Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 13: Aperaamo − O se Uō a le Atua

Tala 13: Aperaamo − O se Uō a le Atua

O LE tasi o nofoaga sa o i ai tagata ma nonofo ai ina ua uma le lolo o Uro. Na oo ina avea ma aai tāua e i ai ni fale mananaia. Ae o tagata sa i ai i ina sa latou tapua‘i i ni atua sesē. O le auala fo‘i lenā sa latou faia i Papelu. O tagata o Uro ma Papelu sa le pei i latou o Noa ma lona atalii o Semu, sa faaauau pea ona auauna i la‘ua iā Ieova.

E tusa o le 350 tausaga talu ona mavae le lolo, sa maliu loa Noa faamaoni. E na o le lua tausaga mulimuli ane ai ona fanau ai lea o le tamāloa lenā e te vaai atu i ai i le ata. O lona igoa o Aperaamo. Sa nonofo ma lona aiga i le aai lenā o Uro.

O loo tepa i luga Aperaamo i fetu

I le tasi aso sa tulei atu ai Ieova iā Aperaamo: ‘Ia e tuua Uro ma lou aiga ma e alu atu i le nuu o le a ou faasino atu iā te oe.’ Pe sa usita‘i Aperaamo i le Atua ma tuua mea lelei a Uro? Ioe, sa ia faia. Ma ona e usiusita‘i pea Aperaamo i le Atua na iloa ai o ia o se uō a le Atua.

Sa ō faatasi o ia ma isi o lona aiga ina ua ia tuua Uro. Sa alu lona tamā o Tara. Faapena fo‘i Lota le atalii o lona uso ma le avā a Aperaamo o Sara. I sina vaitaimi sa taunuu loa i le nuu e igoa iā Karana, le mea na oti ai Tara. Ua mamao tele mai i latou mai Uro.

Ina ua mavae sina taimi na tuua ai e Aperaamo ma lona aiga ia Karana ona latou taunuu ai lea i Kanana. O i ina na tulei atu ai Ieova: ‘O le nuu lenei ou te avatua i lau fanau.’ Sa nofo Aperaamo i fale ie i Kanana.

Sa amata loa ona fesoasoani le Atua iā Aperaamo ma sa tele lana lafu mamoe ma isi mea ola ma le selau o auauna. Ae o ia ma Sara sa leai se la fanau.

Ina ua 99 tausaga o Aperaamo, sa tulei atu Ieova faapea: ‘Ou te tautō atu o le a avea oe ma tamā o se nuu tele o tagata.’ E mafai faapefea lenei mea ae ua matutua tele Aperaamo ma Sara e toe fai se la tama?

Kenese 11:27-32; 12:1-7; 17:1-8,15-17; 18:9-19.



Fesili

  • O ā ituaiga tagata na nonofo i le aai o Uro?
  • O ai le tamāloa o i le ata, o anafea na fanau ai, ma o fea na nofo ai?
  • O le ā na tulei atu ai Ieova iā Aperaamo e fai?
  • Aiseā na ta‘ua ai Aperaamo o le uō a le Atua?
  • O ai na ō faatasi ma Aperaamo ina ua ia tuua Uro?
  • O le ā na tulei atu ai le Atua iā Aperaamo ina ua taunuu i Kanana?
  • O le ā na tulei atu ai le Atua iā Aperaamo ina ua 99 ona tausaga?

Fesili faaopoopo

  • Faitau le Kenese 11:27-32.

    O le ā le faiā a Aperaamo ma Lota? (Kene. 11:27)

    E ui o loo faapea mai o Tara na aveina lona aiga aga‘i i Kanana, ae e faapefea ona tatou iloa o Aperaamo na faapogaia lenei gaoioiga, ma aiseā na ia faia ai lenā gaoioiga? (Kene. 11:31; Galu. 7:2-4)

  • Faitau le Kenese 12:1-7.

    O le ā le faaopoopoga na faia e Ieova i lana feagaiga ma Aperaamo ina ua taunuu Aperaamo i le nuu o Kanana? (Kene. 12:7)

  • Faitau le Kenese 17:1-8, 15-17.

    Na faapefea ona suia le igoa o Aperamo ina ua 99 ona tausaga, ma aiseā? (Kene. 17:5)

    O ā faamanuiaga na folafola atu e Ieova iā Sara? (Kene. 17:15, 16)

  • Faitau le Kenese 18:9-19.

    I le Kenese 18:19, o ā tiute tauave ua faatulaga mai mo tamā? (Teu. 6:6, 7; Efe. 6:4)

    O le ā na tupu iā Sara e iloa ai e lē mafai ona natia se mea mai iā Ieova? (Kene. 18:12, 15; Sala. 44:21)