Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 29: Aiseā na Sola ai Mose

Tala 29: Aiseā na Sola ai Mose

VAAI iā Mose lenā ua sola ese mai Aikupito. Pe e mafai ona e iloa atu tamāloloa na e tuli i a te ia? Pe e te iloa le māfuaaga na la‘ua fia fasioti ai Mose? Sei o tatou vaai.

Ua sola Mose mai Aikupito

Sa ola a‘e Mose i le fale o le tupu o Aikupito. Na avea o ia ma se tagata poto tele ma le maualuga. Na iloa lelei e Mose e lē o ia o se Aikupito, ae o ona mātua moni o ni pologa Isaraelu.

Ina ua 40 ona tausaga, na manatu ai Mose sei alu e vaai pe o faapefea mai ona tagata. Sa leaga tele le tausiga o i latou. Sa ia vaai o sasaina e le Aikupito se pologa Isaraelu. Ona tilotilo solo lea o Mose, ma ina ua ia iloa e leai se isi o tilotilo mai sa ia tāina loa le Aikupito, ma oti ai. Sa nanā loa o Mose i lē na sesē i lalo o le oneone.

I le aso na sosoo ai na toe alu ai Mose e vaai i ona tagata. Sa ia manatu e mafai ona ia fesoasoani iā i latou ia aua ne‘i toe avea ma ni pologa. Peita‘i sa ia iloa ni tamāloloa Isaraelu se to‘alua o taua‘imisa, ona fai atu lea o Mose i lē na sesē: ‘Aiseā ua e fasia ai lou uso?’

Sa fai atu le tamāloa: ‘O ai na tofia oe e fai ma pule ma faamasino?’ Pe o le a e fasiotia ea a‘u e pei ona e faia i lenā Aikupito?’

Ua fefe nei Mose. Ua ia iloa ua maua e tagata le mea sa ia faia i le Aikupito. Ua iloa fo‘i e Farao, ma sa ia aauina atu tagata latou te fasioti iā Mose. O le māfuaaga lenā na tatau ai ona sola ese Mose mai Aikupito.

Ina ua tuua e Mose Aikupito, sa ia sola mamao i le nuu o Mitiana. O i ina na ia fetaui ai ma le aiga o Ietero, ma faaipoipo atu i lona afafine o Sepora. Na avea Mose ma leoleo mamoe ma sa ia tausia mamoe a Ietero. E 40 tausaga na ia ola ai i le nuu o Mitiana. Ua 80 ai nei ona tausaga. Ona oo lea i le tasi aso, a o leoleoina e Mose mamoe a Ietero, na tupu ai se mea uiga ese na suia ai le olaga atoa o Mose. Sei o tatou vaai po o le a lenei mea uiga ese.

Esoto 2:11-25; Galuega 7:22-29.



Fesili

  • O fea na ola a‘e ai Mose, ma o le ā na ia iloa e faatatau i ona mātua?
  • O le ā na faia e Mose ina ua 40 ona tausaga?
  • O le ā na fai atu ai Mose i se tamāloa Isaraelu na taua‘imisa ma se isi tamāloa, ma o le ā le tali a le tamāloa?
  • Aiseā na sola ese ai Mose mai Aikupito?
  • O fea na sola i ai Mose, ma o ai na fetaui ai i ina?
  • O ā mea na faia e Mose i tausaga e 40 ina ua sola ese mai Aikupito?

Fesili faaopoopo

  • Faitau le Esoto 2:11-25.

    E ui i le tele o tausaga na a‘oa‘oina ai i le poto o tagata Aikupito, na faapefea ona faaalia e Mose lona faamaoni iā Ieova ma ona tagata? (Eso. 2:11, 12; Epe. 11:24)

  • Faitau le Galuega 7:22-29.

    O le ā le lesona tatou te a‘oa‘oina mai ina ua taumafai Mose i lona lava malosi e lavea‘i Isaraelu mai le nofo pologa i Aikupito? (Galu. 7:23-25; 1 Pete. 5:6, 10)