Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 15: Sa Tepa i Tua le Avā a Lota

Tala 15: Sa Tepa i Tua le Avā a Lota

O LOTA sa ola faatasi ma lona aiga ma Aperaamo i le nuu o Kanana. O le tasi aso sa faapea atu ai Aperaamo iā Lota: ‘Ua le lava se laueleele i inei mo a tatou manu uma. Se‘i o tatou valavala ia. Alu ia oe i le isi itu ae ou alu i le isi itu.’

Sa filifilia e Lota le tasi vaega o le nuu e manaia tele e i ai vai ma e tele fo‘i vao lelei mo ana manu. O le itumalo lea o Ioritana. Sa tapena loa i ai e Lota lona aiga ma ana manu i ina. Mulimuli ane ona fai ai loa lea o lo latou aiga i le aai o Sotoma.

O tagata o Sotoma sa leaga tele i latou. Ma sa lē fiafia i ai Lota ma le Atua. Mulimuli ane, ona aauina atu lea i ai e le Atua agelu e to‘alua e lapata‘i iā Lota o le a ia faaumatia aai o Sotoma ma Komoro ona o ā latou amio leaga.

Sa faapea atu le agelu iā Lota: ‘Vave! Ia sosola ese ma lau avā ma ou afafine e to‘alua mai i inei!’ Sa fai si faiaga o Lota ma lona aiga, sa fetagofi atu loa agelu i ō latou lima ma ta‘ita‘i ese mai i latou i fafo mai le aai. Ona faapea mai lea o le isi agelu: ‘Tamomo‘e mo o outou ola! Aua le toe pupula i tua. Taufetuli i le mauga.’

Sa usiusita‘i Lota ma ona afafine ma tamomo‘e ese mai Sotoma. Sa latou lē tutū ma tepa i tua mo sina minute. Ae sa lē usita‘i le avā a Lota. Ina ua fai si mamao ese atu ma Sotoma, sa ia tū ai ma toe tepa i tua. Ona liu tupua masima ai lea o ia. Pe e mafai ona e vaai atu i ai i le ata?

E mafai ona tatou a‘oa‘oina mai se lesona tāua i inei. E lavea‘i e le Atua i latou o ē usiusita‘i iā te ia, ae o ē e lē usiusita‘i e maumau o latou ola.

Kenese 13:5-13; 18:20-33; 19:1-29; Luka 17:28-32; 2 Peteru2:6-8.

Sosola Lota mai Sotoma


Fesili

  • Aiseā na valavala ai Aperaamo ma Lota?
  • Aiseā sa filifili ai Lota e nofo i Sotoma?
  • Na faape‘ī tagata Sotoma?
  • O le ā le lapata‘iga na fai atu ai agelu e to‘alua i a Lota?
  • Aiseā na liu tupua masima ai le avā a Lota?
  • O le ā se lesona tatou te a‘oa‘oina mai i le avā a Lota?

Fesili faaopoopo

  • Faitau le Kenese 13:5-13.

    E tusa ai o le fo‘iaina o faafitauli i le va o tagata, o le ā le lesona tatou te a‘oa‘o mai iā Aperaamo? (Kene. 13:8, 9; Roma 12:10; Fili. 2:3, 4)

  • Faitau le Kenese 18:20-33.

    E faapefea ona tatou mautinoa o le a faamasino ma le tonu Ieova ma Iesu pe a fua i le auala na feutaga‘i ai Ieova ma Aperaamo? (Kene. 18:25, 26; Mata. 25:31-33)

  • Faitau le Kenese 19:1-29.

    O le ā ua faaalia mai e lenei tala o le Tusi Paia e faatatau i le silafaga a Ieova i faiga tauatane? (Kene. 19:5, 13; Levi. 20:13)

    O le ā le eseesega ua tatou mātauina i le auala na tali atu ai Lota ma Aperaamo i faatonuga a le Atua, ma o le ā tatou te a‘oa‘oina mai ai? (Kene. 19:15, 16, 19, 20; 22:3)

  • Faitau le Luka 17:28-32.

    O ā faanaunauga sa iai i le avā a Lota e faatatau i meafaitino, ma e faapefea ona avea ma lapata‘iga mo i tatou? (Luka 12:15; 17:31, 32; Mata. 6:19-21, 25)

  • Faitau le 2 Peteru 2:6-8.

    I le faaa‘oa‘o atu iā Lota, o le ā le vaaiga e ao ona iā i tatou e faatatau i le lalolagi faalēmata‘u o loo tatou ola ai? (Eseki. 9:4; 1 Ioa. 2:15-17)