Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 21: ‘Ino‘ino Uso o Iosefa iā te Ia

Tala 21: ‘Ino‘ino Uso o Iosefa iā te Ia

SEI vaai atu i le faanoanoa ma le leai o se faamoemoe ua i ai nei iā Iosefa. Faato‘ā uma lava ona faatau atu o ia e ona uso i tamāloloa o loo malaga atu i Aikupito. O i ina o le a fai ai Iosefa ma pologa. Ua faia e ona uso lenā mea leaga talu ai ua loto leaga i latou iā Iosefa.

Ua faatau atu Iosefa e ona uso

Sa fiafia tele lo latou tama o Iakopo iā Iosefa. Na faaalia e ala i lona faia o se ofu talaloa umi lava manaia mo ia. Ina ua iloa e le toa 10 o ona uso le alofa tele o Iakopo iā Iosefa, ona amata lea ona lotoleaga ma feita iā te ia. Ae e i ai fo‘i le isi māfuaaga na latou feita ai iā te ia.

E lua ni miti na faia e Iosefa. I miti uma ia e lua, o ona uso o loo ifo atu iā te ia. Ina ua ta‘u atu e Iosefa i ona uso ua atili ona tupu ai lo latou feita.

O le tasi aso a o vaaia e uso matutua o Iosefa mamoe a lo latou tamā, sa fai atu Iakopo e alu e vaai po o faapefea mai i latou. Ina ua iloa atu e uso o Iosefa ua sau o ia ona fai mai ai lea o isi: ‘Se‘i o tatou fasioti iā te ia!’ Ae fai mai Reupena le tama pito i matua: ‘Leai, aua le faia lenā mea!’ Ona latou pu‘e ai lea o Iosefa ma lafo i se pū ua leai ni vai. Ona latou filifili ai lea po o le a le mea e tatau ona fai iā te ia.

I lenā taimi na o mai ai tagata Isamaeli. Sa fai atu Iuta i ona afa uso: ‘Se‘i o tatou faatau atu o ia i tagata Isamaeli.’ Ma sa latou faatauina atu loa Iosefa mo le na o le 20 fasi tupe ario. O se mea leaga ma le lē alofa lenā!

O le ā nei se tala a ona uso i lo latou tamā? Sa latou tapēina le ‘oti ma fufui le ofu talaloa o Iosefa i lona toto. Ona latou avatu lea o le ofu talaloa ma fai atu i lo latou tamā o Iakopo: ‘Sa matou mauaina lenei mea. Vaai i ai pe e lē o le ofu talaloa o Iosefa.’

Na vaai i ai Iakopo, e sa‘o. Ona alaga ai lea o ia ua tagi ma faapea: ‘Ua fasiotia Iosefa e se manu fe‘ai.’ Ma o le mea tonu lenā sa manana‘o i ai uso o Iosefa e mafaufau i ai lo latou tamā. Sa tagi Iakopo i le tele o aso. Ae e le‘i oti Iosefa. Se‘i o tatou vaai po o le a ua tupu iā Iosefa.

Kenese 37:1-35.



Fesili

  • Aiseā na lotoleaga ai uso o Iosefa iā te ia, ma o le ā na latou faia?
  • O le ā na manana‘o uso o Iosefa e fai iā te ia, ae o le ā na fai atu ai Reupena?
  • O le ā na tupu ina ua o mai tagata Isamaeli faatau‘oa?
  • O le ā na faia e uso o Iosefa ina ia manatu ai lo latou tamā ua oti Iosefa?

Fesili faaopoopo

  • Faitau le Kenese 37:1-35.

    E faapefea ona faaa‘oa‘o Kerisiano iā Iosefa i le lipotia o le faia o mea sesē i le faapotopotoga? (Kene. 37:2; Levi. 5:1; 1 Kori. 1:11)

    Aiseā na faalata ai e uso o Iosefa o ia? (Kene. 37:11, 18; Faata. 27:4; Iako. 3:14-16)

    O le ā na faia e Iakopo lea o se gaoioiga masani o le faavauvau? (Kene. 37:35)