Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 14: Tofotofoina e le Atua le Faatuatua o Aperaamo

Tala 14: Tofotofoina e le Atua le Faatuatua o Aperaamo

PE E te iloa le mea o loo faia e Aperaamo i inei? O loo iā te ia se naifi, ma e foliga mai e pei o le a ia fasiotia lona atalii. Aiseā o le ā ia faia ai lenā mea? Muamua, se‘i o tatou vaai pe na faapefea ona maua e Aperaamo ma Sara la lā tama.

Ua avatu e Aperaamo Isaako e fai ai le taulaga

Manatua, na tautō atu le Atua iā te i la‘ua o le a i ai se la tama. Peita‘i ua matutua tele Aperaamo ma Sara. Ae e ui i lea sa talitonu Aperaamo e mafai e le Atua ona faia mea e foliga mai e lē mafai. O le ā la sa tupu?

Ua mavae le tausaga talu ona faia e le Atua lana folafolaga. Ma ina ua 100 tausaga o Aperaamo ae 90 tausaga o Sara, sa fanau loa Isaako. Sa tausia pea e le Atua lana folafolaga!

Peita‘i ina ua matua Isaako, sa tofotofoina e Ieova le faatuatua o Aperaamo. Sa ia valaau mai: ‘Aperaamo! Ave lou atalii e to‘atasi, o Isaako, ma e alu atu i le mauga o le a ou faasino atu iā te oe. O i ina e te fasiotia ai lou atalii ma e osia ai se taulaga.’

O se tala faanoanoa tele lenā mo Aperaamo, talu ai sa alofa tele o ia i lona atalii. Ma manatua, na tautō atu le Atua o le a ola lana fanau i le nuu o Kanana. E faapefea la ona taunuu pe afai o le a oti Isaako? Sa lē malamalama Aperaamo ae na usiusita‘i pea i le Atua.

Ina ua oo atu i la‘ua i le mauga, ona saisai ai lea e Aperaamo o Isaako ma tuu i luga o le fata faitaulaga sa ia faia. Ona ia tago lea i le naifi o le a fasioti i lona atalii. Ae na valaau mai le agelu a le Atua: ‘Aperaamo, Aperaamo!’

‘Aua nei oo lou lima i le tama,’ sa tulei mai ai le Atua. ‘Ma ua ou iloa nei e te faatuatua mai iā te a‘u, auā ua e lē taofia lou atalii, lou atalii e to‘atasi, mai iā te a‘u.’

Sa tele le faatuatua o Aperaamo i le Atua! Na ia talitonu e mafai e Ieova ona faatūina mai Isaako mai le oti. Ae e le‘i finagalo moni le Atua ia fasiotia Isaako. Sa faalavelavea loa e le Atua se tama‘i mamoe i le togāvao latalata ane, ma sa ia fai atu iā Aperaamo na te faaaogāina e sui ai lona atalii.

Kenese 21:1-7; 22:1-18.



Fesili

  • O le ā na tautō atu ai le Atua iā Aperaamo, ma na faapefea ona tausia e le Atua lana folafolaga?
  • E pei ona vaaia i le ata, na faapefea ona tofotofoina e le Atua le faatuatua o Aperaamo?
  • O le ā na faia e Aperaamo e ui lava sa lē malamalama o ia i le māfuaaga mo le faatonuga a le Atua?
  • O le ā na tupu ina ua tago Aperaamo i le naifi o le a fasioti lona atalii?
  • Na faape‘ī le malosi o le faatuatua o Aperaamo i le Atua?
  • O le a na saunia e le Atua mo le taulaga a Aperaamo, ma e faapefea?

Fesili faaopoopo

  • Faitau le Kenese 21:1-7.

    Aiseā na peritome ai e Aperaamo lona atalii i le aso lona valu? (Kene. 17:10-12; 21:4)

  • Faitau le Kenese 22:1-18.

    Na faapefea ona faaalia e Isaako lona gaua‘i i lona tamā o Aperaamo, ma e faapefea ona faaata e lenei mea se mea e sili atu ona tāua o le a tupu i le lumana‘i? (Kene. 22:7-9; 1 Kori. 5:7; Fili. 2:8, 9)

Faitau Atili

FAAA‘OA‘O I LO LATOU FAATUATUA

Aperaamo—“Tamā o i Latou Uma e Faatuatua”

Sa faapefea ona faaalia e Aperaamo le faatuatua? O ā auala e te mana‘o e faaa‘oa‘o ai i le faatuatua o Aperaamo?