Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 17: Masaga sa Eseese i La‘ua

Tala 17: Masaga sa Eseese i La‘ua
Esau

O TAMA e to‘alua o loo i inei e eseese i la‘ua. Pe e te iloaina o la igoa? O Esau e tulimanu, ae o le tama na e tausia mamoe o Iakopo.

O Esau ma Iakopo o le masaga a Isaako ma Repeka. Sa fiafia tele le tamā iā Esau auā o ia o sē e tulimanu lelei ma na te mauaina mai mea e fai ai mea‘ai i le aiga. Ae sa sili le alofa o Repeka iā Iakopo auā e filemu, ma o ia fo‘i o se tama e lē gaoiā.

Sa ola pea le tamā o lo la tamā o Aperaamo, ma e fiafia Iakopo e faalogo iā te ia a o talanoa iā Ieova. Ona oti ai lea o Aperaamo ina ua 175 ona tausaga ae ua ta‘i 15 tausaga le matutua o le masaga.

Ina ua 40 tausaga o Esau sa nofo o ia i fafine e to‘alua mai i Kanana. Sa avea ma mea e faanoanoa ai Isaako ma Repeka, auā o na fafine e le‘i tapua‘i atu iā Ieova.

O le mea lenei sa tupu na māfua ai ona ita Esau i lona uso o Iakopo. Ua oo mai le taimi e avatu ai e Isaako le faamanuiaga i lona atalii matua. Ona e matua Esau iā Iakopo, sa faatalitalia ai e Esau o ia e mauaina le faamanuiaga. Peita‘i ua uma ona faatau atu e Esau le aiā e maua ai le faamanuiaga iā Iakopo. E le gata i lea, ae ina ua fananau mai nei tama e to‘alua sa ta‘u atu e le Atua e maua e Iakopo le faamanuiaga. Sa avatu loa e Isaako le faamanuiaga i lona atalii o Iakopo.

Iakopo

Mulimuli ane, ina ua iloa e Esau lenei mea ona ita ai lea o ia iā Iakopo. Sa ita tele o ia ma faapea ai o le a ia fasiotia Iakopo. Ina ua faalogo i ai Repeka, ona popole ai lea o ia. Ona ia faapea atu lea iā Isaako: ‘O le a leaga tele pe afai e faaipoipo Iakopo i se tasi o nei fafine o i Kanana.’

Ona valaau atu lea o Isaako iā Iakopo ma fai atu i ai: ‘Aua e te faaipoipo i se fafine Kanana. Ae ia e alu i le aiga o le tamā o lou tinā o Petueli i Karana ma e faaipoipo i se tasi o afafine o lona atalii o Lapana.

Sa faalogo Iakopo i lona tamā, ma sa alu loa sana malaga umi i le mea o nonofo ai lona ‘auaiga i Karana.

Kenese 25:5-11, 20-34; 26:34,35; 27:1-46; 28:1-5; Eperu 12:16,17.



Fesili

  • O ai Esau ma Iakopo, ma na faapefea ona eseese i la‘ua?
  • Na ta‘i fia tausaga o Esau ma Iakopo ina ua oti Aperaamo, le tamā o lo la tamā?
  • O le ā na faia e Esau lea na avea ma mea e faanoanoa ai lona tinā ma lona tamā?
  • Aiseā na ita ai Esau i lona uso o Iakopo?
  • O le ā le faatonuga a Isaako i lona atalii o Iakopo?

Fesili faaopoopo

  • Faitau le Kenese 25:5-11, 20-34.

    O le ā na valoia e Ieova e faatatau i le fanau tama e to‘alua a Repeka? (Kene. 25:23)

    O le ā le eseesega o manatu o Iakopo ma Esau e faatatau i le tofi o le ulumatua? (Kene. 25:31-34)

  • Faitau le Kenese 26:34, 35; 27:1-46; ma le 28:1-5.

    O le ā e faamaonia ai le lē talisapaia e Esau o mea faaleagaga? (Kene. 26:34, 35; 27:46)

    Ina ia maua e Iakopo le faamanuiaga a le Atua, o le ā na ta‘u atu e Isaako iā te ia e fai? (Kene. 28:1-4)

  • Faitau le Eperu 12:16, 17.

    O le ā ua faaalia e le faaa‘oa‘oga a Esau e uiga i āuga e oo i tagata e manatu faatauvaa i mea paia?