Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 33: Sopo‘ia le Sami Ulaula

Tala 33: Sopo‘ia le Sami Ulaula

VAAI atu nei i le mea ua tupu! O Mose lenā ma lana laau ua faaloaloa atu i luga o le Sami Ulaula. O i latou ua sao i le isi itu o tagata Isaraelu. Ae ua malelemo nei Farao ma lana autau i le sami. Se‘i o tatou vaai pe na faapefea ona tupu.

Ua malelemo le autau a Aikupito

E pei ona tatou a‘oa‘oina, sa faatagaina Isaraelu e tuua Aikupito ina ua uma le mala lona 10. Pe tusa e 600,000 tamāloloa Isaraelu na ō, faatasi ma fafine ma tamaiti. Faapena fo‘i ma se vaega tele o isi tagata, o ē na talitonu iā Ieova, na latou ō ma Isaraelu. Sa latou aveina uma a latou ‘oti ma mamoe ma povi ma i latou.

A o le‘i o i latou, sa fesili atu tagata Isaraelu i Aikupito mo ni lavalava ma isi mea e fai i auro ma ario. Sa fefefe tele tagata Aikupito, talu ai lenā mala mulimuli i luga iā i latou. O lea sa latou ave ai iā Isaraelu mea na latou manana‘o ai.

Ina ua mavae ni nai aso ona oo atu lea o Isaraelu i le Sami Ulaula. O i ina sa latou mālōlō ai. I le taimi lava lenā, ua amata ai ona faanoanoa Farao ma ona tagata ina ua latou tuuina atu Isaraelu e ō.

Ona toe suia faanatinati lea le manatu o Farao. Sa ia saunia loa ana kariota o le taua ma lana autau. Ona ia amata loa lea ona tuliloa tagata Isaraelu i ana kariota faapitoa e 600, faapena ai fo‘i ma isi kariota uma a Aikupito.

Ina ua vaai atu Isaraelu ua ō mai Farao ma lana autau, sa fefefe tele i latou. Ua leai nei se mea e sosola i ai. O le Sami Ulaula i le tasi itu a o Aikupito i le isi itu. Ae sa tuu e Ieova se ao i le va o ona tagata ma Aikupito. O lea sa le mafai ai ona iloa e Aikupito Isaraelu ma osofa‘i iā te i latou.

Ona fai atu lea o Ieova iā Mose e faaloaloa atu lana laau i le Sami Ulaula. Ina ua ia faia, sa faaagi ai loa e Ieova se matagi malosi mai sasae. O suāsami sa vaeluaina, ma sa taofia uma i itu e lua.

Ona amata loa lea ona savavali atu Isaraelu i le eleele mātūtū. Sa tele ni itula na faaaluina mo miliona o tagata ma a latou manu ia faasaoina mai le sami e oo atu i le isi itu. Mulimuli ane ona toe iloa atu ai lea e Aikupito ia Isaraelu. Ua sosola a latou pologa! Ona latou faavave atu ai lea iā i latou i le sami.

Ina ua latou faia, sa faapauu ese e le Atua uili o a latou kariota. Ua fefefe tele Aikupito ma ua amata loa ona latou alalaga: ‘O loo tau Ieova mo Isaraelu. Se‘i o tatou sosola ia mai i inei!’ Peita‘i ua fai si tuai.

O le taimi tonu lava lenā na fai atu ai Ieova iā Mose ia faaloaloa atu lana laau i luga o le sami e pei ona e vaai atu i ai i le ata. Sa toe fo‘i mai loa le faufaupuega vai i luga o Aikupito ma a latou kariota. O le vaegā‘au uma sa mulimuli atu i a Isaraelu aga‘i i le sami. Ma e le‘i i ai lava se tagata Aikupito e tasi na ola!

Sa fiafia uma tagata o le Atua ina ua faasaoina i latou! Ma sa latou usuina se pese faafetai i a Ieova e faapea: ‘Ua malo Ieova i se manumalo mamalu. Ua ia lafoa‘iina solofanua ma ē o ti‘eti‘e ai i le sami.’ Sa ave e Miriama le tuafafine o Mose lana topa ma sa mulimuli uma i ai fafine ma a latou topa. Ma a o sisiva i latou ma le fiafia, sa latou usuina lava le pese e tasi lea sa usuina e tamāloloa: ‘Ua malo Ieova i se manumalo mamalu. Ua ia lafoa‘iina solofanua ma e o ti‘eti‘e ai le sami.’

Esoto mataupu e 12 e oo i le 15.



Fesili

  • E to‘afia tamāloloa Isaraelu na ō ese mai Aikupito faatasi ai ma fafine ma tamaiti, ma o ai isi na latou ō faatasi?
  • O ā faalogona o Farao ina ua uma ona ia tuuina atu Isaraelu e ō, ma o le ā na ia faia?
  • O le ā na faia e Ieova e taofia ai autau a Aikupito mai le osofa‘ia o ona tagata?
  • O le ā na tupu ina ua faaloaloa atu e Mose lana laau i le Sami Ulaula, ma o le ā na faia e tagata Isaraelu?
  • O le ā na tupu ina ua faavave atu autau a Aikupito i le sami e tuliloaina tagata Isaraelu?
  • Na faapefea ona faaalia e tagata Isaraelu lo latou fiafia ma faafetai iā Ieova mo le faasaoina o i latou?

Fesili faaopoopo

  • Faitau le Esoto 12:33-36.

    Na faapefea ona faamautinoa e Ieova ua tauia ona tagata mo tausaga uma na latou nofo pologa ai i Aikupito? (Eso. 3:21, 22; 12:35, 36)

  • Faitau le Esoto 14:1-31.

    E faapefea i upu a Mose i le Esoto 14:13, 14 ona aafia ai auauna a Ieova i aso nei a o latou sauniuni mo le taua o faalolo‘i mai o Amaketo? (2 No. 20:17; Sala. 91:8)

  • Faitau le Esoto 15:1-8, 20, 21.

    Aiseā e ao ai ona pepese auauna a Ieova i ona viiga? (Eso. 15:1, 2; Sala. 105:2, 3; Faaa. 15:3, 4)

    O le ā le faaa‘oa‘oga o viiga o Ieova na faia e Miriama ma isi fafine i le Sami Ulaula mo fafine Kerisiano i aso nei? (Eso. 15:20, 21; Sala. 68:11)