona alofa ai lea o Samasoni iā Talila. Sa folafola atu e ta‘ita‘i o Filisitia, latou te ta‘ito‘atasi ona avatua iā Talila fasi ario e 1,100 pe afai na te ta‘uina atu iā i latou le māfuaaga o le malosi o Samasoni. Sa mana‘o Talila i tupe uma na. E lē o ia o se uō moni a Samasoni ma ona tagata. Ua soona fesiligia Samasoni po o le ā lona malosi tele.

Talila ma Samasoni

Na i‘u lava ina ta‘u e Samasoni iā Talila le pogai o lona malosi. ‘E le‘i selea lava lo‘u lauulu,’ o lana upu lenā. ‘Mai i le taimi na ou fanau ai, na filifilia ai a‘u e le Atua e avea ma ana auauna faapitoa e ta‘ua o le Naseri. Afai o le a sele lo‘u lauulu o le a lēiloa loa lo‘u malosi.’

Ina ua iloa e Talila, sa ia faamoeina loa Samasoni i ona vae. Ona ia valaau atu loa lea i le isi tamāloa e sau e ‘oti lona lauulu. Ina ua ala i luga Samasoni, ua le toe iai sona malosi. Ona ō mai ai lea o Filisitia ma pu‘e iā te ia. Sa latou saliina ese ona mata e lua ma fai ma pologa.

Ua lūlū i lalo e Samasoni poutū

I le tasi aso sa fai ai se fiafia tele a Filisitia e tapua‘i atu ai i lo latou atua o Takono, ma sa latou aumaia ai Samasoni e fai i ai ni ulaga. I lenā taimi, ua toe tutupu le lauulu o Samasoni. Sa faapea atu Samasoni i le tamaitiiti o loo ta‘ita‘iina lona lima: ‘Se‘i tuu mai se‘i ou tago atu i poutū o loo taofia ai le fale.’ Ona tatalo ai lea o Samasoni iā Ieova mo le malosi ma ia tago atu i poutū. Ona ia alaga ai loa lea: ‘Tuu mai ia se‘i ou oti faatasi ma nei Filisitia.’ Ina ua lolo‘u atu Samasoni aga‘i i poutū sa palasi ai loa i lalo le fale ma fasiotia ai Filisitia e 3,000.

Faamasino mataupu e 13 se‘ia oo i le 16.



Fesili

  • O ai le igoa o le tagata na sili atu lona malosi, ma o ai na avatua le malosi iā te ia?
  • O le ā na faia e Samasoni i se leona tagi tele i se tasi aso, e pei ona e vaaia i le ata?
  • O le ā le tala o loo ta‘u atu e Samasoni iā Talila e pei ona e vaaia i le ata, ma na faapefea ona i‘u ina pu‘eina ai o ia e tagata Filisitia?
  • Na faapefea ona faapogaia e Samasoni le oti o tagata Filisitia e to‘a 3,000 o ē na fai ma fili, i le aso na oti ai o ia?

Fesili faaopoopo

  • Faitau le Faamasino 13:1-14.

    E faapefea ona saunia e Manoa ma lana avā se faaa‘oa‘oga lelei mo mātua i le tausia a‘e o fanau? (Faama. 13:8; Sala. 127:3; Efe. 6:4)

  • Faitau le Faamasino 14:5-9 ma le 15:9-16.

    O le ā ua faailoa mai e faatatau i gaoioiga o le agaga paia o Ieova mai le tala iā Samasoni i lona fasiina o le leona, motusia ni maea fou na saisaitia ai o ia, faaaogā le ivi auvae o se asini e fasioti ai tagata e to‘a 1,000?

    E faapefea ona fesoasoani le agaga paia iā i tatou i aso nei? (Faama. 14:6; 15:14; Saka. 4:6; Galu. 4:31)

  • Faitau le Faamasino 16:18-31.

    Na faapefea ona aafia Samasoni i aumea leaga, ma o le ā tatou te a‘oa‘oina mai lenei mea? (Faama. 16:18, 19; 1 Kori. 15:33)