Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 28: Faapefea Ona Faasaoina le Pepe o Mose

Tala 28: Faapefea Ona Faasaoina le Pepe o Mose

SEI VAAI i le pepe lenā e tagi ma tago atu i le lima tusi o le tama‘ita‘i. O Mose lenā. Pe e te iloa o ai lenā tama‘ita‘i aulelei? O ia o se alo tama‘ita‘i i Aikupito, o le afafine o Farao.

Ua maua Mose e le afafine o Farao

Sa faalafi e le tinā o Mose lana pepe se‘ia atoa le tolu o ona masina, auā sa ia le mana‘o ia fasiotia o ia e tagata Aikupito. Peita‘i sa ia iloa e i‘u ina maua Mose, o le mea la lenei sa ia faia ia faasaoina ai o ia.

Na ia ave se ato ma fai faalelei ina ne‘i sao i ai se vai. Ona ia tuuina lea iai o Mose, ma tuu le ato i vao uumi i le Vaitafe o le Naila. Sa faatonuina Miriama le tuafafine o Mose, ia tū ai i tafatafa ma vaai po o le ā o le a tupu.

Ona sau lea o le afafine o Farao i le Vaitafe o le Naila e ta‘ele ai. Na faafuase‘i ona ia iloa se ato, ona ia valaau lea i lana auauna teine: ‘Alu e aumai le ato mo a‘u.’ Ina ua tatala e le alo tama‘ita‘i le ato, sa ia vaaia ai se pepe aulelei tele! Sa tagi si tama‘i Mose, ma sa faanoanoa le alo tama‘ita‘i ona o ia. Sa ia le mana‘o ia fasiotia o ia.

Ona sau loa lea o Miriama. E mafai ona e iloa atu o ia i le ata. Sa fesili Miriama i le afafine o Farao: ‘Pe ou te alu atu ea ma fai i se fafine Isaraelu na te tausia le pepe mo oe?’

Sa fai atu le alo tama‘ita‘i: ‘Ioe, faamolemole, ia faia.’

Ona faavave lea o Miriama i lona tinā. Ina ua taunuu mai le tinā o Mose i le alo tama‘ita‘i, sa fai atu o ia: ‘Ave le pepe ma tausi mo a‘u, ma o le a ou totogi i a te oe.’

Na toe tausia lava e le tinā o Mose lana tama. Ma ina ua matua Mose, ona ia ave lea o ia i le afafine o Farao, o lē na faatamafaiina o ia e pei o lana lava tama. O le auala lenā na ola a‘e ai Mose i le fale o Farao.

Esoto 2:1-10.



Fesili

  • O ai le pepe o loo i le ata, ma o le lima tusi o ai lenā e tago i ai?
  • O le ā na faia e le tinā o Mose ina ia faasaoina ai Mose?
  • O ai le teineitiiti o loo i le ata, ma o le ā na ia faia?
  • Ina ua maua e le afafine o Farao le pepe, o le ā na fai atu ai Miriama?
  • O le ā na fai atu ai le alo tama‘ita‘i i le tinā o Mose?

Fesili faaopoopo

  • Faitau le Esoto 2:1-10.

    O le ā le avanoa na maua e le tinā o Mose e toleni ma a‘oa‘o ai Mose a o tamaitiiti, ma o le ā se faaa‘oa‘oga mo mātua i aso nei? (Eso. 2:9, 10; Teu. 6:6-9; Faata. 22:6; Efe. 6:4; 2 Timo. 3:15)