Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 22: Ua Tuu Iosefa i le Falepuipui

Tala 22: Ua Tuu Iosefa i le Falepuipui

O IOSEFA sa na o le 17 tausaga ina ua ave o ia i Aikupito. O i ina na faatau atu ai o ia iā Potifara. E galue Potifara mo le tupu o Aikupito, e ta‘ua o Farao.

Iosefa i le falepuipui

Sa galue malosi Iosefa mo lona matai o Potifara. Ma ina ua matua Iosefa, sa tuu atu i ai e Potifara le vaaiga atoa o lona aiga. Ae, aiseā ua i ai nei Iosefa i le falepuipui? Talu ai ona o le avā a Potifara.

Sa tupu a‘e Iosefa ma avea ma tama aulelei, ma sa mana‘o le avā a Potifara la te momoe. Peita‘i na iloa e Iosefa e leaga lenei mea, ma e lē mafai ona ia faia. Sa ita tele le avā a Potifara ma pepelo ai i lana tane ina ua fo‘i mai ma faapea atu: ‘O le tamāloa leaga lenā o Iosefa sa taumafai o ia ma te momoe!’ Sa talitonu Potifara i lana avā, ma ua ita tele o ia iā Iosefa. Ma ave ai loa Iosefa e tuu i le falepuipui.

Sa tofia e le pule o le falepuipui Iosefa e vaaia isi pagota uma ona o ia o se tagata lelei. Mulimuli ane ona ita ai lea o Farao i lana tautū uaina ma lana fai mea‘ai, ma tuu atu i le falepuipui. I le tasi pō sa fai ai ni a la miti faapitoa, ae sa la lē iloa le uiga. I le aso na sosoo ai sa faapea atu ai Iosefa: ‘Ta‘u mai iā te a‘u a oulua miti.’ Ma ina ua la ta‘uina, na mafai e Iosefa faatasi ma le fesoasoani a le Atua ona faamatala le uiga o a la miti.

Sa fai atu Iosefa i le tautū uaina: ‘Toe tolu aso ona tatalaina lea o oe mai le falepuipui, ma toe fai oe ma tautū uaina a Farao. Afai e tatala atu oe, faamatala atu a‘u iā Farao, ma fesoasoani mai iā te a‘u ia ou alu ese mai lenei nofoaga.’ Ae i le fai mea‘ai, sa fai atu Iosefa: ‘Toe tolu aso ona tipiesea lea e Farao o lou ulu.’

I le lona tolu o aso na tupu ai e pei lava ona fai atu ai Iosefa. Na vavaeeseina e Farao le ulu o le fai mea‘ai. Ae na tatalaina le tautū uaina ma toe auauna mo le tupu. Peita‘i ua galo i le tautū uaina Iosefa! Sa ia le‘i ta‘uina atu o ia iā Farao, ma sa nofo ai pea Iosefa i le falepuipui.

Kenese 39:1-23; 40:1-23.



Fesili

  • E fia tausaga o Iosefa ina ua ave i Aikupito, ma o le ā na tupu ina ua taunuu i ina?
  • Aiseā na tuu ai Iosefa i le falepuipui?
  • O le ā na tofia Iosefa e fai a o iai i le falepuipui?
  • O le ā na faia e Iosefa i le falepuipui mo le tautū uaina ma le fai mea‘ai a Farao?
  • O le ā na tupu ina ua tatalaina le tautū uaina mai le falepuipui?

Fesili faaopoopo

  • Faitau le Kenese 39:1-23.

    Talu ai e le‘i iai se tulafono tusitusia a le Atua e faasā ai le mulilua i aso o Iosefa, aiseā na sola ese ai Iosefa mai le avā a Potifara? (Kene. 2:24; 20:3; 39:9)

  • Faitau le Kenese 40:1-23.

    Ia faamatala puupuu le miti a le tautū uaina ma lona faamatalaga lea na maua e Iosefa mai iā Ieova. (Kene. 40:9-13)

    O le ā le miti a le fai mea‘ai, ma o le ā lona uiga? (Kene. 40:16-19)

    Ua faapefea ona faaa‘oa‘o le auauna faamaoni ma le mafaufau i aso nei i uiga na faaalia e Iosefa? (Kene. 40:8; Sala. 36:9; Ioa. 17:17; Galu. 17:2, 3)

    Ua faapefea ona faamalamalama e le Kenese 40:20 le manatu o Kerisiano i le faamanatuina o aso fanau? (Fai. 7:1; Mare. 6:21-28)