Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 24: Ua Tofotofo e Iosefa Ona Uso

Tala 24: Ua Tofotofo e Iosefa Ona Uso

O IOSEFA sa mana‘o e fia iloa po o sauā pea ma lē alolofa ona uso e to‘a 10. Ona ia fai atu lea: ‘O outou o ni tagata vaavaai leaga. Ua outou fia iloa mea matou te vaivai ai.’

‘Leai, o i matou o ni tagata faamaoni. O le au uso i matou. Sa toa 12, ua leai le tasi ae o le aupito itiiti o loo i le fale ma lo matou tamā,’ o la latou tala lea.

Sa faatagā lē talitonu iai Iosefa iā i latou. Sa ia tuuina le uso e igoa iā Simeona i le falepuipui, ae tuu atu isi e o ma mea‘ai i lo latou aiga. Ae sa ia fai atu iā i latou: ‘Afai tou te toe o mai, aumai lo outou uso la‘itiiti.’

Ina ua latou fo‘i atu i Kanana, sa ta‘u atu e le au uso mea uma na tutupu iā Iakopo. Ua faanoanoa tele Iakopo. Na ia tagi ma faapea: ‘Ua le toe iai Iosefa, ma o lenei fo‘i ua leai atu Simeona. O le a ou le faatagaina outou tou te avea lo‘u atalii la‘itiiti o Peniamina.’ Ae ina ua amata ona uma mea‘ai, ona tuuina atu loa lea e Iakopo ia Peniamina latou te ō i Aikupito ia toe maua mai ni isi mea‘ai.

Ua vaai atu Iosefa ua o mai ona uso. Ua fiafia tele ia e vaai i lona uso la‘itiiti o Peniamina. Ae o le mea moni, e le‘i iai lava se tasi ua na iloa o lenei tagata tāua o Iosefa. Ona fai loa lea e Iosefa se mea e tofotofo ai ona afa uso e toa 10.

Na ia faatonuina ana auauna ia faatutumu uma a latou taga i mea‘ai. Ae na te le‘i faailoa atu iā i latou, sa ia tuu lana ipu ario faapitoa i le taga mea‘ai a Peniamina. Ina ua latou o ese atu i sina mamao i le auala, ona aauina atu lea e Iosefa ana auauna ia i latou. Ona fai atu lea o auauna a Iosefa: ‘Ai se ā ua outou gaoia ai le ipu ario a lo matou matai?

‘Matou te le‘i gaoia sana ipu,’ o la latou tali lea. ‘Afai e maua lenā ipu i soo se isi o i matou, ia fasiotia lenā tagata.

Ona su‘e lea e auauna ato uma, ona latou maua lea o le ipu i le taga a Peniamina, e pei ona e vaai atu iai. Ona fai atu lea o auauna: ‘E mafai ona ō isi o outou, ae toe fo‘i mai Peniamina ma i matou.’ O le ā le mea o le ā faia nei e uso e toa 10?

Ona latou toe fo‘i uma atu lea ma Peniamina iā Iosefa. Ona fai atu lea o Iosefa: ‘E mafai ona outou ō ae nofo Peniamina e fai ma a‘u pologa.’

Ona fai atu lea o Iuta: ‘Afai matou te toe fo‘i e aunoa ma le tama, o le a oti lo‘u tamā auā e alofa tele i ai o ia. O lea faamolemole, ia tuu a‘u e fai ma pologa, ae tuu atu le tama e alu.’

Ua iloa e Iosefa ua suia ona uso. Ua le toe sauā ae ua alolofa. Se‘i o tatou su‘eina po o le a le mea ua fai nei e Iosefa.

Kenese 42:9-38; 43:1-34; 44:1-34.

Ua tuua‘ia uso o Iosefa


Fesili

  • Aiseā na tuua‘ia ai e Iosefa ona uso o tagata vaavaai leaga?
  • Aiseā na tuuina atu ai e Iakopo lona atalii la‘itiiti o Peniamina e alu i Aikupito?
  • Na faapefea ona oo le ipu ario a Iosefa i le taga mea‘ai a Peniamina?
  • O le ā na ofo atu Iuta e fai ina ia tuu atu Peniamina e alu?
  • Ua faapefea ona suia uiga o uso o Iosefa?

Fesili faaopoopo

  • Faitau le Kenese 42:9-38.

    E faapefea ona avea upu a Iosefa o i le Kenese 42:18 ma faamanatuga lelei mo ē e iai tiute tauave i le faalapotopotoga a Ieova i aso nei? (Nee. 5:15; 2 Kori. 7:1, 2)

  • Faitau le Kenese 43:1-34.

    E ui o Reupena le ulumatua, ae e faapefea ona iloa o Iuta na tautala e fai ma sui o ona uso? (Kene. 43:3, 8, 9; 44:14, 18; 1 No. 5:2)

    Na faapefea ona tofotofoina e Iosefa ona uso, ma aiseā? (Kene. 43:33, 34)

  • Faitau le Kenese 44:1-34.

    I se togafiti ina ia lē iloa ai e ona uso o ia, o le ā na fai atu ai Iosefa e faatatau iā te ia lava? (Kene. 44:5, 15; Levi. 19:26)

    Na faapefea ona faaalia e uso o Iosefa ua lē toe iai ni o latou faalogona lotovale lea na iai muamua i lo latou uso? (Kene. 44:13, 33, 34)