Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 7: O se Tagata Toa

Tala 7: O se Tagata Toa
Enoka

A o faato‘ateleina pea tagata i le lalolagi, o le tele o i latou sa faia mea leaga e pei o Kaino. Ae e tasi lava le tagata sa ese. O le tamāloa lea o Enoka. O Enoka o se tagata toa. O tagata uma lava sa i ona tafatafa sa faia mea leaga, ae sa auauna pea Enoka i le Atua.

Pe e te iloa le māfuaaga sa faia ai e tagata i tuā i ina mea leaga e tele? Ia, se‘i mafaufau, O ai na māfua ai ona agasala Atamu ma Eva i le Atua i lo la aia o le fua o le laau sa fai atu le Atua e aua le aai ai? Ioe o se agelu leaga, o Satani. Ma o loo taumafai o ia e faaleaga tagata uma lava.

O se tagata gaoi ma fasioti tagata

I le isi aso sa fai atu Ieova iā Enoka e ta‘u i tagata se mea ae sa latou le fiafia e faalogo i ai. O le mea lenei: ‘O le a i ai se aso e faaumatia ai e le Atua tagata leaga uma lava.’ Atonu sa feita tele tagata e faalogo i ai. Sa latou taumafai fo‘i e fasioti Enoka. E tatau la ona toa Enoka e ta‘u atu i tagata le mea o le a faia e le Atua.

Sa le faaolaina umi e le Atua Enoka faatasi ai ma na tagata leaga. Sa ola Enoka i le na o le 365 tausaga lona matua. Aiseā tatou te faapea ai “na o le 365 tausaga?” Auā o tagata i na aso sa sili atu le malolosi ma ola umi. E moni, o le atalii o Enoka o Metusela sa ola mo le 969 tausaga le matua!

Tagata o loo faia mea leaga

Ina ua mavae le oti o Enoka, ua atili ai pea lava ona matua‘i leaga tagata. Fai mai le Tusi Paia ‘O mea uma e mafaufau i ai ua na o le leaga lava i taimi uma,’ ma sa ‘tumu fo‘i le lalolagi i amioleaga.’

Pe e te iloa le tasi o māfuaaga sa tele ai faalavelave i le lalolagi i na ona po? Talu ai ua iā Satani ni auala fou e maua ai e ia tagata ia faia mea leaga. O mea ia o le a tatou a‘oa‘oina e sosoo mai ai.

Kenese 5:21-24,27; 6:5; Eperu 11:5; Iuta 14,15.



Fesili

  • Aiseā na ese ai Enoka?
  • Aiseā na faia ai e tagata o aso o Enoka mea leaga e tele?
  • O ā mea leaga na faia e tagata? (Vaai i le ata.)
  • Aiseā na tatau ai ona toa Enoka?
  • O le ā le umi na ola ai tagata i na aso, ae e fia tausaga na ola ai Enoka?
  • O le ā na tupu ina ua mavae le oti o Enoka?

Fesili faaopoopo

  • Faitau le Kenese 5:21-24, 27.

    Na faape‘ī le faiā a Enoka ma Ieova? (Kene. 5:24)

    E tusa ai o le Tusi Paia, o ai le tagata aupito i matua lava na ola i le lalolagi ma e fia ona tausaga ina ua oti? (Kene. 5:27)

  • Faitau le Kenese 6:5.

    O le ā le tele o le amio leaga i le lalolagi ina ua mavae le maliu o Enoka, ma pe e tutusa lenā tulaga ma o tatou aso? (2 Timo. 3:13)

  • Faitau le Eperu 11:5.

    O le ā le uiga o Enoka na “fiafia i ai le Atua,” ma o le ā le i‘uga na oo i ai? (Kene. 5:22)

  • Faitau le Iuta 14,15.

    E faapefea i Kerisiano i aso nei ona faaa‘oa‘o i le toa o Enoka a o latou lapata‘ia tagata e faatatau i le taua o Amaketo o faalolo‘i mai? (2 Timo. 4:2; Epe. 13:6)