Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 31: Ō Mose ma Arona e Vaai Farao

Tala 31: Ō Mose ma Arona e Vaai Farao

INA ua toe fo‘i atu Mose i Aikupito, sa ia ta‘u atu i lona uso o Arona ia vavega uma. Ma ina ua faaali e Mose ma Arona i tagata Isaraelu ia vavega uma, na talitonu uma tagata o loo i ai Ieova ma i latou.

Ona o atu lea o Mose ma Arona e vaai Farao. Sa la faapea atu: ‘Ua tulei mai Ieova le Atua o Isaraelu, “Tuu mai o‘u tagata e ō mo aso e tolu ina ia tapua‘i mai i a te a‘u i le vao.”’ Ae na tali mai Farao: ‘Ou te lē talitonu iā Ieova. Ma ou te lē tuuina atu Isaraelu e ō.’

Sa ita Farao, auā ua manana‘o tagata e mālōlō mai galuega ae tapua‘i iā Ieova. O lea la sa atili ai ona faafaigaluega tigāina i latou. Sa tuua‘ia e Isaraelu Mose i mea leaga ua oo iā i latou, ona faanoanoa lea o Mose. Ae sa fai atu Ieova e aua le popole. ‘O le a ou faia se mea ina ia faataga mai ai e Farao o‘u tagata e ō.’

Mose ma Arona i luma o Farao

Ona toe ō atu lea o Mose ma Arona iā Farao. Ma sa la faia ai se vavega. Sa togi i lalo e Arona lona tootoo ma liu gata ai. Peita‘i sa o mai fo‘i le ‘aupopoto a Farao ma togi i lalo a latou tootoo ma liu gata fo‘i. Ae sei vaai! Ua ai e le gata a Arona gata uma a le au popoto. Ae sa le‘i faatagaina pea e Farao tagata Isaraelu e ō.

Ua tatau nei ona a‘oa‘oina e Ieova Farao i se lesona. Pe e te iloaina na faapefea? E ala i le aumaia o ni mala e 10, po o puapuaga e tele, i Aikupito.

Ina ua uma le tele o mala, sa aami atu loa e Farao Mose, ma fai atu: ‘Ia taofi le mala, ona ou faataga ai lea o Isaraelu e ō.’ Ae afai e uma le mala, e sui fo‘i le manatu o Farao. E lē tuuina atu loa Isaraelu e ō.

Pe e te iloaina ia mala uma e 10? Se‘i tatou a‘oa‘oina i latou.

Esoto 4:27-31; 5:1-23; 6:1-13, 26-30; 7:1-13.



Fesili

  • O le ā le aafiaga o vavega na faia e Mose ma Arona i tagata Isaraelu?
  • O le ā na fai atu ai Mose ma Arona iā Farao, ma o le ā le tali a Farao?
  • E pei ona vaaia i le ata, o le ā na tupu ina ua togi i lalo e Arona lona tootoo?
  • Na faapefea ona a‘oa‘oina e Ieova Farao i se lesona, ma o le ā le tali a Farao?
  • O le ā na tupu ina ua uma le mala lona sefulu?

Fesili faaopoopo

  • Faitau le Esoto 4:27-31 ma le 5:1-23.

    O le ā le uiga o le tala a Farao e faapea: “Ou te le‘i iloa Ieova”? (Eso. 5:2; 1 Samu. 2:12; Roma 1:21)

  • Faitau le Esoto 6:1-13, 26-30.

    O le ā le uiga e faapea e le‘i faailoa atu e Ieova ia lava iā Aperaamo, Isaako ma Iakopo? (Eso. 3:13, 14; 6:3; Kene. 12:8)

    O ā ni o tatou faalogona i le iloa faapea, na faaaogā pea e Ieova Mose e ui lava na manatu Mose e lē agavaa i le tofiga na tofia ai o ia? (Eso. 6:12, 30; Luka 21:13-15)

  • Faitau le Esoto 7:1-13.

    Ina ua ta‘u atu ma le lototele e Mose ma Arona le faamasinoga a Ieova iā Farao, o le ā le faaa‘oa‘oga ua la faia mo auauna a le Atua i aso nei? (Eso. 7:2, 3, 6; Galu. 4:29-31)

    Na faapefea ona faaalia e Ieova e sili atu o ia na i lo atua o Aikupito? (Eso. 7:12; 1 No. 29:12)