Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 19: To‘atele le Aiga o Iakopo

Tala 19: To‘atele le Aiga o Iakopo
Iakopo ma ona atalii

SEI vaai atu i lenā aiga e to‘atele. O atalii na e toa 12 o Iakopo. Sa i ai fo‘i ni ona afafine. Pe e te iloa se igoa o ia tamaiti? Se‘i o tatou a‘oa‘oina nisi o ō latou igoa.

Na fanaua e Lea o Reupena, Simeona, Levi ma Iuta. Ina ua leai se fanau a Rasela ona ia avatu lea o lana auauna fafine o Pila iā Iakopo, ma ua fanaua mai ai Tanu ma Nafatali. Ona nonofo fo‘i lea o Iakopo ma Selepa le auauna fafine a Lea, ona fanaua ai lea o Kato ma Asera. Ona toe fanaua fo‘i lea e Lea o Isakara ma Sepulona.

Mulimuli ane, ona fanau ai lea e Rasela o se tama. Sa ia faaigoa iā Iosefa. Mulimuli ane, o le a tatou a‘oa‘oina po o ai Iosefa, auā o ia o se tagata tāua tele. O atalii na e toa 11 na fanaua e Iakopo a o nonofo ma le tamā o Rasela o Lapana.

Sa i ai fo‘i nisi afafine o Iakopo, ae na o le tasi lava le igoa ua aumaia e le Tusi Paia. O lona igoa o Tina.

Na oo ai le taimi e filifili ai Iakopo e tuua Lapana ae toe alu atu i Kanana. Ona ia faapotopoto ai lea o lona aiga e to‘atele ma ana lafu mamoe ma povi, ma amata le malaga umi.

Ina ua toe nonofo le aiga o Iakopo mo se vaitaimi i Kanana, ona toe fanau ai lea e Rasela se isi tama. Na tupu lenei mea a o latou malaga. Sa faigatā tele mo Rasela ma i‘u lea i lona oti, a o fanau. Ae sa le afāina le pepe tama. Sa faaigoa e Iakopo o Peniamina.

Tatou te fia manatua igoa o atalii e 12 o Iakopo auā na tutupu mai ai le nuu o Isaraelu. O ituaiga e 12 o Isaraelu sa faaigoa mai atalii e toa 10 o Iakopo ma atalii e to‘alua o Iosefa. Sa ola Isaako mo tausaga e tele ina ua mavae le fananau mai o ia tama, ma sa fiafia o ia i le tele o atalii a lona atalii. Ae se‘i o tatou vaai i le mea na tupu i le afafine a lona atalii o Tina lea.

Kenese 29:32-35; 30:1-26; 35:16-19; 37:35.



Fesili

  • O ai igoa o atalii e to‘aono o Iakopo i lana avā muamua o Lea?
  • O ai atalii e to‘alua o Iakopo na fanauina e le auauna fafine a Lea o Selepa?
  • O ai igoa o atalii e to‘alua o Iakopo na fanauina e le auauna fafine a Rasela o Pila?
  • O ai igoa o le fanau tama e to‘alua a Rasela, ma o le ā na tupu ina ua fanau le tama lona lua?
  • E tusa ai o le ata, e to‘a fia atalii o Iakopo ma o ai na tupuga mai iā i latou?

Fesili faaopoopo

  • Faitau le Kenese 29:32-35; 30:1-26; ma le 35:16-19.

    E pei ona faaalia i atalii e to‘a 12 o Iakopo, e masani faapefea ona faaigoa tama Eperu i aso anamua?

  • Faitau le Kenese 37:35.

    E ui lava e na o Tina o loo ta‘ua i le Tusi Paia, ae e faapefea ona tatou iloa na iai isi afafine o Iakopo? (Kene. 37:34, 35)