Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 52: Kitiona ma Ana Tamāloloa e 300

Tala 52: Kitiona ma Ana Tamāloloa e 300

PE E te iloaina le mea o loo tupu i inei? O tagata tau na a Isaraelu. O loo faō i latou e feinu. O le Faamasino o Kitiona lenā e tū latalata atu iā i latou. O loo vaavaai atu o ia iā i latou pe faapefea ona latou feinu.

Sei vaavaai lelei atu i auala eseese o loo feinu ai tamāloloa. O isi o loo matua‘i fufui atoa ma o latou mata i le vai. A o le isi o loo asuasu ifo vai i luga i lona lima, ina ia mafai ona vaavaai solo o ia a o inu. Sa tulei atu Ieova iā Kitiona ia filifili mai na o e o loo vaavaai solo a o feinu i latou. Ae o le isi to‘atele, sa toe aauina atu i o latou aiga. Se‘i o tatou iloa le māfuaaga.

Ua toe iai nei fo‘i Isaraelu i le tele o faafitauli. O le māfuaaga, ua lē usiusita‘i i latou iā Ieova. O tagata Mitiana ua pule ma ua faatigā fo‘i iā i latou. O lea sa alalaga atu ai Isaraelu iā Ieova mo se fesoasoani, ma sa faalogo Ieova i lo latou tagi.

Ona fai atu lea o Ieova iā Kitiona e fai sana vaegaau, ona ia faapotopoto lea o tagata e 32,000. Ae o le vaega tau faasaga i a Isaraelu e 135,000 tagata. Sa faapea atu Ieova i a Kitiona: ‘Ua to‘atele tele lau vaega au.’ Aiseā na faapea atu ai Ieova?

Talu ai, afai e manumalo Isaraelu, ona latou manatu lea ua ala ona malo ona o i latou lava. Atonu e manatu i latou sa le mana‘omia le fesoasoani a Ieova ia manumalo ai. O lea na faapea atu ai Ieova iā Kitiona: ‘Ia fai atu i tagata uma lava o fefefe e toe fo‘i atu i o latou aiga.’ E toa 22,000 tagata tau na toe fo‘i. Na totoe ai na o tagata e 10,000 e tau faasaga i le 135,000 o fitafita.

Ua tofotofoina e Kitiona tamāloloa

Peita‘i, faalogo! Sa faapea atu Ieova: ‘O loo to‘atele pea ou tagata.’ O lea sa faapea atu Ieova iā Kitiona e ave tagata i le vai e faafeinu, ma ia toe faafo‘i i latou uma lava o e inu ma faō i le vai. ‘Ou te avatua iā te oe le manumalo i le na o le 300 tagata o e o loo feinu ma vaavaai solo,’ o le ta‘utinoga lea a Ieova.

Ua oo mai nei le taimi e fai ai le taua. Sa tuuina atu e Kitiona ana tamāloloa e 300 i vaega e tolu. E tofu le tagata ma le pū, ma le kate. A latalata loa i le tulua o le pō, ona latou faapotopoto atu lea i tafatafa o le mea o ai le fili. Ma o le taimi tonu lava lenā o le a ili ai a latou pū ma ta‘ei ai a latou kate ma valaau: ‘O le pelu a Ieova ma Kitiona!’ Ina ua feala mai le fili, ua lē iloa e i latou se mea a fai ma ua fefefe. Ua amata loa ona sosola, ma sa malo ai Isaraelu i le taua.

Faamasino mataupu e 6 e oo i le 8.



Fesili

  • E faapefea ma aiseā ua tele ai faafitauli o tagata Isaraelu?
  • Aiseā ua fetalai atu ai Ieova iā Kitiona ua to‘atele tele lana vaegaau?
  • E to‘afia tagata na totoe ina ua fai atu Kitiona i tagata uma lava na fefefe, e toe fo‘i i o latou aiga?
  • Vaai i le ata, ia faamatala pe na faapefea ona faaitiitia e Ieova le numera o le ‘autau a Kitiona i fitafita e na o le 300.
  • Na faapefea ona vaevaeina e Kitiona ana tamāloloa e 300, ma na faapefea ona manumalo Isaraelu i le taua?

Fesili faaopoopo

  • Faitau le Faamasino 6:36-40.

    Na faapefea ona faamautinoa e Kitiona le finagalo o Ieova?

    E faapefea ona tatou iloa i aso nei le finagalo o Ieova? (Faata. 2:3-6; Mata. 7:7-11; 2 Timo. 3:16, 17)

  • Faitau le Faamasino 7:1-25.

    O le ā le lesona tatou te a‘oa‘oina mai tamāloloa e 300 o ē na faaauau ona mataalia, e tuufaafeagai i tamāloloa o ē na faatalalē? (Faama. 7:3, 6; Roma 13:11, 12; Efe. 5:15-17)

    E pei ona a‘oa‘oina e tamāloloa e 300 mea mai le vaavaai atu iā Kitiona, e faapefea ona tatou a‘oa‘oina mea mai le vaavaai atu i le Kitiona Sili, o Iesu Keriso? (Faama. 7:17; Mata. 11:29, 30; 28:19, 20; 1 Pete. 2:21)

    E faapefea ona fesoasoani le Faamasino 7:21 ina ia tatou lotomalilie e auauna i so o se mea e tofia ai i tatou i le faalapotopotoga a Ieova? (1 Kori. 4:2; 12:14-18; Iako. 4:10)

  • Faitau le Faamasino 8:1-3.

    Pe a taulimaina ni feeseesea‘iga ma se uso po o se tuafafine, o le ā tatou te a‘oa‘oina mai i le auala na fo‘ia ai e Kitiona le finauga a tagata Efaraima? (Faata. 15:1; Mata. 5:23, 24; Luka 9:48)