Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 8: Tagata Tinoeese i le Lalolagi

Tala 8: Tagata Tinoeese i le Lalolagi

AFAI o se tasi e savali atu iā te oe e oo lona umi i le faalo o lo tou fale, o le a sou manatu? O lena tagata o se tagata tinoese! I se isi vaitaimi sa i ai moni lava tagata tinoeese i le lalolagi. Ua faaalia mai i le Tusi Paia, o latou tamā o agelu mai le lagi. Faapefea ona mafai lena mea?

Tagata tinoeese e faasauā

Manatua, o le agelu leaga o Satani sa le filemu o ia i le faia o faalavelave. Sa ia taumafai fo‘i e faaleagaina agelu a le Atua. O isi la taimi, sa amata loa ona faalogo isi agelu iā Satani. Ua le toe faia e i latou galuega a le Atua i le lagi. Ua latou o mai i le lalolagi ma fai tino faaletagata. Pe e te iloa le māfuaaga?

Fai mai le Tusi Paia talu ai ona sa tilotilo mai nei atalii a le Atua ua mananaia tele fafine i le lalolagi ma mananao ai e nonofo ma i latou. Ona latou o mai lea i le lalolagi ma faaipoipo atu i nei fafine. E sesē lenei mea, auā na faia e le Atua agelu ia ola i le lagi.

Ina ua fai ni pepe a agelu ma a latou avā, sa ese lava. I le amataga atonu sa le ese i latou. Ae ua tutupu lapopo‘a ma tetelē, ma malolosi se‘ia oo lava ina avea ma tagata tinoeese.

O nei tagata tinoeese sa leaga tele. Talu ai ua lapopo‘a toe malolosi, latou te mafai ona faaleagaina tagata. Sa latou taumafai ia leaga uma tagata e pei o i latou.

Ua oti Enoka, ae ua i ai se tasi e lelei i le lalolagi. O Noa lona igoa. Na te faia mea uma e fai atu ai le Atua iā te ia e fai.

I se tasi aso na ta‘u atu e le Atua iā Noa ua oo mai le taimi e faaumatia ai tagata leaga. Ae na te lavea‘ia Noa, lona aiga ma le tele o isi meaola. Se‘i o tatou vaai pe na faapefea ona faia e le Atua lenei mea.

Kenese 6:1-8; Iuta 6.



Fesili

  • O le ā na tupu ina ua faalogo isi agelu a le Atua iā Satani?
  • Aiseā na le toe faia ai e isi agelu a latou galuega i le lagi ae latou o mai i le lalolagi?
  • Aiseā e sesē ai mo agelu ona o mai i le lalolagi ma fai o latou tino faaletagata?
  • O le ā na ese ai fanau a agelu?
  • E pei ona e vaai i le ata, o le ā na faia e fanau a agelu ina ua avea i latou ma tagata tinoeese?
  • Ina ua mavae Enoka, o ai le tagata lelei na ola i le lalolagi, ma aiseā na fiafia ai le Atua iā te ia?

Fesili faaopoopo

  • Faitau le Kenese 6:1-8.

    O le ā ua faailoa mai e le Kenese 6:6 e faatatau i le auala e aafia ai le finagalo o Ieova ona o a tatou amio? (Sala. 78:40, 41; Faata. 27:11)

  • Faitau le Iuta 6.

    E faapefea i agelu o ē “na lē taofi i lo latou mamalu” i aso o Noa, ona fai ma lapata‘iga mo i tatou i aso nei? (1 Kori. 3:5-9; 2 Pete. 2:4, 9, 10)