Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 40: Tāina e Mose le Papa

Tala 40: Tāina e Mose le Papa

UA MAVAE atu lea tausaga ma lea tausaga—10 tausaga, 20 tausaga, 30 tausaga, 39 tausaga! Ma ua iai pea Isaraelu i le vaomatua. Peita‘i o na tausaga uma sa tausia pea e Ieova ona tagata. Na ia fafaga iā i latou i le manai. Na ia ta‘ita‘iina mai i latou i se ao faaniutū i le ao, ma i le afi faaniutū i le pō. Ma i na tausaga uma sa le‘i masaesae o latou ofu ma sa lē tigā fo‘i o latou vae.

Ua oo nei i le masina muamua o lona 40 tausaga talu ona tuua Aikupito. Ona toe tolauapi fo‘i lea o Isaraelu i Katesa. O i ina sa latou iai muamua ina ua aauina atu tagata matamata e toa 12 e vaai le nuu o Kanana. Sa oti le tuafafine o Mose o Miriama i Katesa. Ma e pei lava ona iai muamua, ua toe iai fo‘i ni faalavelave.

Ua lē maua e tagata se vai i ina. Ona latou faitio ai lea iā Mose: ‘E sili ai pe ana matou feoti. Aiseā na e aumaia ai i matou mai Aikupito i lenei nofoaga matuā leaga tele e le ola ai se mea? Leai ni falaoa lelei, leai ni mati, leai ni vine, leai ni rimoni. Ua leai ni vai e inu.’

Ua tā e Mose le papa

Ina ua ō atu Mose ma Arona e tatalo i le fale fetafa‘i, sa fai atu Ieova iā Mose: ‘Ia e faapotopoto mai tagata. Ma ia e tautala atu i o latou luma i le maa o loo tū mai i o. E lava lelei vai e puna mai ai mo tagata uma ma a latou meaola.’

Ona faapotopoto mai lea e Mose o tagata, ma faapea atu: ‘Faalogo, outou na e leai se talitonu i le Atua! Pe e aumaia ea e i maua nei ma Arona ni vai mai lenei papa mo outou?’ Ona tā lea e Mose le papa i le laau, ona puna mai ai lea o se vai tele mai le papa. Ua lava ma totoe vai mo tagata ma meaola.

Peita‘i ua ita Ieova i a Mose ma Arona. Pe e te iloaina aiseā? Talu ai ua fai atu Mose ma Arona o le a la aumaia ni vai mai le papa. Ae peita‘i, o Ieova moni lava sa ona faia. Ma talu ai sa le‘i ta‘uina e Mose ma Arona le mea moni, ona faapea atu lea o Ieova o le a ia faasalaina i la‘ua. ‘O le a oulua lē ta‘ita‘iina o‘u tagata i totonu o Kanana,’ o lana tala lea.

Ona tuua ai lea e Isaraelu Katesa. Mo sina taimi puupuu ona latou oo ai lea i le Mauga o Horo. O i ina, i le tumutumu o le mauga na oti ai Arona. E 123 tausaga lona matua ina ua oti. Ua faanoanoa tele Isaraelu, ma mo le 30 o aso na fetagisi ai tagata uma mo Arona. O lona atalii o Eleasaro ua avea nei o ia ma ositaulaga sili e sosoo ai mo Isaraelu.

Numera 20:1-13, 22-29; Teuteronome 29:5.



Fesili

  • Na faapefea ona tausia e Ieova tagata Isaraelu a o iai i le vaomatua?
  • O le ā le faitioga a tagata Isaraelu a o tolauapi i Katesa?
  • Na faapefea ona saunia e Ieova le vai mo tagata ma a latou meaola?
  • O ai le tamāloa lenā i le ata o loo faasino lona lima iā te ia lava, ma aiseā?
  • Aiseā na ita ai Ieova iā Mose ma Arona, ma na faapefea ona faasalaina i la‘ua?
  • O le ā na tupu i le Mauga o Horo, ma o ai na avea ma ositaulaga sili mo Isaraelu?

Fesili faaopoopo

  • Faitau le Numera 20:1-13, 22-29 ma le Teuteronome 29:5.

    O le ā ua tatou a‘oa‘oina mai le auala na tausia ai e Ieova tagata Isaraelu i le vaomatua? (Teu. 29:5; Mata. 6:31; Epe. 13:5; Iako. 1:17)

    O le ā le silafaga a Ieova ina ua lē faapaiaina o ia e Mose ma Arona i luma o le nuu o Isaraelu? (Nu. 20:12; 1 Kori. 10:12; Faaa. 4:11)

    O le ā ua tatou a‘oa‘oina mai le auala na tali atu ai Mose ina ua a‘oa‘ia o ia e Ieova? (Nu. 12:3; 20:12, 27, 28; Teu. 32:4; Epe. 12:7-11)