Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 39: Ola Fugālaau i le Tootoo o Arona

Tala 39: Ola Fugālaau i le Tootoo o Arona

SEI vaai i fugālaau ma sekati matutua o loo ola mai i lenei tootoo, po o le laau. O le tootoo o Arona sa ola a‘e ai fugālaau ma sekati matutua i le pō e tasi. Se‘i o tatou vaai pe aiseā?

O loo avatu e Mose le tootoo ua ola ai fugālaau iā Arona

Ua faataamilo nei Isaraelu i le vaomatua mo sina vaitaimi. Ua manatu isi e lē tatau ona toe avea Mose ma o latou ta‘ita‘i, po o Arona fo‘i e avea ma faitaulaga sili. O Koru, Tatano, Apiramo ma le 250 o tagata ta‘ita‘i sa latou manatu faapena. Sa latou o atu iā Mose ma faapea atu: ‘Aiseā ua e faasilia ai oe e oe lava i luga a‘e o i matou uma nei?’

Sa fai atu Mose iā Koru ma ona tagata: ‘O a taeao ia ave mea e tuu ai afi ma tuu iai mea manogi. Ona outou o mai lea i le fale fetafa‘i. Tatou te iloa ai po o ai e filifilia e Ieova.’

O le isi aso na sosoo ai na ō atu ai Koru ma ona tagata e 250 i le fale fetafa‘i. E to‘atele isi na o mai e lagolago na tagata. Ua ita tele Ieova. ‘Ia outou o ese mai fale‘ie o na tagata leaga,’ o le tala lea a Mose. ‘Aua tou te papa‘i atu i sa latou mea.’ Na faalogo tagata, ma o ese mai fale‘ie o Koru, Tatano ma Apiramo.

Sa fai atu Mose: ‘O le auala lenei tou te iloa ai lē ua filifilia e Ieova. O le a māvaevae le eleele ma foloina nei tagata leaga.’

Na uma loa ona tautala Mose, matala loa le laueleele. O le fale‘ie o Koru ma ana mea ma Tatano ma Apiramo ma ē sa latou faatasi na gogoto i lalo, ma ufitia ai e le laueleele. Ina ua faalogo tagata i le tagi a e na pa‘u‘ū i le eleele, sa latou alalaga: ‘Tamomo‘e! Atonu e foloina fo‘i tatou e le eleele!’

Sa iai pea Koru ma ona tagata e 250 i tafatafa o le fale fetafa‘i. Ona auina mai lea e Ieova le afi, ma mū uma ai i latou. Ona fai atu lea o Ieova i le atalii o Arona o Eleasaro ia ave mea e tuu ai afi a na tagata oti ma fai ai se ufiufi manifinifi o le fata faitaulaga. O lenei ufiufi e fai ma lapata‘iga i tagata Isaraelu e leai se tasi e ese mai iā Arona ma ona atalii e fai ma ositaulaga mo Ieova.

Peita‘i sa mana‘o Ieova e faamanino atu o Arona ma ona atalii e fai ma ositaulaga. Ona ia faapea lea iā Mose: ‘Ia tofu ta‘ita‘i o ituaiga ta‘itasi o Isaraelu ma le tootoo. Ae o le ituaiga o Levi, ia tuu iā Arona e sau ma lona tootoo. Ona tuu lea o tootoo ta‘itasi i totonu o le fale fetafa‘i i luma o le atolaau o le feagaiga. O le tootoo o lē ou te filifilia o le a ola ai ni fugālaau.’

Ina ua alu Mose e vaai i le isi taeao, o le tootoo o Arona ua ola ai fugālaau ma sekati matutua. Pe ua e iloa nei le māfuaaga na faatupu ai e Ieova fugālaau i le tootoo o Arona?

Numera 16:1-49; 17:1-11; 26:10.



Fesili

  • O ai na tetee i le pule a Mose ma Arona, ma o le ā la latou tala na fai atu iā Mose?
  • O le ā na fai atu ai Mose ia faia e Koru ma ona tagata e 250?
  • O le ā na fai atu ai Mose i tagata, ma o le ā na tupu ina ua uma ona tautala o ia?
  • O le ā na tupu iā Koru ma ona tagata e 250?
  • O le ā na faia e Eleasaro le atalii o Arona i mea e tuu ai afi a tagata ua feoti, ma aiseā?
  • Aiseā ua faatutupu ai e Ieova fugālaau i le tootoo o Arona? (Vaai i le ata.)

Fesili faaopoopo

  • Faitau le Numera 16:1-49.

    O le ā na faia e Koru ma ē na mulimuli iā te ia, ma aiseā na latou fouvale ai iā Ieova ona o le mea na latou faia? (Nu. 16:9, 10, 18; Levi. 10:1, 2; Faata. 11:2)

    O le ā le manatu sesē na iā Koru ma tagata e to‘a 250 o ‘alii o le faapotopotoga’? (Nu. 16:1-3; Faata. 15:33; Isa. 49:7)

  • Faitau le Numera 17:1-11 ma le 26:10.

    O le ā ua faaalia ina ua ola fugālaau i le tootoo o Arona, ma aiseā na poloa‘i ai Ieova e teuina i le atolaau? (Nu. 17:5, 8, 10)

    O le ā le lesona tāua tatou te a‘oa‘oina mai le mea na tupu i le tootoo o Arona? (Nu. 17:10; Galu. 20:28; Fili. 2:14; Epe. 13:17)