Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 49: Ua Tumau le Lā

Tala 49: Ua Tumau le Lā

VAAI atu iā Iosua. O loo ia fai atu: ‘Lā ia tumau!’ Sa tumau le lā. Na tū tonu lava i le ogatotonu o le lagi mo le aso atoa. Na faatupuina e Ieova! Ae se‘i o tatou vaai pe aiseā na mana‘o ai Iosua e susulu mai pea le lā.

Le lā

Ina ua amata ona sii tau tupu leaga e to‘alima o Kanana faasaga i tagata Kipeona, na auina atu e Kipeona se tagata iā Iosua mo se fesoasoani. ‘Ia outou faavave mai iā i matou!’ o lana tala lea. ‘Faasao i matou! Ua ō mai uma tupu o lenei atu mauga e tau ma au auauna.’

I le taimi lava lenā na o atu ai Iosua ma ana tagata tau uma. Sa latou savavali i le pō atoa. Ina ua oo i Kipeona, sa fefefe fitafita a tupu leaga e to‘alima ma amata ona sosola. Ona lafo ifo lea e Ieova maa mai le lagi, ma e to‘atele fitafita na feoti ai na i lo ē na fasiotia e Iosua ma ana tagata tau.

Iosua

Ua iloa e Iosua ua toeitiiti ona alu lea i lalo o le lā. O le a pogisa, ma e to‘atele fitafita a tupu leaga o le a sosola. O le māfuaaga lenā na tatalo ai Iosua iā Ieova ma faapea atu: ‘Le lā e, ia tumau oe!’ Ma a o susulu pea le lā, sa mafai e Isaraelu ona faauma ma manumalo i le taua.

E to‘atele pea ni tupu leaga i Kanana o ē ‘ino‘ino i tagata o le Atua. E tusa ma le ono tausaga na faato‘ilaloina ai e Iosua ma ona tagata tupu e 31. Ina ua māe‘a lenā, sa vaaia lelei e Iosua le vaevaeina o le laueleele o Kanana i isi ituaiga o loo mana‘omia ni fasi fanua.

E tele ni tausaga na mavae, ma maliu ai Iosua ina ua 110 ona tausaga. A o ola pea o ia ma ana uō, sa usiusita‘i tagata iā Ieova. Peita‘i ina ua feoti, na amata loa ona faia e tagata mea leaga ma oo i ai faalavelave. O i inā tonu latou te mana‘omia ai le fesoasoani a le Atua.

Iosua 10:6-15; 12:7-24: 14:1-5; Faamasino 2:8-13.



Fesili

  • I le ata, o le ā le tala a Iosua o fai ma aiseā?
  • Na faapefea ona fesoasoani Ieova iā Iosua ma ana tagata tau?
  • E to‘afia tupu na fai ma fili na faato‘ilalo e Iosua, ma e fia tausaga na alu ai?
  • Aiseā na vaevaeina ai e Iosua le laueleele o Kanana?
  • E fia tausaga o Iosua ina ua maliu, ma o le ā na tupu i tagata mulimuli ane ai?

Fesili faaopoopo

  • Faitau le Iosua 10:6-15.

    O le ā ua tatou mautinoa ai i aso nei ona o le iloa faapea na faatumau e Ieova le lā ma le masina mo Isaraelu? (Iosua 10:8, 10, 12, 13; Sala. 18:3; Faata. 18:10)

  • Faitau le Iosua 12:7-24.

    O ai moni lava na ala ai ona to‘ilalo tupu e to‘a 31 i Kanana, ma aiseā e tāua ai lenā mea mo i tatou i aso nei? (Iosua 12:7; 24:11-13; Teu. 31:8; Luka 21:9, 25-28)

  • Faitau le Iosua 14:1-5.

    Na faapefea ona vaevaeina le nuu i ituaiga o Isaraelu, ma o le ā ua faailoa mai e lenei mea e faatatau i tofi i le Parataiso? (Iosua 14:2; Isa. 65:21; Eseki. 47:21-23; 1 Kori. 14:33)

  • Faitau le Faamasino 2:8-13.

    E pei o Iosua i Isaraelu, o ai o loo gaoioi i aso nei e taofiofia taumafaiga a ē ua lafoa‘ia le tapua‘iga moni? (Faama. 2:8, 10, 11; Mata. 24:45-47; 2 Tesa. 2:3-6; Tito 1:7-9; Faaa. 1:1; 2:1, 2)