Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 32: Mala e 10

Tala 32: Mala e 10

VAAI i ata. Ua faaalia ai mala ta‘itasi na aumaia e Ieova i luga o Aikupito. I le ata muamua o loo e vaai atu ai i le laau a Arona ua tāina ai le Vaitafe o le Naila. Ma sa liu toto ai loa le vai. Ua mamate i‘a ma ua amata ona elo le vaitafe.

Ua oo mala i tagata Aikupito

Ona sosoo ai lea ma le faaosoina mai e Ieova o rane mai le Vaitafe o le Naila. So o se mea lava ua maua ai—ogaumu, mea e palu ai falaoa, ma moega. Ina ua pepē rane sa faaputuputu e tagata Aikupito i ni faaputuga se tele, ma ua elo ai le laueleele.

Sa tā loa e Arona le efuefu i lona tootoo ma sa liu utu ai. O mea ola ninii e tau feū. O utu o le mala lona tolu lenā i Aikupito.

O isi mala uma, na o tagata Aikupito na lavevea ai, a e le‘i afāina ai Isaraelu. O lona fā, o lago lapopo‘a ia ua faatumulia ai fale o tagata Aikupito. O le lima o mala, sa lavea ai mea ola. O le tele o povi, mamoe ma ‘oti a tagata Aikupito sa mamate.

O le isi mea na sosoo ai na fetagofi Arona ma Mose i efuefu ma togi i luga i le ea. Sa tupu ai ni ma‘i leaga i tagata ma manu. O le mala lona ono lenā.

Ina ua uma ona sisii lea o lima o Mose i le lagi, ona aauina mai lea e Ieova o uato‘a ma faititili. O se uato‘a sili atu lea ona leaga i Aikupito.

O le mala lona valu o ni sē akerise se tele. Sa le‘i faapea muamua pe oo mai fo‘i i le taimi nei ona tele faapena ni se akerise. Sa latou aina uma mea e le‘i faaleagaina e le uato‘a.

O lona iva o mala o le pogisa. Na ufitia le nuu i le pogisa tele mo aso e tolu, ae sa iai pea le malamalama i le mea na nonofo ai Isaraelu.

Mulimuli ane ona faapea atu lea o le Atua i ona tagata e sausau pou o faitoto‘a i le toto o se tama‘i ‘oti po o se tama‘i mamoe. Ona pasi atu lea o le agelu a le Atua i Aikupito. A iloa e le agelu le toto na te le fasiotia se tasi o i ai i lea fale. Ae o fale uma e le iloa ai se toto, e fasiotia e le agelu a le Atua ulumatua a tagata ma manu. O le mala lona sefulu lenā.

Ina ua uma le mala mulimuli, ona faapea atu lea o Farao iā Isaraelu e ō. Ma i le po lava lenā na amata ai loa la latou savaliga i fafo atu o Aikupito.

Esoto mataupu e 7 e oo i le 12.



Fesili

  • Ia faaaogā ata i inei e faamatala ai mala muamua e tolu na aumaia e Ieova i a Aikupito.
  • O le ā le eseesega o mala muamua e tolu ma isi mala na mulimuli mai?
  • O le ā le mala lona fā, lima ma le ono?
  • Ia faamatala le mala lona fitu, valu ma le iva.
  • O le ā na fetalai Ieova e faia e tagata Isaraelu a o le‘i oo i le mala lona sefulu?
  • O le ā le mala lona sefulu, ma o le ā na tupu mulimuli ane?

Fesili faaopoopo

  • Faitau le Esoto 7:19-8:23.

    E ui na mafai fo‘i ona faia e taulāitu Aikupito mala muamua e lua a Ieova, ae o le ā na faamalosia i latou e ta‘utino mai ina ua uma le mala lona tolu? (Eso. 8:18, 19; Mata. 12:24-28)

    E faapefea ona faaalia e le mala lona fā le mana o Ieova e puipuia ai ona tagata, ma ona o le iloaina o lenā mea, o ā la ni faalogona o tagata o le Atua ona ua latalata mai “le puapuaga tele” lea ua valoia mai? (Eso. 8:22, 23; Faaa. 7:13, 14; 2 Nofo. 16:9)

  • Faitau le Esoto 8:24; 9:3, 6, 10, 11, 14, 16, 23-25; ma le 10:13-15, 21-23.

    O ā vaega e lua na faaalialia i lumāmea e Mala e Sefulu, ma e faapefea i lenei mea ona aafia ai la tatou vaai i na vaega i aso nei? (Eso. 8:10, 18, 19; 9:14)

    E faapefea ona fesoasoani le Esoto 9:16 ina ia tatou malamalama i le pogai ua faataga ai e Ieova le iai pea o Satani e oo mai i le asō? (Roma 9:21, 22)

  • Faitau le Esoto 12:21-32.

    Na faapefea ona faaolaina e le Paseka le to‘atele o tagata, ma o le ā na faaatagia e le Paseka? (Eso. 12:21-23; Ioa. 1:29; Roma 5:18, 19, 21; 1 Kori. 5:7)