Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 46: O Pā o Ieriko

Tala 46: O Pā o Ieriko

O LE ā ua māfua ai ona solo pa o Ieriko? E foliga mai sa pā ai se pomu telē. Ae o aso la sa leai ni pomu; leai ni fana. O se tasi fo‘i o vavega a Ieova! Se‘i o tatou a‘oa‘oina pe sa faapefea ona tupu.

O loo solo i lalo pā o Ieriko

Se‘i faalogo i le upu a Ieova iā Iosua: ‘O oe ma ou tagata tau ia savavali solo i le aai. Ia savavali faataamilo faatasi ai mo aso e ono. Ia outou ave le atolaau o le feagaiga ma outou. E to‘afitu ni ositaulaga e muamua atu i luma ma ili a latou pū.

‘O le aso lona fitu ia outou savavali faataamilo faafitu ai i le aai. Ona ili faaumiumi ai lea o le pū, ma alalaga loa tagata uma i le alaga o le taua. Ma o le a solo ai loa i lalo pā!’

Sa faia e Iosua ma ona tagata mea na fai atu ai Ieova. A o latou savavali, sa leai se tasi e pisa. Na faalogoina na o le leo o pū ma le pa‘ō o vae. O fili o tagata o le Atua atonu ua matua‘i fefefe. Pe e te iloaina atu lenā maea mūmū o loo tautau mai i le faamalama? O le faamalama o ai lenā? Ioe, sa faia e Raava le mea sa ta‘uina atu e tagata matamata na te faia. O loo matamata uma mai ai lava lona aiga ma ia i totonu.

Iosua

Mulimuli ane, i le aso fitu, ina ua uma ona faataamilo faafitu i le aai, sa ilia loa pū, sa alalaga tagata tau, ma sa solo loa pā. Ona faapea atu lea o Iosua: ‘Ia fasioti tagata uma o i le aai ma susunu. Susunu mea uma. Faasao na o ario, auro, apamemea ma u‘amea, ma ia ave i le mea o teu ai oloa a Ieova i le fale‘ie.’

Sa faapea atu Iosua i tagata matamata e to‘alua: ‘Ō atu i le fale o Raava, ma aumai o ia ma lona aiga uma.’ Ua faasaoina nei Raava ma lona aiga, e pei ona tautō atu ai tagata matamata iā te ia.

Iosua 6:1-25.



Fesili

  • O le ā na tulei iai Ieova e faia e tagata tau ma ositaulaga mo aso e ono?
  • O le ā e faia e tagata i le aso lona fitu?
  • E pei ona vaaia i le ata, o le ā ua tupu i pā o Ieriko?
  • Aiseā ua tautau mai ai le maea mūmū i le faamalama?
  • O le ā na fai atu ai Iosua i tagata tau e fai i tagata ma le aai, ae faapefea ario, auro, apamemea ma u‘amea?
  • O le ā na faatonuina tagata matamata e to‘alua e fai?

Fesili faaopoopo

  • Faitau le Iosua 6:1-25.

    E faapefea ona taitutusa le savavali faataamilo o Isaraelu i Ieriko i le aso lona fitu, ma le galuega tala‘i a Molimau a Ieova i nei aso e gata ai? (Iosua 6:15, 16; Isa. 60:22; Mata. 24:14; 1 Kori. 9:16)

    Na faapefea ona faataunuuina le valoaga o i le Iosua 6:26 pe tusa ma le 500 tausaga mulimuli ane ai, ma o le ā tatou te a‘oa‘oina mai ai e faatatau i afioga a Ieova? (1 Tu. 16:34; Isa. 55:11)