Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 3: O Le Ulua‘i Tane ma le Fafine

Tala 3: O Le Ulua‘i Tane ma le Fafine

O LE Ā le mea ua ese i lenei ata? Ioe, o loo i ai tagata. O i la‘ua o le ulua‘i tane ma le fafine. O ai sa ona faia i la‘ua? O le Atua. Pe e te iloa lona suafa? O Ieova. Ma sa faaigoaina le tane ma le fafine o Atamu ma Eva.

Atamu ma Eva i le faato‘aga o Etena

O le auala lenei na faia ai e Ieova Atamu. Sa ia aumaia ni efuefu mai le eleele ma fai ai se tino lelei atoatoa, tino tamāloa. Ona ia manava atu lea i lona isu, ona ola ai lea o Atamu.

Sa i ai se galuega a le Atua mo Atamu. Sa ia ta‘u atu iā Atamu ia faaigoa i manu eseese uma. Atonu sa umi se taimi e vaavaai ai Atamu i mea ola ina ia avatu i ai se igoa e fetaui lelei i ai. A o faaigoa e Atamu mea ola, sa ia iloa ai se mea. Pe e te iloaina o le ā?

Sa iai uma paaga a mea ola. Sa iai elefane tamā ma elefane tinā, sa iai fo‘i leona tamā ma leona tinā. Ae sa leai se isi e avea ma paaga a Atamu. Sa faamoegaseina loa e Ieova Atamu, ma tōina mai le ivi asoaso mai lona itu. Na faaaogāina ai loa e Ieova lenei ivi asoaso e fai ai se fafine mo Atamu, ma avea loa ma ana avā.

Ma‘eu le fiafia ua iai nei Atamu! Mafaufau i le fiafia fo‘i o Eva ia ina ua iai se faato‘aga manaia e ola ai! E mafai ona faia nei ni la fanau ma ola fiafia faatasi ai.

Sa mana‘o Ieova e ola e faavavau Atamu ma Eva. Sa ia mana‘o ia la faamanaiaina le lalolagi atoa pei o le faato‘aga i Etena. O se fiafiaga mo Atamu ma Eva pe a la mafaufau i le faia o lenei mea! Pe e te fia auai i le faia o le lalolagi o se faato‘aga manaia? Ae o le fiafiaga o Atamu ma Eva sa lē tumau. Se‘i o tatou su‘eina pe aiseā.

Salamo 83:18; Kenese 1:26-31; 2:7-25.



Fesili

  • E faapefea ona ese le ata i le Tala e 3 mai le ata i le Tala e 2?
  • O ai na faia le ulua‘i tane, ma o ai lona igoa?
  • O le ā le galuega na tuu atu e le Atua e faia e Atamu?
  • Aiseā na faamoegase ai e le Atua ia Atamu?
  • O le ā le umi na ono mafai ona ola ai Atamu ma Eva, ma o le ā le galuega na mana‘o Ieova e la te faia?

Fesili faaopoopo

  • Faitau le Salamo 83:18.

    O ai le suafa o le Atua, ma o le ā lona tulaga tutasi i le lalolagi? (Iere. 16:21; Tani. 4:17)

  • Faitau le Kenese 1:26-31.

    O le ā le taualuga o galuega na faia e le Atua i le aso lona ono, ma e faapefea ona ese lenei foafoaga mai manu? (Kene. 1:26)

    O ā sauniuniga na faia e Ieova mo manu ma tagata? (Kene. 1:30)

  • Faitau le Kenese 2:7-25.

    O le ā na aofia ai i le tofiga o Atamu e faaigoa manu? (Kene. 2:19)

    E faapefea ona fesoasoani le Kenese 2:24 ina ia tatou malamalama i le silafaga a Ieova e faatatau i faaipoipoga, le tete‘a po o le nonofo eseese o se ulugalii ma tatalaga faaipoipoga? (Mata. 19:4-6, 9)