Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 10: O le Lolo Tele

Tala 10: O le Lolo Tele

I FAFO o le vaa, sa ola pea tagata e pei ona masani ai muamua. Sa lē talitonu pea i latou o le a i ai se lolo. Atonu sa atili ai ona toē i latou. Ae mulimuli ane ua lē toe toē i latou.

O loo fefefe tagata ma manu a o si‘omia i le vai

I se taimi faafuase‘i lava sa amata ona to‘ulu mai vai. Ua masaa mai le lagi e pei lava o lou sasaaina o se pakete vai. Ua sa‘o Noa! Ae ua tuai tele mo se tasi ona toe ulu atu i le vaa. Ua tapunia mau e Ieova le faitoto‘a.

Sa le‘i umi lava ae ufitia uma eleele maualalo. Na amata nei ona pei o vaitafe tetele le vai. Sa tafefea i lalo laau ma faataavavale i lalo maa tetele, ua tele ai ma le pa‘o. Na fefefe tagata. Sa latou fe‘a‘ei atu nei i mea maualuluga. Ma‘imau pe ana latou faalogo iā Noa ma ulu atu i le faitoto‘a a o avanoa mo i latou! Ae ua fai nei si tuai.

Sa tuputupu pea ina maualuga le vai. Mo le 40 ao 40 pō sa maligi mai pea vai mai le lagi. Sa feosofi a‘e i itu uma o mauga ma mulimuli ane sa i‘u ina ufitia uma mauga maualuluga. Na pei lava ona tulei i ai le Atua, o tagata ma mea ola sa i fafo o le vaa na feoti uma. Ae sa saogalemu uma ē sa i totonu.

Sa lelei le galuega a Noa ma lana fanau i le fauina o le vaa. Na sii i luga e le vai ma sa opeopea ai. O le isi la aso, sa uma ai loa le timu, ae ua amata ona susulu le lā. Sa o se vaaiga uiga ese! Sa na o se sami tuloto lava i mea uma. Na o le tasi lava le mea sa vaaia o le vaa tele sa tafeafea i luga.

Le vaa tele o loo opeopea i luga o le vai

Ua le toe i ai nei ni tagata tinoeese. Ua lē toe i ai i latou o ē fasia tagata. Ua feoti uma i latou, o latou tinā ma le tele o tagata leaga. Ae o le ā le mea ua tupu i o latou tamā?

O tamā o nei tagata tinoeese e lē o ni tagata e pei o i tatou. O i latou o agelu sa o mai i le lalolagi e ola ai e pei o tagata. Ina ua sau le lolo, sa le‘i feoti i latou faatasi ma le tele o tagata. Ua lē toe faaaogāina nei o latou tino faaletagata na latou faia, ma ua toe fo‘i atu i le lagi o ni agelu. Ae ua le toe faatagaina i latou e toe avea ma vaega o le aiga agelu a le Atua. Ma ua avea ai i latou ma agelu a Satani. Ua ta‘ua i latou e le Tusi Paia o temoni.

Sa faaagi mai loa e le Atua le savili, ma ua amata ona maui atu le vai o le lolo. Lima masina ua mavae ona mālōlō ai lea o le vaa i luga o le tumutumu o le mauga. Na mavae aso e tele, ona tilotilo mai lea o ē na i totonu o le vaa ma iloa atu tumutumu o mauga. Ua faaauau ona maui atu pea le vai.

Ona faalele ese atu lea e Noa le oreva i fafo mai le vaa. Sa lele ese mo na o sina taimi ona toe fai mai lea, talu ai e leai se mea e tū ai. Sa faaauau pea ona faia faapea i taimi uma e fo‘i mai ai e mālōlō lava i luga o le vaa.

O se lupe

Ua fia iloa nei e Noa pe ua maui uma ese le vai mai le eleele o lea na ia faalele ai se lupe mai le vaa. Sa toe fo‘i mai le lupe talu ai e leai se mea e mālōlō ai. Sa toe auina faalua atu e Noa ma sa toe fo‘i mai ma le lau olive mata i lona gutu. Ma ua iloa nei e Noa ua maui le vai i lalo. Ona toe auina atu lea e Noa le lupe faatolu, mulimuli ane sa maua lea e ia se nofoaga mātūtū e mau ai.

Ua tulei atu nei le Atua iā Noa, ‘Ulu atu nei i fafo mai le vaa. Ave lou aiga ma mea ola uma.’ Sa i ai i latou i totonu o le vaa e sili atu i le tausaga. Se‘i o tatou mafaufau atu i le fiafia tele o i latou ina ua ō i fafo ma o loo feola pea!

Kenese 7:10-24; 8:1-17; 1 Peteru 3:19,20.



Fesili

  • Aiseā sa lē mafai ai ona ulu atu se tasi i totonu o le vaa ina ua amata ona timu?
  • E fia ao ma pō na aumaia ai e Ieova le timu, ma o le ā le loloto o le vai na iai?
  • O le ā na tupu i le vaa ina ua amata ona lofia e le vai le lalolagi?
  • Pe na faasaoina tagata tinoeese i le Lolo, ma o le ā na tupu i o latou tamā?
  • O le ā na tupu i le vaa ina ua mavae masina e lima?
  • Aiseā na faalele ai e Noa se oreva i fafo o le vaa?
  • Na faapefea ona iloa e Noa ua maui uma ese le vai mai le eleele?
  • O le ā na fetalai i ai le Atua iā Noa ina ua silia i le tausaga o iai ma lona aiga i totonu o le vaa?

Fesili faaopoopo

  • Faitau le Kenese 7:10-24.

    Pe na iai se mea na totoe i le faaumatiaga o tagata ma meaola uma i le lalolagi? (Kene. 7:23)

    O le ā le umi na faasolosolo ai ona maui vai o le Lolo? (Kene. 7:24)

  • Faitau le Kenese 8:1-17.

    E faapefea ona faaalia i le Kenese 8:17 e le‘i suia le ulua‘i fuafuaga a Ieova mo le lalolagi? (Kene. 1:22)

  • Faitau le 1 Peteru 3:19, 20.

    Ina ua toe fo‘i agelu fouvale i le lagi, o le ā le faamasinoga na faia iā i latou? (Iuta 6)

    E faapefea i le tala iā Noa ma lona aiga ona faamalosia ai lo tatou mautinoa e mafai e Ieova ona lavea‘i ona tagata? (2 Pete. 2:9)

Faitau Atili

FAAA‘OA‘O I LO LATOU FAATUATUA

‘Na Savavali Noa ma le Atua Moni’

O ā lu‘i na feagai ma Noa ma lana avā i le tausia a‘e o le la fanau? Sa faapefea ona la faaalia le faatuatua i le fauina o le vaa?