Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 26: Faamaoni Iopu i le Atua

Tala 26: Faamaoni Iopu i le Atua

PE E te faanoanoa ea ona o lenā tamāloa ma‘i? O Iopu ma lana avā lenā. Pe e te iloa lana tala lenā e fai iā Iopu? ‘Faifai ia i le Atua ona e oti ai lea.’ Se‘i o tatou vaai pe aiseā, ma aiseā fo‘i na oo ai na puapuaga e tele iā Iopu.

Ua taia Iopu i ma‘i sua

O Iopu o se tagata faamaoni e usiusita‘i iā Ieova. Sa nofo o ia i Usa e lē mamao mai Kanana. Sa alofa tele Ieova iā Iopu, ae e iai le isi e ita tele o ia iā Iopu. Pe e te iloa o ai?

O Satani le Tiapolo. Manatua, o le agelu leaga e ita iā Ieova. O ia na māfua ai ona lē usiusita‘i Atamu ma Eva iā Ieova, ma ua ia manatu e mafai ona ia faia uma isi ia lē usiusita‘i iā Ieova. Ae sa ia mafaia ea? E leai. Se‘i mafaufau i le to‘atele o isi tagata faamaoni sa tatou talanoa i ai. Pe to‘a fia e mafai ona e faaigoaina?

Ina ua feoti Iakopo ma Iosefa, ona avea lea o Iopu ma tagata e sili atu le faamaoni i le lalolagi. Sa faailoa atu e Ieova iā Satani na te lē mafai ona faaleagaina tagata uma lava, i lona fai atu: ‘Vaai iā Iopu ma lona faamaoni mai iā te a‘u.’

‘O loo faamaoni ia,’ o le finau mai lea a Satani, ‘auā ua e faamanuia iā te ia. Ae afai o le a e aveesea ana mea, ona ia faifai ai lea iā te oe.’

Ona fetalai atu lea o Ieova: ‘Ina alu ia. Ave ese uma ana mea. Fai uma mea leaga e te mana‘o e fai iā Iopu. Ona ta vaai lea pe faifai mai iā te a‘u. Ae aua e te fasiotia o ia.’

Muamua, sa faapogaia e Satani ni tamāloloa e gaoi povi ma kamela ma tapē mamoe a Iopu. Ona ia fasiotia lea o ona atalii ma ona afafine e 10 i le afā. Ona taia lea e Satani o Iopu i lona ma‘i leaga tele. Na tigāina Iopu. O le māfuaaga lenā na fai atu ai lana avā: ‘Faifai ia i le Atua ona e oti ai lea.’ Ae sa le faia e Iopu. Sa fai atu fo‘i ana uō pepelo na ola ia i se olaga leaga. Ae na faamaoni pea Iopu.

Na fiafia tele Ieova, mulimuli ane sa ia faamanuia iā Iopu pei ona e vaaia i le ata. Sa ia faamālōlō lona ma‘i. Sa toe i ai le fanau e 10 mananaia a Iopu, ma toe faaluaina le tele o ana povi, mamoe ma kamela e sili i lo ana mea muamua.

Pe o le a e faamaoni iā Ieova e pei o Iopu? Afai o le a e faia, e faamanuia oe e le Atua. O le a e ola e faavavau pe a toe faia ia manaia le lalolagi e pei ona sa i ai i le faato‘aga o Etena.

Iopu 1:1-22; 2:1-13; 42:10-17.

Iopu ma lona aiga


Fesili

  • O ai Iopu?
  • O le ā na taumafai Satani e faia, ae pe faamata na taulau manuia?
  • O le ā na faataga e Ieova Satani e fai, ma aiseā?
  • Aiseā na fai atu ai le avā a Iopu i a te ia e ‘faifai i le Atua ma oti ai’? (Vaai i le ata.)
  • E pei ona e vaaia i le ata lona lua, na faapefea ona faamanuia e Ieova ia Iopu, ma aiseā?
  • Afai tatou te faamaoni e pei o Iopu, o ā faamanuiaga o le a tatou maua?

Fesili faaopoopo

  • Faitau le Iopu 1:1-22.

    E faapefea ona faaa‘oa‘o Kerisiano i aso nei iā Iopu? (Iopu 1:1; Fili. 2:15; 2 Pete. 3:14)

  • Faitau le Iopu 2:1-13.

    O ā auala eseese e lua na tali atu ai Iopu ma lana avā i sauāga a Satani? (Iopu 2:9, 10; Faata. 19:3; Mika 7:7; Mala. 3:14)

  • Faitau le Iopu 42:10-17.

    E faapefea ona taitutusa taui na mauaina e Iopu ma lea na maua e Iesu ona o le faamaoni? (Iopu 42:12; Fili. 2:9-11)

    E faapefea ona faalaeiauina i tatou i faamanuiaga na maua e Iopu ona o le tumau faamaoni i le Atua? (Iopu 42:10, 12; Epe. 6:10; Iako. 1:2-4, 12; 5:11)