Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 23: Miti a Farao

Tala 23: Miti a Farao

E LUA tausaga na mavae a o iai pea Iosefa i le falepuipui. E le‘i manatua lava e le tautū uaina o ia. I le tasi pō na fai ai e Farao ni miti faapitoa se lua, ma sa ia taumatea po o ā ona uiga. Po o e vaai atu i ai o loo moe o ia i ina? O le isi taeao sa valaau ai e Farao tagata popoto uma ma ta‘u atu i ai ana miti. Ae sa latou le mafai ona faamatalaina uiga o miti.

Ona toe manatua mulimuli ane ai lea e le tautū uaina Iosefa. Ua ia fai atu iā Farao: ‘A o ou i ai i le falepuipui, sa iai se tagata na te mafai ona ia faamatala miti.’ Ona aumai faavave ai lea e Farao o Iosefa.

Ona faamatala lea e Farao o ana miti iā Iosefa: ‘Na ou iloa ni povi pepeti e fitu. Ona ou toe iloa ai lea o povi paeee e fitu. Ona ‘aina uma lea e povi paeee o povi pepeti.’

O loo fai le miti a Farao

‘I la‘u miti lona lua sa ou iloa ai, o ‘au saito e fitu ua tutupu mai i le ‘au e tasi, ua matutua. Ona ou iloa ai lea o ‘au saito e fitu e tino leaga ua mamago. Ua ‘aina fo‘i e ‘au saito tino leaga o ‘au saito e fitu matutua.’

Ona fai atu lea o Iosefa i a Farao: ‘E tutusa lava uiga o na miti e lua. O povi pepeti e fitu ma ‘au saito matutua e fitu o tausaga ia e fitu, ae o povi tino leaga ma le paeee e fitu ma ‘au saito tino leaga e fitu o isi na o tausaga ua toe faaopoopo atu i ai. E fitu tausaga o le a tele ai mea‘ai i Aikupito. Ona sosoo ai lea ma le isi fitu o tausaga e oge ai.’

Ona fai atu lea o Iosefa iā Farao: ‘Filifili se tagata poto e pule i le aoaoina mai o mea‘ai i tausaga lelei e fitu. Ona le fia aai ai lea o tagata i le isi fitu o tausaga leaga e lāiti mea‘ai e ola ai.’

Sa fiafia iai Farao i lea manatu. Ma sa ia filifilia ai Iosefa ina ia aoaoina mai mea‘ai ma faaputu. Na avea Iosefa ma se tagata tāua e pito atu iā Farao i Aikupito.

Valu tausaga mulimuli ane ai, i le taimi o le oge, sa vaai atu Iosefa ua o mai ni tamāloloa. Pe e te iloa o ai i latou? O ona uso matutua e to‘a 10! Sa auina atu i latou e lo latou tamā o Iakopo e ō i Aikupito talu ai ua leai ni a latou mea‘ai i lo latou aiga i Kanana. Sa iloa lelei e Iosefa ona uso ae latou te le‘i iloaina o ia. Pe e te iloaina aiseā? Talu ai ona ua tupu ma ua matua Iosefa, ma ua ofu fo‘i o ia i ni ofu ese.

Ua manatua e Iosefa a o la‘itiiti sa fai lana miti e o mai ona uso ma ifo atu iā te ia. Pe e te manatua sa e faitauina lenā mea? Ua mafai nei e Iosefa ona iloa sa auina atu o ia e le Atua i Aikupito, ona o se māfuaaga lelei. O le ā e te manatu na fai e Iosefa? Se‘i o tatou vaai.

Kenese 41:1-57; 42:1-8; 50:20.



Fesili

  • O le ā na tupu iā Farao i le tasi pō?
  • Aiseā na toe manatua mulimuli ane ai e le tautū uaina ia Iosefa?
  • E pei ona vaaia i le ata, o ā miti e lua na fai e Farao?
  • O le ā le uiga o miti na ta‘u atu e Iosefa?
  • Na faapefea ona avea Iosefa ma se tagata tāua e pito atu iā Farao i Aikupito?
  • Aiseā na o mai ai uso o Iosefa i Aikupito, ma aiseā ua latou le iloaina ai o ia?
  • O le ā le miti na manatua e Iosefa, ma o le ā ua mafai ona ia malamalama ai?

Fesili faaopoopo

  • Faitau le Kenese 41:1-57.

    Na faapefea ona faaua‘i e Iosefa manatu o tagata iā Ieova, ma e faapefea ona faaa‘oa‘o Kerisiano i aso nei i lana faaa‘oa‘oga? (Kene. 41:16, 25,28; Mata. 5:16; 1 Pete. 2:12)

    E faapefea i tausaga o le matuā tele o mea‘ai ma tausaga o le oge ona faaalia ai ma le sa‘o le eseesega o le tulaga faaleagaga o tagata o Ieova i aso nei ma ē ua ta‘ua o Kerisiano? (Kene. 41:29, 30; Amo. 8:11, 12)

  • Faitau le Kenese 42:1-8 ma le 50:20.

    Pe e sesē mo tagata tapua‘i o Ieova ona ifo i se tagata e faaalia ai lo latou amana‘ia o lona tulaga pe afai o tū ma aga na a le atunuu? (Kene. 42:6)