Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 9: Faia e Noa se Vaa

Tala 9: Faia e Noa se Vaa
Sa toē tagata iā Noa

O NOA sa i ai lana avā ma atalii e to‘atolu. O igoa o ona atalii o Semu, Hamo ma Iafeta. Sa i ai ni avā a nei tama uma. E to‘avalu la tagata o le aiga o Noa.

Sa fai atu le Atua iā Noa na te faia se mea uiga ese. Sa ta‘u atu i ai na te faia se vaa telē. O lenei mea e pei o se vaa telē, ae foliga mai e pei o se pusa umī lapo‘a. ‘Fai ia tolu ni fogāfale,’ fai mai ai le Atua, ‘ma tuu i ai ni potu.’ O potu mo Noa ma lona aiga, mea ola ma mea‘ai mo i latou uma.

Sa fai atu fo‘i le Atua e fau ia aua ne‘i sao i ai se vai i totonu. Sa ia fai atu fo‘i: ‘O le a ou faatupuina se lolo tele ma faaumatia ai le lalolagi atoa. O tagata uma e lē i ai i totonu o le vaa o le a feoti.’

Sa usita‘i Noa ma ona atalii iā Ieova ma amata loa le galuega. Ae na ona toē mai i ai isi tagata. Sa faaauau pea ona leaga i latou. Sa leai se isi na talitonu iā Noa ina ua ia ta‘u atu le mea o le a faia e le Atua.

O loo aumaia e Noa ma lona aiga manu ma mea‘ai i le vaa

Sa umi se taimi na fausia ai le vaa talu ai e telē tele. Ina ua mavae le tele o tausaga ona māe‘a ai lea. Sa ta‘u atu e le Atua iā Noa e aumai loa mea ola i le vaa. Sa fai atu le Atua ia aumai ta‘i lua mai le ituaiga, o mea ola po‘a ma mea ola fafine. Ae o isi ituaiga o mea ola, sa fai atu le Atua e aumai ta‘i fitu. Sa fai atu fo‘i le Atua iā Noa e aumai ituaiga eseese o manu felelei. Sa faia e Noa mea uma na fai atu ai le Atua.

Mulimuli ane, ona ō lea o Noa ma lona aiga i le vaa. Ona tapunia lea e le Atua le faitoto‘a. Sa faatalitali Noa ma lona aiga i totonu. Pe o le a i ai moni lava se lolo e pei ona sa fai mai ai le Atua?

Kenese 6:9-22; 7:1-9.



Fesili

  • E to‘afia le aiga o Noa, ma o ai igoa o ona atalii e to‘atolu?
  • O le ā le mea uiga ese na fai atu le Atua iā Noa e fai, ma aiseā?
  • O le ā le tali a tagata iā Noa ina ua ia fai iai e faatatau i le vaa?
  • O le ā na ta‘u atu e le Atua iā Noa e faia e faatatau i mea ola?
  • Ina ua tapunia e le Atua le faitoto‘a o le vaa, o le ā na faia e le aiga o Noa?

Fesili faaopoopo

  • Faitau le Kenese 6:9-22.

    O le ā le māfuaaga na matilatila ai Noa o sē e tapua‘i i le Atua moni? (Kene. 6:9, 22)

    O le ā le silafaga a Ieova i faiga sauā, ma e faapefea ona aafia ai faafiafiaga tatou te filifilia? (Kene. 6:11, 12; Sala. 11:5)

    E faapefea ona tatou faata‘ita‘i i a Noa pe a tatou maua ni ta‘iala mai le faalapotopotoga a Ieova? (Kene. 6:22; 1 Ioa. 5:3)

  • Faitau le Kenese 7:1-9.

    E faapefea ona faalaeiauina i tatou i aso nei i le silafaga a Ieova i le tagata lē lelei atoatoa o Noa e faapea, o ia o se tagata amiotonu? (Kene. 7:1; Faata. 10:16; Isa. 26:7)